ṰHUMETSHEDZO C
U Fara Pfunzo Ya Bivhili Ni Tshi Shumisa Ḓiphiṋeni Nga Vhutshilo Lwa Tshoṱhe!
Vhahashu vho rabela nga maanḓa na u humbulisisa nga vhuronwane uri ndi zwifhio zwithu zwine zwa tea u dzheniswa kha bugu Ḓiphiṋeni Nga Vhutshilo Lwa Tshoṱhe! U itela u shumisa yeneyo khandiso nga nḓila i vhuyedzaho musi ni tshi khou fara pfunzo dza Bivhili, lingedzani zwi tevhelaho.
Ni sa athu thoma ngudo
-
1. Lugiselelani nga vhuronwane. Musi ni tshi khou lugiselela, lingedzani u humbula nga ha ṱhoḓea, vhuimo na zwine mugudiswa waṋu a zwi tenda. Lingedzani u vhona mbuno dzine dza ḓo mu konḓela u dzi pfesesa na u dzi shumisa. Ṱolisisani uri mafhungo a re kha tshipiḓa “Wanani Zwo Engedzeaho” a nga thusa hani mugudiswa waṋu nahone ni lugele u a shumisa arali zwi tshi ṱoḓea musi no fara ngudo.
Musi ni tshi khou guda
-
2. Thomani na u phetha ngudo nga thabelo, arali mugudiswa waṋu a si na thaidzo nazwo.
-
3. Ni songo ambesa. Shumisani fhedzi mafhungo a re kha ngudo nahone ni tendele mugudiswa uri a ambe o vhofholowa.
-
4. Musi ni tshi khou thoma u guda tshiṅwe tshipiḓa, vhalani tshipikwa tsha tshenetsho tshipiḓa, ni ite na u bula zwiṅwe zwiṱoho zwi re kha dzenedzo ngudo.
-
5. Musi ni tshi fhedza u guda tshiṅwe tshipiḓa, vusulusani tshenetsho tshipiḓa u itela u thusa mugudiswa waṋu uri a humbule zwithu zwa ndeme zwe a zwi guda.
-
6. Musi ni tshi khou guda ngudo iṅwe na iṅwe na mugudiswa waṋu:
-
Vhalani mafhungo a re hone.
-
Vhalani vese dzoṱhe dzo ṅwaliwaho u pfi “Vhalani.”
-
Vhalani dziṅwe vese dzi re kha yeneyo ngudo arali zwi tshi ṱoḓea.
-
Ṱalelani vidio dzoṱhe dzo ṅwaliwaho u pfi “Ṱalelani” (arali dzi hone nga luambo lwaṋu).
-
Vhudzisani mugudiswa mbudziso dzoṱhe.
-
Humbelani mugudiswa uri a sedze zwifanyiso zwi re kha tshipiḓa “Gudani Zwo Engedzeaho” nahone ni mu humbele uri a zwi ṱalutshedze.
-
Shumisani bogisi “Lingedzani Hezwi” u itela u thusa mugudiswa waṋu uri a vhone mvelaphanḓa ine a khou i ita. Mu ṱuṱuwedzeni uri a ḓivhetshele tshipikwa tsho ṅwalwaho buguni kana a ḓivhetshele zwiṅwe zwipikwa kana ni mu humbele uri a zwi lingedze vhuvhili hazwo.
-
Vhudzisani mugudiswa waṋu uri ndi thero dzifhio kana vidio dzifhio dze a dzi takalela kha tshipiḓa “Wanani Zwo Engedzeaho” musi a tshi khou lugiselela ngudo.
-
Lingedzani u fhedza ngudo yoṱhe nga luthihi.
-
Musi no no fhedza u guda
-
7. Bvelani phanḓa ni tshi humbula nga ha mugudiswa waṋu. Humbelani Yehova uri a fhaṱutshedze mvelaphanḓa ine ya khou itwa nga mugudiswa waṋu nahone ni mu humbele uri a ni ṋee vhuṱali ha u ḓivha uri ni nga mu thusa hani.
