IVYEWO NA VINJI PA C
Ivyakutungulula Amasambililo mwi Buku lya Ungikala Amanda Pe!
Pa kuti ibuku lya kuti Ungikala Amanda Pe! lifume, awanawitu wawombesizye nkaninye. Wavwambilizizye ivyewo swinya wapepezilepo sana pa kuti wamanye vino vizipizile ukuwamo. Acino pa kuti mwayitopwa ukuwomvya lyo-o ibuku pano mukutungulula amasambililo ye Baibolo, muwawomvya ivisinka vino vyakonkapo.
Pano mutani muye kwi sambililo
-
1. Muwapekanya sana. Pano mukupekanya, mwakwelenganya mumwi muno umusambi angalondeka ukumwavwa, vino akupitamo na vino wazumilamo. Mwakwelenganizizya lyankani pa visinka vino vingaya vimutalile ukwivwicisya nanti ukuwomvya. Mwakwelenganya na pe vino ivisinka vyo vyawa mu luwali lwa kuti “Manyilapo na Vinji” vingavwa umusambi winu. Swinya mwayipekanya nu kuviwomvya apali ponsinye pano mwalola ukuti mungaviwomvya po mukusambilila.
Pano mukusambilila
-
2. Muwapepa pa kutalika na pa kulecelezya nga cakuti umusambi wazumila ukuti muwapepa.
-
3. Mutalandapo nkani. Cinji acakuti mutalanda pa malyasi yano yasi mwisambililo lino mukusambililapo swinya muwaleka umusambi awalanda vino akuyivwa.
-
4. Nga mwatalika iciputulwa icipya, mwawazya amazwi yano yakawa pano pa kati mwe co-o iciputulwa swinya mwalandako ni mitwe yimwi yino mulisambilila mwe coconye iciputulwa.
-
5. Nga mwamala iciputulwa, mwawomvya amawuzyo ya kupitulukamo mwe coconye iciputulwa pa kwavwa umusambi ukwizuka vino wasambilizile.
-
6. Pano mukusambilila cila lisambililo nu musambi:
-
Mwawazya ama paragrafu yakutalicilapo.
-
Mwawazya amawaliko yonsinye yano watili “Wazyani.”
-
Mwawazya amawaliko na yanji yano yalimo nga cakuti mwalola ukuti mungayawomvya.
-
Muwatamba ama vidyo yonsinye yano watili “Tambani” (nga cakuti mukweti).
-
Mwawuzya umusambi amawuzyo yonsinye.
-
Mwanena umusambi ukuti alolecesye icikope cino cili mu luwali lwa kuti “Sambilila Ivicile pa-a” nu kulandapo.
-
Mwawomvya akambokosi ka kuti “Yelezya Ukucita wo-o” pa kwavwa umusambi ukulola vino akulunduluka. Muwamuwomelezya ukucita vino wamunenile pa kupanga vinji vino angawombelapo.
-
Mwakolowozya umusambi nga cakuti wazanilemo ivizima ivili vyonsi mu vipande nanti ama vidyo mu luwali lwa kuti “Sambilila Ivicile pa-a” pano wapekanyanga.
-
Mwakwelezya ukumala isambililo lino mulipo pa mukuwonganye.
-
Pa nsizi yisambililo
-
7. Muwakwelenganya pa musambi. Mwapepa kwe Yehova ukuti ayavwe umusambi ukuficilisya vino akulonda ukuwombelapo nu kuti awamipa amano pa kuti mu manye vino mungamwavwa.
