NDƐ UFLƐ WIE MUN 3
Wafa nga a kwla fa fluwa “A kwla di aklunjɔɛ tititi’n!” kle sran’m be Biblu’n nun like’n
Kwlaa naan b’a yi fluwa A kwla di aklunjɔɛ tititi’n!, be srɛli Ɲanmiɛn kpa yɛ be kunndɛkunndɛli i nun ninnge mun. Kɛ ɔ ko yo naan w’a fa fluwa sɔ’n w’a di junman kpa’n kɛ á klé sran’m be like’n yo ninnge nga mun.
Ka naan w’a ko kle sran’n i like’n
-
1. Siesie ɔ wun kpa. Kɛ á síesíe ɔ wun’n, bu like nga like suanfuɛ’n kwla miɛn i wun’n, ɔ nin sa nga be o i su’n nin like ng’ɔ lafi su’n be akunndan. Bu ninnge nga be wlɛ wunlɛ nin be su falɛ’n kwla yo kekle mɛn i’n be akunndan. Bu wafa nga ninnge nga be o ndɛ akpasua “Ndɛ wie mun ekun” nun’n be kwla uka like suanfuɛ’n i akunndan wie. Yɛ sɛ ɔ nin i fata’n kɛ amún súan like’n fa be ukɛ i.
Kɛ amún súan like’n
-
2. Sɛ ɔ ti like suanfuɛ’n i klun su’n, kwlaa naan amun a bo like suanlɛ bo yɛ kɛ amun ko wie i suan’n amun srɛ Ɲanmiɛn.
-
3. Kɛ amún súan like’n nian ɔ wun su naan w’a ijɔman kaka. Fa ɔ ɲin sie i fluwa’n i nun ndɛ’n su yɛ yaci like suanfuɛ’n nun naan ɔ kɛn i klun ndɛ.
-
4. Kɛ amún bó fluwa’n i nun like suanlɛ akpasua kun bo’n, kanngan i su ndɛ cinnjin’n nun. Kpɛkun bo like suanlɛ wie mɔ be o akpasua sɔ’n nun’n be flɛlɛ’n be su.
-
5. Kɛ amun ko wie ndɛ akpasua kun nun like suan’n, fa akpasua sɔ’n i nun flanlɛ’n uka like suanfuɛ’n naan i wla kpɛn ninnge ng’ɔ suannin be’n be su.
-
6. Kɛ a nin like suanfuɛ’n bé súan like’n:
-
(1). Amun kanngan ndɛ kpɔlɛ’m be nun.
-
(2). Amun kanngan ndɛ mma nga be klɛli be wun lɛ kɛ “Kanngan nun’n” be nun.
-
(3). Sɛ ɔ nin i fata’n amun kanngan ndɛ mma uflɛ wie’m be nun.
-
(4). Sɛ amun le video nga be klɛli be wun lɛ kɛ “An bo video’n,” an nian be kwlaa.
-
(5). Usa kosan mun.
-
(6). Fa like suanfuɛ’n i ɲin sie i desɛn nga be o ndɛ akpasua “Si ndɛ’n nun kpa ekun’n” nun be su. Yɛ se i kɛ ɔ yiyi be nun.
-
(7). Fa ndɛ akpasua “Like ng’ɔ fata kɛ a yo’n” uka like suanfuɛ’n naan ɔ wun wafa ng’ɔ kwla kɔ i ɲrun’n i wlɛ. Wlɛ i fanngan kɛ ɔ yo like nga be klɛli i lɛ’n annzɛ ɔ nian su kle like uflɛ m’ɔ kwla yo’n, annzɛ ɔ yo i nɲɔn’n.
-
(8). Kɛ like suanfuɛ’n ɔ́ síesíe i wun’n, sɛ video annzɛ ndɛ kun m’ɔ o “Ndɛ wie mun ekun” i nun’n ɔ yoli i fɛ’n se i kɛ ɔ kɛn i ndɛ.
-
(9). Sɛ amun bo like suanlɛ kun bo’n amun mian amun ɲin be guɛ i bo.
-
Kɛ amun ko wie like suan’n
-
7. Bu like suanfuɛ’n i akunndan titi. Srɛ Zoova kɛ ɔ yra like suanfuɛ’n i ɲin m’ɔ mian naan w’a kwla wɔ i ɲrun’n su. Asa’n, srɛ i maan ɔ man ɔ ngwlɛlɛ naan w’a kwla uka like suanfuɛ’n titi.
