Seo Jesu a se Dirilego

Seo re Ithutago Sona go Jesu

2. Ge re ruta batho ka tsela e bonolo ba tlo kgona go gopola seo re ba rutilego sona, e bile re tlo kgona go ba kgoma dipelo.

 Ekiša Jesu

3. O se ke wa bolela kudu. Go e na le gore o bolele ditaba tše dintši tšeo o di tsebago ka taba yeo le bolelago ka yona, bolela ka dilo tšeo di lego ka gare ga kgatišo yeo le ithutago yona. Ge o fetša go botšiša motho yo o ithutago le yena Beibele potšišo, mo fe nako ya gore a e arabe ntle le go mo felela pelo. Ge a sa tsebe karabo goba a araba karabo yeo e ganetšanago le seo Beibele e se rutago, mmotšiše dipotšišo tše dingwe tšeo di tlago go mo thuša gore a hwetše karabo ya maleba. Ge a se no kwešiša, tšwela pele ka go mo ruta ntlha e latelago.

4. Pele o ruta motho yo o ithutago le yena thuto e mpsha, mo thuše go tswalanya thuto yeo le seo a šetšego a se tseba. Ka mohlala, pele le ithuta thuto yeo e bolelago ka tsogo ya bahu, thoma ka go mo gopotša gore go direga’ng ka batho bao ba hlokofetšego, ka ge o tla be o šetše o mo rutile thuto yeo.

5. Diriša dipapišo ka bohlale. Pele o diriša papišo e itšego, ipotšiše gore:

1.    ‘Na papišo ye ke e dirišago e bonolo?’

2.   ‘Na morutwana wa Beibele o tla e kwešiša gabonolo?’

3.   ‘Na papišo ye e tla thuša morutwana go gopola seo go bolelwago ka sona, go e na le go no gopola papišo feela?’