Ang Gihimo ni Jesus

Unsay Atong Makat-onan Kang Jesus?

2. Dihang magtudlo ta sa simple nga paagi, mahinumdoman sa mga tawo ang atong gitudlo ug matandog ang ilang kasingkasing.

 Sundoga si Jesus

3. Ayaw sigeg estorya. Imbes hisgotan ang tanan nimong nahibaloan bahin sa usa ka topiko, pagpokus sa kon unsay gihisgotan sa publikasyon nga inyong gitun-an. Dihang mangutana ka, mapailobong hulata ang tubag sa imong Bible study. Kon wala siya mahibalo sa tubag o mosulti siyag punto nga dili uyon sa mga pagtulon-an sa Bibliya, pangutanag dugang aron matabangan siya nga masabtan ang punto. Kon iya na ning nasabtan, padayon na mo sa sunod nga punto.

4. Tabangi ang imong Bible study nga makita ang koneksiyon sa inyong gitun-an ug sa kon unsa nay iyang nahibaloan. Pananglitan, sa dili pa mo magsugod sa leksiyon bahin sa pagkabanhaw, basin puwede nimong hisgotan kadiyot ang iya nang nahibaloan bahin sa kahimtang sa mga patay.

5. Piliag maayo ang mga ilustrasyon nga imong gamiton. Sa dili pa nimo gamiton ang ilustrasyon, pangutan-a ang kaugalingon:

1.    ‘Simple ba ni nga ilustrasyon?’

2.   ‘Dali ba ning masabtan sa akong Bible study?’

3.   ‘Makatabang ba ni sa akong Bible study nga mahinumdoman ang pangunang punto, dili lang ang ilustrasyon?’