-Bho -nɩn ɲɔn ˈye dhɛ ˈcɩan anˈ

1. 1. Po -manˈ ˈˈjɛ kpɔˈˈ -kajɔɔnka. -Bho -nɩn -manˈ ˈˈjɛ kpɔˈˈ -poaˈ aˈ, ɲɔn -ˈyea dhɛ -tɔɔn ɔn, dhɩ -ɩanˈ dɩ kmɔn ˈˈbhli -e dɩ ɔ nɩan ˈe ˈdhi -e dhɩ ɔ dea -gwlɩˈˈ ɛ, -naan ɩanˈ dɩ tɔˈ ˈˈkpei. Dhɩ -ɩanˈ i ˈŋwɔɛn -aeˈˈ -ɩanˈ ˈˈjhriɛ ˈˈduaˈˈ ˈbhɛɛa ɛ ˈyea ˈˈɩ -kman ˈdhe ɔ bho ɛ, -sie- nɔnˈˈ ɲan -ˈyɩ tɔˈ ˈˈkpei -naan. -Ka ˈfɔ -ɔɔˈ ˈˈdhru nɩan “ˈBɔn dhɩ -ˈnɩɩn anˈ i ˈŋwɔan in” ˈbhɛɛa ɔ ˈyea ɲɔn -man tɔɔan dhɛ ɔˈ sʋn bho -po sʋn nʋn ɛn, -nɛɛn- tɔˈ ˈˈkpei -ˈmɛn -ˈgbaeˈ -ˈyeɔ dhbhoˈˈ -nʋʋn -bho aʋa sa dhɛ ˈcɩan anˈ.

-Bho aʋ -nɩn dhɛ ˈcɩaan anˈ

1. 2. -Bho ɲɔn -man tɔɔan dhɛ ˈŋwɔɔn- ˈbho ɛˈ, -ˈmɛn bhae- -wɛeˈ aʋ ˈye dhɛ ˈcɩaan -dee ˈˈdhe bhae- -ke -wɛeˈ aʋ ˈyeɛ ˈˈdhru jra.

2. 3. -Manˈ ˈtmʋn -e dɩ -duuˈˈ -dhe. ˈˈTii- ˈbho dhɛ aʋa ˈcɩan ˈˈkpe -ˈmɛn nʋɛn ɲɔn -man tɔɔan dhɛ ˈye dɩ nɩan ˈbho ɔ -gwlɩˈˈ ˈtmʋn.

3. 4. -Bho aʋ -dee ˈsɛɛ ɛˈ ˈfɔ -dhee ˈcɩaan anˈ, zro ˈfɔ -ˈnɔn ɔnˈ -da ɲʋn ˈcrea dhɛ kɔandɩ ka, -ˈmɛn ˈtmʋn ˈcɩaandhɩ aˈ ˈˈdhri aˈ dɩ -dhɛ ˈˈzaan.

4. 5. -Bho aʋ gwɛ ˈfɔ dhueˈ ɔˈ ˈcɩaan anˈ, -jhii ˈfɔ dhɛwɛ- -ˈŋwɔn in -ɛn? dhi -ˈye ɲɔn -man tɔɔan dhɛ sʋn bho po ɔ ˈye tɔˈdɩ ɔ ˈŋwɔan in anˈ dɩ glʋˈ bho po.

5.  6. -Bho aʋa sa dhɩ ˈcɩan anˈ:

   1. 1. Zro ˈsɛɛ ɛˈ kpɛ.

   2. 2. Zro Biiblʋ aˈ ˈˈjhri aˈ klɛɛ ɲʋn ˈcrea “Zro” ˈbho ˈˈjhibhaˈ.

   3. 3. -Bho ɛ kɔn dɩ ɛˈ, zro Biiblʋ aˈ ˈˈjhri -ˈnɩɩn nɩan ˈe ˈcɩaandhɛ ˈdhi.

   4. 4. Po ˈo videe -ɩn ˈbho ˈˈjhibhaˈ ɲʋn ˈcreaˈ “Po ˈo” (-bho -ˈbhlɩ ɛˈ).

   5. 5. Po ˈe ideedɩ aˈ klɛɛ dhueˈ dhueˈ.

   6. 6. De fete nɩan ˈe “Kpa dhɛ i ˈŋwɔɛn ɲan” ˈdhi -jiɛ ˈˈkpe -ˈmɛn po ˈe ideedɩ -wɛeˈ dhɛcɩain ˈye ɩanˈ dɩ ˈtmʋn.

   7. 7. -Jhii ˈˈtɛʋn- “Dhɛ -ˈbhɛɛa -ˈyea nʋn ɛn” dhi -ˈye dhɛcɩain ˈkpɩ po ɔ ˈye ɲan -muɛn in ˈbɔn ˈdhe ɲɔnsoadhɛ ˈdhi. -ˈBhɛɛˈ -ˈyeɔ ˈkpɩ po ɔ ˈye dhɩ ˈsɔɔn nɩan ˈo ɩanˈ dhueˈ -aeˈˈ -ɩn nɩan ˈsɔɔn ˈbho -za.

   8. 8. Dee- dhɛcɩain dhi -bho ɔ ˈjhee- ˈcɩaandhɩ -aeˈˈ videe nɩan ˈe “ˈBɔn dhɩ -ˈnɩɩn anˈ i ˈŋwɔan in” ɛnˈ ˈfɔ bho aˈ dhueˈ ˈmʋnan ˈdhi -da ɔɔ poa ɔɔˈ ˈˈjɛ kpɔˈˈ ɔ.

   9. 9. Po ˈe ˈkpɩ -nɩn ɔ ˈye ˈcɩaandhɩ aˈ klɛɛ nɩan ˈe ˈfɔ dhueˈ ˈdhi ˈe gwɛ -wɛeˈ aʋ ˈye ˈo ˈfɔ -ˈnɔɔn ˈˈkpe mun.

-Bho aʋ gwɛ dhɩ ˈcɩaan anˈ

1. 7. -Naan ɲɔn -man tɔɔan dhɛ ɔˈ dɩ tɔˈ ˈˈkpei jheejhee. Bhae- Zoova ɔ ˈye ˈkpɩ -manˈ dhɛcɩain ɔn poa ˈe -wɛeˈ ɔ ˈyea ɲan mun ˈdhe ɲɔnsoadhɛ ˈdhi ˈˈniman po ˈˈdhe ɔ ˈye ʋn tɔˈdhinɩɛn ˈˈɲɩn -ke -wɛeˈ -ˈyeɔ sʋn bho po.