Xiinxallissinara albaanni

1. 1. Seekkitine qixxaabbe. Qixxaabbinanni woyite, rosaanchiˈnera hasiisannore, heeshshosi garanna mayyee ammanannoro hedde. Huwatate woy loosu aana hosiisate roore qarrisasira dandaanno roso hedate woˈnaalle. “Egenno Lexxi” yaanno gafi rosaanchiˈnera kaaˈlasira dandaanno gara hedde; qoleno xiinxallissinanni woyite hasiisiro horoonsiˈra dandiitinanni gede qixxaabbe.

Xiinxallote yannara

1. 2. Rosaanchu gimbi yaa hoogi geeshsha, huuccattotenni hanaffine huuccattonni gumulle.

2. 3. Lowore coyidhinannikki gede qorophe. Shiqino roso illachishshe; hattono rosaanchu hedosi coyiˈranno gede asse.

3. 4. Haaro gafa hanaffinanni woyite, qara hedo yaannoha nabbabbe; hattono rosu birxichuwa giddonni mite luphi asse.

4. 5. Gafa woˈma guddinanni woyite, rosaanchu rosino halaale qaaganno gede kaaˈlate gafu xaphishsha horoonsidhe.

5. 6. Mitto mittonka roso xiinxallissinanni woyite:

   1. Borro nabbabbe.

   2. “Nabbawi” yaanno biddishsha worroonni qummeeshshuwa baalanta nabbabbe.

   3. Hasiisannoha ikkiro, hakko noota wole qummeeshshuwano nabbabbe.

   4. “Laˈe” yinoonni viidiyubba baala laˈe (nooˈneha ikkiro).

   5. Mitte mittenta xaˈmo rosaancho xaˈme.

   6. Rosaanchu “Ledde Xiinxalli” yaanno gafira noo misilla laˈˈanno gede koyissine, xawisanno gede xaˈme.

   7. Rosaanchu ayyaanaamittete lophosi noo deerra layiˈranno gede kaaˈlate, “Mixo” yaanno gafa horoonsidhe. Lawishsha ikkitara worroonni mixo wonshiˈrate sharramanno gede, woy wole mixo fushshiˈranno gede woy lamenta harunsanno gede jawaachisha dandiitinanni.

   8. Rosaanchu xiinxallote qixxaawi woyite, “Egenno Lexxi” yaanno gafira noo birxichuwa woy viidiyubba giddo roore baxinoti hiitteetiro xaˈme.

   9. Mitto roso mitte higgine xiinxallissine gudate woˈnaalle.

Xiinxallote gedensaanni

1. 7. Rosaanchiˈne daafira heda agurtinoonte. Assannore Yihowa maassiˈrannosi gedenna iso kaaˈlitinanni gara affinanni gede kiˈnerano hayyo aannoˈne gede huuccidhe.