ADƲWAVƲLƆYƐLƐ
OZUMALƐDƖYƐ 11
Ma Wʋ Ehilehilelɛ Nu La Kɛ
Egyinalɛzʋ-odwokɔ: ‘Sɛ bɛtɩndɛ ɛdɩndɛlɛ mvʋlɔ mɔɔ abiye ɩádɩ yɩ tʋ a, kɛ ɩkɛyɛ na abiye ɩanwʋ mɔɔ bɛkã nɩ a?’ —1 Kɔl. 14:9.
Mɔɔ Gyisɛsɩ Yɛlɩ
1. Kila VIDIYO yi, anzɛnyɩɩ kɩnga Matiyu 6:25-27. Akʋ̃ bozunzu ndwokɔɣizialɛ mɔɔ ilili ɔzʋlɔ yɩ nwʋ:
Mɩnla Yɛ Yesuma Wɔ Gyisɛsɩ Kɛnɩ a?
2. Sɛ ye ehilehilelɛ nu da kɛ a, ɩkɛma bɛkɛhakɛ mɔɔ yehilehileli bɛ nɩ na ɩkɛhã bɛ ahʋnlɩnɩ.
Sumazuma Gyisɛsɩ
3. Áma ɛtɩndɛ sʋ̃maa. Kɛ ankɩ ɛkɛhã ndwokɔ sʋ̃maa ɛkɛvalɩ odwokɔtile mɔɔ bosumaa yɩ nwʋ nɩ, fa wʋ adwɩnɩ siye ɔfʋã mɔɔ bosunzuu nwʋmɔ nɩ zʋ la. Sɛ ebizia odwokɔ be a, nyia abʋtalɩ ma wʋ Bayɩbʋlʋ dɩyɛzumanlɛvʋlɔ nɩ ma ɩma nwʋmɔ munwalɩyɛ. Sɛ ɩákʋla ɩma nwʋmɔ munwalɩyɛ anzɛnyɩɩ mɔɔ ɩkɛhã nɩ, ɩ nɩɩ Bayɩbʋlʋ ehilehilelɛ iáyiyia a, fa ndwokɔɣizialɛ mvʋlɔ bʋwa yɩ ma izunzu odwokɔ yɩ nwʋ bʋwɔ. Sɛ wʋ Bayɩbʋlʋ dɩyɛzumanlɛvʋlɔ nɩ tɩ odwokɔ titili mɔɔ ɩwɔ mɔɔ bosunzuu nwʋmɔ nɩ tʋ a, tʋwa dɩyɛzumanlɛ yɩ zʋ.
4. Bʋwa wʋ Bayɩbʋlʋ dɩyɛzumanlɛvʋlɔ ma igyina mɔɔ izuma daada nɩ zʋ ɩdɩ nninyeni mvʋlɔ tʋ. Kɛ ndianwʋ nɩ, ansaana bɔkɔwɔ ozumalɛdɩyɛ mɔɔ ɩfalɩ awudunwolɩyɛ nwʋ nɩ tʋ nɩ, de mmɩlɩ ɛgyɩkɩ̃ɩ̃ ɛ nɩɩ yɩ wʋwɔ bʋwabɩlɛ mɔɔ awuvʋlɔ wɔ numɔ nɩ zʋ.
5. Fa ndianwʋ di egyima bʋwɔ. Ansaana ɛkɛva ndianwʋ be keli egyima nɩ, bizia wʋ nwʋ kɛɛ:
-
‘Asʋ̃ ɩkɛyɛ mɛlɛkɛ ɩkɛma mɩ Bayɩbʋlʋ dɩyɛzumanlɛvʋlɔ yɩ kɛɛ ɩkɛdɩ yɩ tʋ a?’
-
‘Asʋ̃ ɩkɔwʋwa mɩ Bayɩbʋlʋ dɩyɛzumanlɛvʋlɔ yɩ ma ɩkɛhakɛ odwokɔ titili mɔɔ ɩwɔ nu nɩ anzɛnyɩɩ ndianwʋ yɩ la yɛ ɩkɛhakɛ a?’