Ang Ọlẹ ká IJisọsị Họ

Ẹlịyẹ Ahị Tị́ Jẹ Bwu Ẹga nya IJisọsị?

2. Ụka kahị mẹ ang jẹ ụ-ụgbẹyị ọlẹ kọ la hukee, angịnyị ka kpịtịya nya ẹla ọlẹ kahị mẹjáa ọ tị ka gwaa ọ-ọkịlẹtu.

 Ba Ọgụ-ẹpẹtẹ nya IJisọsị Jẹ

3. Á ya ẹla lụmẹ ka. Ọkọkọ nyọka joja nya ang ọlẹ ka jẹ́ wuu u-uhye nya ẹla ọlẹ ka wẹẹ ya, ya irya nịrọ ụpwụ ọlẹ ka wẹẹ jẹ́ ang bwu. Kori ká tọ ịtọ ẹla kpá, dọhụ pịlẹẹ gba ọngọlẹ ka wẹẹ jẹ́ ang ta kọ ka wẹ. Kori ọ wẹng ịtọ ẹla ká lee ọ-wẹ ẹla ọlẹ kọ datị hị ẹla ọlẹ ká ịBayịbụụ mẹjẹ wẹwẹ, kpa ịtọ ẹla ịkịla dọọ ụbwọ nyọka kụ irya ju ẹla ọọwa. Ụka ká ọngọlẹ ká wẹẹ mẹ ang jẹ á wo etu nya ẹhị nya ẹla ọlẹ ka wẹẹ ya lẹ aalẹ, anụ kịnyaa ka ịlahị mẹ.

4. Da ọngọlẹ ká wẹẹ mẹ ang jẹ ụbwọ nyọka wo etu nya ang ịlẹ ká wẹẹ mẹjọ́ọ bwula ang ịlẹ kọ jẹ́ ene. Ọ-chụ pwokwita, ene a ka dọmwụ nya ang ọjẹ́jẹ u-uhye nya owuleji bwula igu, ọ-chịkpẹẹ a ka ya ẹla pyịnyẹng u-uhye nya ang ọlẹ ká ọngọlẹ ká wẹẹ jẹ́ ang ta jẹ́ ene-ene u-uhye nya iwe-ahụrụ nya angịlẹ kị gbu.

5. Kpa ẹla ị-chụ pwokwita mẹ ang jẹ dụmwọ-dụmwọ. Ene ká ka chụ ẹla pwokwita, tịlọng wo wẹẹ:

1.    ‘Ẹla ọ-chụ pwokwita ọwẹ la hukee?’

2.   ‘Ọngọlẹ kam wẹẹ mẹ ang jẹ ka wo etu nyamwụ ahyaahị?’

3.   ‘Ọ ka da ọngọlẹ kam wẹẹ mẹ ang jẹ ụbwọ nyọka kpịtịya nya egbeju nya ẹla—ọkọkọ nya ẹla ọlẹ kam chụ pwokwita kem?’