KUKWASHA BANTU KWIKALA BAANA BA BWANGA
LUFUNJISHO 11
Funjishainga mu Jishinda Japeela Kumvwa
Jifunde: ‘Ambainga byambo byapela kumvwa.’—1 Ko. 14:9.
Byaubanga Yesu
1. Tambai VIDYO, nangwa tangai Mateo 6:25-27. Apa bino mwisambe ano mepuzho:
Ñanyi Bintu byo Twafunjilako kwi Yesu?
2. Inge ke tufunjishe bantu mu jishinda japeela, kikebapeelela kuvuluka bintu byo twibafunjisha kabiji bikebafika pa muchima.
Ubainga Byaubanga Yesu
3. Kulolobwelanga pa kufunjisha ne. Kechi kyawama kwamba byonsetu byo mwayuka pa mutwe ye mubena kufundapo ne. Pakuba kyawama anweba kutatu muchima pa bishinka byonka biji mu buku ye mubena kumufunjishamo. Inge mwamwipuzha bwipuzho, mupembelelai akumbule. Inge kechi wayuka mukumbu ne, nangwa waamba byapusana na byaamba Baibolo, mwipuzhai mepuzho akwabo a kumukwasha kukwatakanya. Inge ye mubena kufunjisha waumvwisha kishinka, yai mu jifuka jikwabo.
4. Kwashai ye mufunjisha Baibolo kukwatankanya bintu byo abena kufunda na bintu byo ayuka kala. Nabiji inge mubena kufunda pa lusanguko, saka mukyangye kutendeka kwisamba pa uno mutwe, mwafwainwa patanshi kukipitulukamo nanji pa byo afunda pa biji bantu bafwa.
5. Ingijishainga bishimpi bulongo. Saka mukyangye kwingijisha kishimpi, iipuzhai’mba:
-
‘Abya kisakukwasha ye mfunjisha Baibolo kuvuluka bishinka bikatampe nyi, inyi usakuvulukangakotu kishimpi kyonka?’