EBI A GBẸN BA ỌLE: 3
Ebi Mhan Ha Rẹ Ha Noo Ebe Natiọle “Sọnyẹnmhẹn bhi Ighegheghe!” Rẹ Man Ẹbho Baibo Yẹ
Ọkuẹsẹ a re ebe natiọle Sọnyẹnmhẹn bhi Ighegheghe! dagbare, ibhio mhan ne gbẹn ọne ebe da wo manman nan erọnmhọn ji Osẹnobulua nin ọle rẹkpa ele. Ele da yẹ guanọ otọ ẹmhọn nan gbẹn bhi ẹkẹ ọle nọnsẹn. Nin uwẹ rẹ sabọ noo ọne ebe nan nọnsẹn sade uwẹ man ẹbho Baibo, lu ene emhin nan:
Ọkuẹsẹ uwẹ dọ man ọria Baibo
-
1. Muegbe nọnsẹn. Beji uwẹ ha rẹ ha muegbe, ria ẹmhọn idia nin ọria nin uwẹ man ọlẹn Baibo ye, emhin nin ọle rẹọ i, bi emhin nọn khẹke nin ọle lẹn. Ria ẹmhọn emhin ne ha sabọ nọghọ ọle rẹ lẹn otọle, la re obọ rẹkhan. Yẹ ria eria nyan ebi emhin ne ribhi obọ natiọle “Fẹ Ene Emhin Nan Ghe” ha rẹ sabọ rẹkpa ọle yẹ. Ria ẹmhọn ije kẹkẹ nọn khẹke nin uwẹ da noo ene emhin ne ribhi ọne obọle sade ibha luẹ Baibo.
Ẹghe nin uwẹ ha rẹ ha man ọne ọria Baibo
-
2. Ahamiẹn ọ yẹẹ ọne ọria nin uwẹ man ọlẹn Baibo, nan erọnmhọn rẹ munhẹn, uwẹ ha yẹ nan erọnmhọn rẹ kpẹn ọlẹn.
-
3. Hẹi ha talọ gbe. Zilo nyan emhin nan gbẹn ọbhi eji bha luẹ, uwẹ ha re otọ nin ọne ọria rẹ ha ta ebe ri ọle bhi ọkhọle.
-
4. Ahamiẹn ibha ho nin bha mun obọ ọsọgbọn hẹn bhi ọne ebe, tie ẹmhọn nọn ribhi eji a tiọle “Ebi uwẹ ha luẹ bhọ,” uwẹ ha yẹ re unun na bhi uhọnmhọn-ọta eso ne ribhi ọne obọle.
-
5 Ahamiẹn ibha zilo nyan iluẹmhin ne ribhi obọle ọkpa fo, uwẹ ha noo inọnta ne rẹkhan ọne obọle (Ebi A Luẹ Bhi Obọ . . . ) rẹ rẹkpa ọne ọria rẹ ye ebi ọle luẹ bhi ọne obọle re.
-
6. Ebi uwẹ ha lu sade bha luẹ ene iluẹmhin kẹkẹ:
-
Tie ene uduọle kẹkẹ.
-
Tie Baibo rebhe nan yọle nan tie.
-
Tie Baibo nekẹle nin uwẹ riale ọkhẹke nin bha tie.
-
Ghe ividio rebhe nan yọle nin bha ghe (sade uwẹ mhọn ele).
-
Nọọn inọnta ne ribhi ọne iluẹmhin.
-
Taman ọne ọria nin ọle fẹ ene ifoto ne ribhi obọ natiọle “Manman Lẹn Otọle Nọnsẹn,” ọle ha yẹ taman ẹn ebi ọle luẹ bhi ene ifoto.
-
Noo ẹmhọn nan gbẹn ọbhi obọ natiọle “Lu Ọnan” rẹ rẹkpa ọne ọria rẹ ha lu re alo. Taman ọlẹn nin ọle dọnmhegbe rẹ lu emhin nan gbẹn ọbhi enin, la nin ọle tobọle gbẹn emhin nin ọle ho nin ọle lu. Ọle bhọ sabọ rẹ lu eveva.
-
Nọọn ọne ọria ọnọn manman ti ọle bhọ nẹ bhi ebe la ividio nin ọle fẹghe bhi obọ natiọle “Fẹ Ene Emhin Nan Ghe,” bhi ẹghe nin ọle rẹ ha muegbe ọne iluẹmhin.
-
Dọnmhegbe nin bha rẹ luẹ iluẹmhin ọkpa sotọ bhi ẹghe nọn hi ki rẹ khin nin bha rẹ zilo.
-
Sade uwẹ man ọne ọria Baibo fo
-
7. Sẹyẹ ha ria ẹmhọn ọne ọria. Bhii Jehova nin ọle rẹkpa ọle rẹ ha lu re alo, ọle ha yẹ re ẹwanlẹn nin uwẹ rẹ ha rẹkpa ọle.
