BELĒDI BA MBATA C
Ne̱ni tombise̱ mokwa ma Bibe̱l na kalati Be̱ne̱ longe̱ le bonam o bwindea!
Bonasango ba kane̱ eyeka, bombwea pe̱ ná pe̱ńe̱pe̱ńe̱ nje e ta yangame̱n tilabe̱ o kalati Be̱ne̱ longe̱ le bonam o bwindea! Ná o busane̱ tombwane̱ o ni kalati, bupe̱ man matanga ma mongwane̱ wa o tombise̱ mokwa ma Bibe̱l ńai a bwam.
Oboso ná o matombise̱ jokwa
-
1. Boṅsane̱ mo̱ bwam. Niponda weno̱ o boṅsane̱ dutea ońola ńo̱ng’a mokwe̱ Bibe̱l, bete̱medi bao, na nje a dube̱no̱. Dutea oboso ba ponda njika mato̱ti ma tobotobo me ná ma be̱ mo̱ ndutu o so̱ṅtane̱ to̱ we̱le̱ o ebolo. Dutea ne̱ni milopo m’ekwali me o dongo “Bata wasa” meno̱ ná mongwane̱ mokwe̱ Bibe̱l, o be̱ pe̱ be̱be̱ o bolane̱ mo̱ o pond’a jokwa yete̱na nika e mapula.
O pond’a jokwa
-
2. Botea jokwa te̱ na muka, o kwese̱ pe̱ mo̱ na muka yete̱na mokwe̱ Bibe̱l emedi.
-
3. Angame̱ye̱ ná o si to̱po̱ jita. Te̱me̱ye̱ nde o belēdi be o kalati, wese̱le̱ pe̱ ná mokwe̱ Bibe̱l a bole jo̱nge̱le̱ lao.
-
4. Obiana o mabotea dibe̱le̱ te̱, langa jo̱nge̱le̱ lao la mom o kwaleye pe̱ ońola tem’a mokwa iwo̱.
-
5. O bo̱le̱ te̱ dibe̱le̱ diwo̱, bolane̱ ndimbisedi ńa di dibe̱le̱ ná wongwane̱ mokwe̱ Bibe̱l o kombe̱ belēdi okono̱.
-
6. Niponda bińo̱ na mokwe̱ Bibe̱l leno̱ o jokwa:
-
Langa dongo te̱.
-
Langa bepasi ba Bibe̱l be̱se̱ be makabe̱ ná “Langa.”
-
Langa bepasi ba Bibe̱l bepe̱pe̱ yete̱na o to̱ndi.
-
Lee̱ sinima ye̱se̱ i makabe̱ ná “Ombwa” (yete̱na ye n’eyem’ango̱).
-
Baise̱ mokwe̱ Bibe̱l myuedi te̱.
-
Baise̱ mokwe̱ Bibe̱l ná ombwe maduta me o dongo “Ala o njiba,” o baise̱ pe̱ mo̱ ná a kwaleye ońol’ao.
-
Bolane̱ edinge̱le̱ ya dongo “Bola din” o jongwane̱ mokwe̱ Bibe̱l ná mo̱me̱ne̱ a me̱ne̱ bońaki bao ba mudī. Ome̱le̱ mo̱ ná ombweye to̱ti laboso la “Bola din,” a te̱se̱ pe̱ mambo mape̱pe̱ eno̱ ná a to̱ndo̱ bola, to̱ bola mabane̱.
-
Baise̱ mokwe̱ Bibe̱l nga niponda a tano̱ a boṅsane̱, a bwane̱ mulopo ma jokwa mō̱ to̱ sinima po̱ ńa dongo “Bata wasa” muńe̱nge̱.
-
Keka ná lo bo̱le̱ jokwa diwo̱ ngedi te̱ lo mokwano̱.
-
Ombusa jokwa
-
7. O̱nge̱le̱ mūt’ango̱ ńa jokwa. Kane̱ Yehova ná a namse̱ bońaki bao, ongwane̱ pe̱ wa o so̱ṅtane̱ ne̱ni jongwane̱ mūt’ango̱.