Men eo Jesus Ear Kõm̦m̦ane

Ta eo Jej Katak jãn Jesus?

2. Ñe jej katakin armej ro ilo juon wãween epidodo im l̦amwaan, enaaj pidodo aer keememej men ko jej katakin er im enaaj tõpar bũrueer.

 Anõke Jesus

3. En jab lõñ kobban lo̦ñiid. Ijello̦kun am̦ kwal̦o̦k aolep men ko kwõjel̦ã kõn juon men, kõnono wõt kõn men ko ilo katak eo komiro ej etale. Ãlikin am̦ kwal̦o̦k juon kajjitõk, kijenmej im kõttar an rũkkatak eo am̦ uwaak. El̦aññe ejaje uwaak eo ak ej kwal̦o̦k juon l̦õmn̦ak me ejjab errã ippãn Baibõl̦, kõjerbal kajjitõk ko jet me renaaj jipañe ñan kõl̦mãnl̦o̦kjen̦ kake boin eo. Ãlikin an rũkkatak eo mel̦el̦e kõn boin eo, komiro en wõnm̦aanl̦o̦k.

4. Kõjerbali men ko em̦õj an rũkkatak eo am̦ jel̦ã kaki ñan jipañe mel̦el̦e katak ko rekããl. Ñan waanjoñak, m̦okta jãn amiro etale katak eo kõn jerkakpeje, kwõmaroñ ãliji ta eo rũkkatak eo em̦õj an jel̦ã kadede kõn ro remej.

5. Lukkuun kõjparok ñe kwõj kõjerbal waanjoñak ko. M̦okta jãn am̦ kõjerbal juon waanjoñak, kajjitõk ippam̦ make:

1.    ‘Epidodo im l̦amwaan ke waanjoñak in?’

2.   ‘Enaaj ke pidodo an rũkkatak eo aõ mel̦el̦e kake?’

3.   ‘Enaaj ke jipañ rũkkatak eo aõ ñan keememej boin eo im jab baj waanjoñak eo wõt?’