BYA KULUMBULULA 3
Bya Kufunjisha Bantu Baibolo Kwingijisha Buku wa Mukekala Myaka ne Myaka!
Balongo balombelepo bingi kwi Yehoba ne kulangulukapo pa bishinka bya kubika mu uno buku wa Mukekala Myaka ne Myaka! Pa kuba’mba mumwenemo byavula mu uno buku, londelai mashinda aji panshipo aamba pa bya kufunjisha bantu Baibolo.
Saka mukyangye kuya na kufunjisha muntu Baibolo
-
1. Mwafwainwa kunengezha bulongo. Pa kunengezha mwafwainwa kulanguluka pa biji yewo muntu, byo aitabilamo ne bintu byafwainwa kumukwasha kuyilako palutwe. Langulukaipo pa bishinka bimo byafwainwa kumukatazha kumvwisha ne bya kwibingijisha. Langulukaipo pa biji mu kipungu kya kuba’mba “Kebai Bishinka Bikwabo” byafwainwa kukwasha ye mufunjisha Baibolo. Kabiji yukai bya kwibingijisha kimye kyo mubena kumufunjisha.
Pa kufunjisha muntu
-
2. Lombai pa kutendeka kumufunjisha ne pa kupwisha inge kya kuba waswa.
-
3. Kange mulolobwelenga pa kufunjisha ne. Anweba taitu muchima pa bishinka byo banengezha kwapwa. Kabiji tundaikai ye mufunjisha Baibolo kwambangapo.
-
4. Inge mwatendeka kipungu kya katataka tangai byambo paimena lufunjisho ne mitwe imo iji mu kyo kyo kipungu.
-
5. Inge ke mupwishe kipungu kikatampe, ingijishai kipungu kya kupitulukamo kukwasha ye mufunjisha Baibolo kuvuluka bukine bo afunda.
-
6. Pa kufunda na ye mufunjisha Baibolo pa mutwe yense uji mu buku ubai bino:
-
Anweba, ye mubena kufunjisha Baibolo nangwa ye mubena kwingila nanji wafwainwa kutanga kinembelo.
-
Tangai binembelo byonse byo baamba’mba “Tangai.”
-
Mwakonsha ne kutanga binembelotu bikwabo bijimo.
-
Tambishai mavidyo onse o banembapo’mba “Tambai” (inge mwakonsha).
-
Ipuzhai ye mufunjisha Baibolo mepuzho onse aji mu yewo mutwe.
-
Buulai ye mufunjisha Baibolo kutala pa bipikichala biji mu kipungu kya kuba’mba “Funjilaipo Bikwabo.” Kabiji mwambilai ambepo bintu byo afunjilako.
-
Ingijishai kakitenguluzha ka kuba’mba “Ubai Bino” kutundaika ye mufunjisha Baibolo kuyuka inge ubena kuyilako palutwe nangwa ne. Mutundaikai kwingijishanga kipungu kya ubai bino kwibikila bikonkwanyi bikwabo.
-
Ipuzhai ye mufunjisha Baibolo inge watemenwe bibaaba bimo nangwa mavidyo aji mu kipungu kya kuba’mba “Kebai Bishinka Bikwabo” kimye kyo anengezhenga yewo mutwe.
-
Pa kufunjisha muntu Baibolo pwishainga mutwe yense.
-
Inge mwapwisha kumufunjisha
-
7. Twajijilai kulanguluka pa muntu ye mufunjisha Baibolo. Lombai kwi Yehoba kuba’mba akwashe muntu ye mufunjisha Baibolo kukosa mu lwitabilo ne kwimupa maana a kuyuka mwa kumukwashisha.
