Oware nọ Jesu O Ru

Eme Ma Wuhrẹ Mi Jesu?

2. Nọ ma te wuhrẹ ahwo evaọ edhere ọlọlọhọ, ẹsiẹe a te rọ kareghẹhọ oware nọ ma wuhrẹ i rai, u ve je te ai udu.

 Rọ Aro Kele Jesu

3. Whọ ta ẹme bu hrọ họ. Whọ ta oware kpobi nọ whọ riẹ kpahe uzoẹme nọ wha bi wuhrẹ na ha, ukpoye, tẹrovi ugogo oware nọ wha bi wuhrẹ evaọ obe na. Whọ tẹ nọ onọ no, hẹrẹ ohwo na re ọ kẹ uyo, whọ kpakpa iẹe oma ha. Otẹrọnọ ọ riẹ uyo na ha hayo ọ ta ẹme jọ nọ ọ rọwokugbe Ebaibol na ha, nọe enọ efa nọ i re fiobọhọ kẹe roro kpahe ẹme na. Nọ ẹme na o te vẹ ohwo na ẹro no, whọ vẹ nyaharo.

4. Rọ oware nọ ohwo na ọ riẹ no vẹre wuhrẹ iẹe oware okpokpọ. Wọhọ oriruo, taure wha te ti muhọ ewuhrẹ kpahe ẹkparomatha na, whọ sae rehọ omoke jọ ta kpahe oware nọ ohwo na o wuhrẹ no kpahe oghẹrẹ nọ ahwo nọ a whu no a rrọ.

5. Rọ areghẹ kẹ iriruo. Taure whọ tẹ te kẹ oriruo, nọ omara nọ:

1.    ‘Kọ oriruo na ọ rrọ lọlọhọ?’

2.   ‘Kọ ohwo nọ me bi wuhrẹ na ọ te riẹ otọ riẹ lọlọhọ?’

3.   ‘Kọ u ti fiobọhọ kẹ ohwo na kareghẹhọ ugogo ẹme na, manikọ oriruo na ọvo ọ te kareghẹhọ?’