Etthu Aapanke iye Yeesu

Etthu Ninhudha nhu ni Ntakihero na Yeesu

2. Vaavo ninhudhiha nhu mwa enamuna yookhweya, atthu onnaakhweela wuupuwelela etthu naahudhinhe nhu ni ninnaaphara nrima.

 Muntakihe Yeesu

3. Nxake olotta vawaatta. Ohiya olotta itthu dhootheene mundhuwela nnyu voohima dha mwaha mmodha, nthokorerye pahi mwaha ori eliivuru munrumeela nnyu wiira munsomihe naskola nnyu. Noomala opaka nikoho, munlipelele naskola nnyu wiira aakhule moopisa nrima. Ndho akhala wiira naskola nnyu khandhuwela moopora wawaakhula aahiidho onnaakhula moovirikana ni ele Biibiliya onhudhiha iye, mumpakele makoho makina akhanle onkhalihera wuupuwelela ni ottemulela mwaha owo. Vaavo naskola nnyu oniwaasasa iye saana epontu yuulupale ya ettima emodha, ntuphele ettima enttharelana.

4. Munkhalihere naskola olikanyiha itthu ohundhe iye yoosoma evinre ni itthu onhudha iye nenna-va. Mwa ntakihero, nhinatthi othokorerya yoosoma enlotta voohima dha ohihimuwa, muuluule mwawaakuveya vamodha ni naskola nnyu voohima dha nkhalelo wa alipa-ookhwa.

5. Ndhuwele orumeela saana malikanyiho. Nhinatthi orumeela nlikanyiho nimodha, mwiikohe wiira:

1.    ‘Niire nlikanyiho nna tinookhweya?’

2.   ‘Niire naskola aka onoowerya wiiwaasasa mwawaakuveya?’

3.   ‘Niire nlikanyiho nna ninoonkhalihera naskola aka wuupuwelela epontu yuulupale aahiidho on’ya wuupuwelela nlikanyiho pahi?’