YƐLƐ MINE NAŊ LƐ BEBE 3
Sori Hoŋ Na Baŋ Tu Kyɛ De A Nyɛ Zeŋ Laafeɛ Tegitegilɛ! Gane Na Ka Ho Neŋ Neɛ Zanne A Baabole
Te yɔɔmine na puore sɔrɛɛ Jehoova a kyɛ mãã ba menne a sɛge yɛlɛ na zaa naŋ be a Nyɛ Zeŋ Laafeɛ Tegitegilɛ! gane na poɔŋ. Ka hooŋ boɔrɔ ka ho de a gane ŋa tonɔ neŋ toma soŋ, de a sowuli ŋa tonɔ neŋ toma saŋa na ho neŋ neɛ kaŋa naŋ zanna o poɔ yɛlɛ na.
Sɛre ka a zannoo na piili
-
1. Nare ho meŋɛ velaa zaa. Saŋa na hoŋ erɛ lɛ na, teɛre o soba yelfɛree, zemmo yɛlɛ ane teɛroŋ na oŋ taa kyaare yɛlɛ. Mɔɔrɔ ka ho baŋ yɛlɛ na mine naŋ na baŋ e kpeɛŋaa koo ka o woŋ a muni, kyɛbee a e kpeɛŋaa ka o de a tonɔ neŋ toma. Teɛre nyɛ lɛ hoŋ na baŋ de yɛlɛ naŋ be “Yɛlɛ Mine Naŋ Lɛ Bebe” zie na soŋ o soba. Ho na baŋ de la a yɛlɛ soŋ o soba saŋa na yɛŋ zanna a gane na.
Saŋa na yɛŋ zanna
-
2. Ka a Baabole zannezannaŋ wa sage, de puoro piili neŋ kyɛ baare neŋ a zannoo.
-
3. Kaara soŋ a ta wa yele yɛlɛ yaga. De ho teɛroŋ eŋ yɛlɛ naŋ be a gane poɔŋ na. Ko o soba vuo ka o maŋ yeli yɛlɛ naŋ be o sukyiriŋ.
-
4. Ka yɛneeŋ wa piili ka yɛ zanne a kyɛlee kaŋa zaa, maŋ kanne yɛlɛ naŋ be zie na ba naŋ sɛge ka “Yɛlɛ Hoŋ Na Zanne” na. Manne a zannoo mine yɛlɛ koo ŋmaaŋmaa lɛ.
-
5. Ka yɛneeŋ wa zanne a kyɛlee kaŋa zaa baare, de soorebie naŋ be “Boŋ Hoŋ Zanne Yi A Kyɛlee Poɔŋ” zie na soŋ o soba ka o leɛteɛre yelnimizeere na oŋ zanne na.
-
6. Vɛŋ ka ho neŋ ho Baabole zannezanna na maŋ e ŋaaŋ saŋa na yɛŋ wa zanna a zannoo kaŋa zaa na:
-
a. Yɛ maŋ kanne a kannoo ziiri na.
-
b. Yɛ kanne a sɛgre na zaa ba naŋ sɛge eŋ ka “Kanne” na.
-
d. Ka yɛneeŋ boɔrɔ, yɛ na baŋ kannɛɛ a sɛgre na mine naŋ bebe na.
-
e. Ŋmɛ a vidiori na ba naŋ sɛge eŋ ka “Ŋmɛ” na (ka a vidioŋ wa bebe la lɛ).
-
f. Soore o soba a soorebiri kaŋa zaa.
-
g. Ka yɛneeŋ wa ta “Zanne Yɛlɛ Yaga Poɔ” zie na, wuli o soba fotori naŋ bebe na, a kyɛ ko o sori ka o wuli teɛroŋ oŋ taa kyaaraa.
-
h. De a “Yɛlɛ N Naŋ Na E” zie na soŋ o soba ka o nyɛ lɛ o naŋ nyɛrɛ nimitɔɔre gaabo aseŋ. Ho na baŋ emooŋ faŋa ka o de yɛlɛ naŋ be a gane poɔŋ na biŋ o nimitɔɔreŋ, kyɛbee ka o de yelyuo kaŋa biŋ o nimitɔɔreŋ. Ka hooŋ boɔrɔ, ho na baŋ emooŋ faŋa ka o de a yɛlɛ ayi zaa toŋ neŋ toma.
-
i. Soore o soba ka, saŋa na oŋ nara o meŋɛ na, o nyɛɛ yelzu kyɛbee vidio kaŋa naŋ be a “Yɛlɛ Mine Naŋ Lɛ Bebe” zie na naŋ tɔ o sukyiri bee?
-
k. Ka yɛneeŋ wa nyɛ vuo ka yɛ zanne, maŋ mɔɔrɔ ka ho baare a zannoo.
-
Ka a zannooŋ wa baare
-
7. Maŋ teɛrɛ ho Baabole zannezanna na yɛlɛ. Maŋ puore sɔre Jehoova ka o soŋ ho Baabole zannezanna na ka o nyɛrɛ nimitɔɔre gaabo, a kyɛ lɛ ko bo yɛŋ ka ho baŋ lɛ hoŋ na baŋ e a somoo.
