Tlen okichiuj Jesús

¿Tlenon tiuelij itech ken Jesús okichiuj?

2. Tla tikijtouaj tlen nimantsin manasikamati, akin techkakiskej xkilkauaskej tlen tikinmachtiaj niman ajsis ipan inyojlo.

 Xchiua ken Jesús

3. Maka sajnoye xtlajto. Maka xkijli nochi tlen tikmati itech tlen nentlajtojtokej, san kuajli xkasikamachilti tlen uajlauj ipan amatlajkuilojli kampa nemomachtijtokej. Ijkuak itlaj tiktlajtoltis, xchia mamitsnankili. San ika ¿tlenon uelis tikchiuas tla xkimati kenijki tlanankilis noso kijtoua itlaj tlen xnotlajtolnamiki iuan Biblia? Xtlajtolti tlen kipaleuis makasikamati tlen tikmachtisneki. Tla monomachtijkauj yokasikamat, uelis nenpanoskej ipan okse tlamachtijli.

4. Xtekitilti tlen monomachtijkauj ikimatstika para tikasikamachiltis tlen xkimati. Matikonnemilikan ika nentlajtoskej itech yoliuilistli, kuakon, kachtopa uelis achijtsin nentlajtoskej itech tlen monomachtijkauj ikimatstok itech tlenon panoua ijkuak timikij.

5. Kuajli xtlapejpeni tlen neskayomej tikintekitiltis. Ijkuak tiktekitiltis se neskayotl, kachtopa xmotlajtolti yejuin:

1.    “¿Yejuin neskayotl xouijtika?”.

2.   “¿Nimantsin kasikamatis akin nikmachtia?”.

3.   “¿Uelis kilnamikis tlamachtijli tlen noneki kasikamatis niman xsan neskayotl kilnamikis?”.