TWAJIGANYEJE ŴANDU
LIJIGANYO 11
Ajiganyeje M’litala Lyangasawusya
Lilemba: “Naga jemanja ngamkuŵecheta yindu yakupikanika, ana jwine mpaka amanyilile uli yamkuŵechetayo?” —1 Akoli. 14:9.
Yaŵatesile Yesu
1. Alolele FIDIYO, kapena aŵalanje Mateyu 6:25-27. Kaneko ajanje yiwusyo ayi:
-
Ana ni chisyasyo chapi chaŵakamulichisye masengo Yesu pakulosya yakusatenda Yehofa pakutusamalila?
-
Atamose kuti Yesu jwamanyililaga yindu yejinji yayikusatenda yijuni, ligongo chichi jwalakwe jwagombelechesye mnope yindu yangasawusya kuyipikana? Ligongo chichi lyeleli lyaliji litala lyambone mnope pakwiganya?
Ana Yaŵatesile Yesu Yikutujiganya Chichi?
2. Naga tukwajiganya ŵandu m’litala lyangasawusya nikuti tuchayika mumtima soni chachikumbuchila mwangasawusya yindu yatwajiganyisyeyo.
Amsyasyeje Yesu
3. Akaŵechetaga mnope. Mmalo mwakusala yindu yosope yakumanyilila pangani jakulijiganya, akusosekwa agambeje kugombelechesya mnope yindu yayikusimanikwa m’buku jakulijiganyajo basi. Pamwusisye chiwusyo jwakulijiganya jwawo, amjembecheyeje mwakuwusimana mtima kuti ajanje. Naga ngakumanyilila kwanga kwake kapena akusala yindu yakulekangana ni yajikusajiganya Baibulo, akusosekwa amwusyeje yiwusyo yine yakonjechesya kuti amanyilile nganisyo syakwe panganijo. Naga jwakulijiganyajo apikanichisye mfundo jekulungwa nikuti mpaka ajawule pa mfundo jine.
4. Akamulichisyeje masengo yindu yakumanyilila jwakulijiganya jwawo kuti amkamuchisye kupikanichisya yindu yasambano. Mwachisyasyo, mkanatande kukambilana ya lijiganyo lyalikusasala ya kwimuka kwa ŵandu ŵaŵawile, akusosekwa kukambilana mwakata yindu yaŵalijiganyisye jwakulijiganyajo pakwamba mwaŵelele ŵandu ŵawe.
5. Akamulichisyeje masengo yisyasyo mwakusamala. Mkanatande kusala ya chisyasyo akusosekwa kuliwusya kuti:
-
‘Ana jwakulijiganyaju chakumbuchileje mfundo jekulungwa mmalo mwagamba kukumbuchila chisyasyochi basi?’
