TWAJIGANYEJE ŴANDU
LIJIGANYO 10
Aŵeje Ŵakulipeleka
Lilemba: “Twaliji ŵakusachilila kumpa ngani syambone sya Mlungu, atamosesoni umi wetu usyesyenewo, ligongo twamnonyele mnope.”—1 Ates. 2:8.
Yaŵatesile Yesu
1. Alolele FIDIYO, kapena aŵalanje Yohane 3:1, 2. Kaneko ajanje yiwusyo ayi:
-
Ligongo chichi Nikodemo jwasagwile kuja kusimana ni Yesu chilo?—Alole Yohane 12:42, 43.
-
Ana Yesu pajwasimene ni Nikodemo chilo, jwalosisye chamtuli kuti jwaliji jwakusachilila kwajiganya ŵandu kuti aŵe ŵakulijiganya ŵakwe?
Ana Yaŵatesile Yesu Yikutujiganya Chichi?
2. Tukusalosya kuti tukusitwanonyela ŵane patukulipeleka pamasengo gakwakamuchisya ŵandu kuti aŵe ŵakulijiganya ŵa Yesu.
Amsyasyeje Yesu
3. Amjiganyeje mwakamulana ni ndaŵi soni malo gasagwile jwakulijiganya Baibulo jwawo. Jwalakwe mpaka asagule lisiku soni ndaŵi jisyesyene pawiki jakuti alijiganye. Ana jwalakwe mpaka agopoche kulijiganya pamalo gakusakamulila masengo, kumangwakwe, kapena pamalo gakusimanikwa ŵandu ŵajinji? Naga kuli kwakomboleka mpaka achenje ndandanda jawo kuti jikamulane ni yakusaka jwalakwe.
4. Amjiganyeje mwakutamilichika. Naga wawojo akutyoka, akalepelekasya kulijiganyako. Nambo mmalomwakwe aliwusye kuti:
-
Ana mpaka ngatendesye lijiganyoli pandaŵi jine mu wiki jijiji?
-
Ana mpaka namŵende mundu jwine kuti akatendesye lijiganyoli?
5. Tumŵendeje Yehofa kuti atukamuchisye kola nganisyo syambone. Tumŵendeje Yehofa kuti atukamuchisye kupitilisya kulijiganya ni mundu, atamose kuti tukusalijiganya najo mwangatamilichika kapena yikusamjigalila ndaŵi kuti atande kukamulichisya masengo yakulijiganyayo. (Afil. 2:13) Ngatukukayichila kuti jwakulijiganya jwawo akwete ndamo syejinji syambone. Myoyo amŵendeje Yehofa kuti ŵakamuchisye kulolaga mnope ndamo syelesyo.
ALOLESONI
Mis. 3:27; Mase. 20:35; 2 Akoli. 12:15
