AƐLĀ NŌO YƆ OŊMƐYI KU ƆKPÁ A 3
Ɛgɛ Nɛ Alɔ Géē Bi Ɔkpá Ku Jɔɔnyɛ Oyeeyi Nōó Gáā Mɛ Gboogboo Ŋ! Le Ya Oklɔcɛ Ku Ubáyíbu Mla Ācɛ
Ayinɛ a gbɔɔkɔ lɔfu lɔfu klla leyi yɛ aɛlā néē ta tu ipu ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma lɔɔlɔhi. O ya ɛɛ ku a lɛ itene ŋma ɔkpá nyā lɔɔlɔhi, bi aɛlā nōo ba nyā le yuklɔ eko nɛ a gē klɔcɛ ku Ubáyíbu mla ācɛ a.
Gbɔbu lɛ oklɔcɛ a
-
1. Lɛ otutu ya taajɛ lɔɔlɔhi. Abɔ a gē ya otutu a, gbɛla lɛyikwu aɛgbá, āhɔ̄ mɛmla ɔdā nɛ ɔcɛ nɛ a gē ya oklɔcɛ mla ɔ a kpɔtuce a. Gbɛla lɛyikwu aɛlā nōo lɔfu lɔnɔ tu ɔ ō jɛyi nu amāŋ bi le yuklɔ. Leyi yɛ ɛgɛ nɛ ɛlā nōo yɔ aya ku “Jila Ɛlā Nyā Má Tōōtɔ̄ɔ̄” a lɔfu ta ɔcɛ nɛ a gē klɔcɛ ku Ubáyíbu mla ɔ a abɔ, ku a klla le tutu ō bi ɔ le yuklɔ eko nɛ aa gē klɔcɛ, ɛgɛ nōó cɛgbá lɛ a.
Ɛpleeko ku oklɔcɛ a
-
2. Gbɔɔkɔ gbɔbu mla igbihi ku oklɔcɛ a, ɔdaŋ ka ɔcɛ nɛ a gē klɔcɛ mla ɔ a cɛ.
-
3. Leyi kwɛɛcɛ ku á hii kɛla fiyɛ ɔfu ŋ. Lɛ ɔtu ku uwɔ kwu ɔkpá nɛ a yɔ i bi le ya oklɔcɛ a, cɛɛ ku a jɛga lɛ ɔcɛ nɛ a gē klɔcɛ mla ɔ a kóō ka ɔdā nōo wɛ ɔtu ku nu a.
-
4. Eko nɛ a gáā gbɔɔ aya éyi ku ɔkpá a, lɛ ɔcɛla ku aya ɔɔma jé, ku a klla ceyitikwu kɛla ligii lɛyikwu ikpɛyi ɛlā ku aɛlā ō nwu a.
-
5. Eko nɛ a lɛ aya éyi ya mɛ, bi aya ku aɔdā nɛ alɔ leyi yɛ ɔ ɛ ma le ta ɔcɛ nɛ a gē klɔcɛ ku Ubáyíbu mla ɔ a abɔ kóō blakwu aɛlā ɔkwɛyi nɛ ó nwu ɛ ma.
-
6. Abɔ a gē ya oklɔcɛ ku eyeeye ku aɛlā ō nwu a mla ɔcɛ nɛ a gē ya oklɔcɛ mla ɔ a:
-
Jé ogwotu a.
-
Jé ɛjɛɛji Ubáyíbu néē ta u “Jé” ba ɔ iyē a.
-
Jé aɛga ku Ubáyíbu ɔhá ɛgɛ nōó cɛgbá lɛ a.
-
Lɛ ɛjɛɛji uvidio néē ta u “Mafu” ba ɔ iyē a ce ɔ (ɔdaŋ kóō tɔɔtɛ gā uwɔ).
-
Da ɔcɛ nɛ a gē klɔcɛ mla ɔ a eyeeye ku aɔka a.
-
Da ɔcɛ nɛ a gē klɔcɛ mla ɔ a kóō leyi má ifoto nōo yɔ aya ku “Jé Gɔbu” a, ku a klla da ɔ kóō kɛla lɛyikwu ifoto a.
-
Bi ikpati ku “Ɔdā Nɛ A Géē Ya” a le ta ɔcɛ nɛ a gē klɔcɛ mla ɔ a abɔ, kóō jé ɛgɛ nɛ ó yɔ i jɛ gɔbu lɛ a. A lɔfu ta ɔ ɔtu kwu ɔtu kóō bi ocabɔ ku ɔdā nɛ a géē ya a le yuklɔ, kōó klla miya aɔdā ɔhá nɛ ó géē ya amāŋ ya ɛplɛɛpa ku uwa.
-
Da ɔcɛ nɛ a gē klɔcɛ mla ɔ a ɔka ɔdaŋ kóō jɔɔnyɛ aikpɛyi ɛlā amāŋ auvidio nōo yɔ aya ku “Jila Ɛlā Nyā Má Tōōtɔ̄ɔ̄” a, eko nɛ ó yɔ i ya otutu ku ɛlā ō nwu a.
-
Ceyitikwu ku a lɛ ɛlā ō nwu éyi ya mɛ, eko duu nɛ aa ya oklɔcɛ.
-
Igbihi ku oklɔcɛ a
-
7. Gɔbu yɔ i gbɛla lɛyikwu ɔcɛ nɛ a gē klɔcɛ mla ɔ a. Gbɔɔkɔ lɛ Ujehofa kóō hɔha ce ō jɛ gɔbu ku ɔcɛ nɛ a gē klɔcɛ mla ɔ a, kóō klla je ijeeyi gā uwɔ, ku a jé ɛgɛ nɛ a géē ta ɔ abɔ a.