FAKAMAHINO 3
Te Faʼahiga Fakaʼaogaʼi ʼo Te Tohi Ako Ke Ke Fiafia ʼo Heʼe Gata
ʼE tokoni mai te tohi Ke Ke Fiafia ʼo Heʼe Gata ke lahi age tatatou fakakaukau, mo fai he ʼu fekumi pea mo faikole. ʼE tokoni atu anai te faʼahiga fai ʼae ʼe hoa mai ke ke fakahoko lelei he ako Tohi-Tapu.
ʼI muʼa ʼo te ako
-
1. Ke ke teuteu lelei. Fakakaukauʼi te ʼu meʼa ʼae ʼe ʼaoga ki tau ako, mo tona aluʼaga pea mo tana faʼahiga fakakaukau. Vakaʼi te ʼu faʼahi ʼae ʼe faigataʼa tana mahino ki ai peʼe maʼuliʼi. Fakasiosio te ʼu meʼa gaue ʼae ʼe talanoa ki ai “Te Tahi ʼu Manatu” ʼe ʼaoga tafito anai ki ai, pea ʼe feala tau fakaʼaogaʼi lolotoga te ako.
Lolotoga te ako
-
2. Kamata pea ke fakaʼosi ʼaki he faikole, mo kapau foki ʼe lotolelei ki ai te ako.
-
3. ʼAua naʼa lahi fau tau palalau. ʼE lelei age ke ke talanoa tafito pe ki te ʼu manatu ʼo te kapite pea ke tuku te ako ke palalau mo fakaha tana manatu.
-
4. Ka ke kamata he koga ʼi te ʼu koga ʼe fa, lau te manatu tafito pea ke vakaʼi mo tau ako te ʼu kupu tafito ʼo ʼihi kapite.
-
5. Ka ʼosi takolua fai he koga ʼo te tohi, vakaʼi te ʼu fehuʼi fakamanatu ʼo te koga ʼaia moʼo tokoni ki ai pe kei ina manatuʼi te ʼu faʼahi neʼe ina ako.
-
6. Ka fai he kapite:
-
Lau peʼe kole ki he tahi ke ina lau te ʼu palakalafe.
-
Lau peʼe kole ki he tahi ke ina lau te ʼu vaega ʼae ʼe tuʼu ai “Lau.”
-
Kapau ʼe ʼaoga, lau ʼihi vaega ʼe tuʼu ai.
-
Kapau ʼe ke maʼu, pea ke fakahaʼele te ʼu ʼata viteo fuli ʼae ʼi te koga “Ta Fakaloloto.”
-
Faipalalau mo tau ako ki te ʼu fehuʼi fuli.
-
Vakaʼi te ʼu pāki ʼae ʼi te koga “Ta Fakaloloto,” pea kole age ki tau ako ke ina fakamatala te meʼa ʼae ʼe sio ki ai.
-
Fakaʼaogaʼi lelei te manatu ʼaeni “Taku Fakatuʼutuʼu.” ʼE tokoni anai ki tau ako ke ina vakaʼi pe ʼe tuputupu. ʼE feala tau fakalotomalohiʼi ia ia ke ina fai te fakatuʼutuʼu ʼae ʼe tuʼu ai peʼe ko he tahi age, peʼe ina fai lualua.
-
Fehuʼi ki tau ako pe ko te alatike peʼe ʼata viteo fea ʼi te koga “Te Tahi ʼu Manatu” neʼe ina leleiʼia ʼi tana teuteuʼi tana ako.
-
Kapau ʼe feala, faiga ke fai te kapite fuli.
-
Hili te ako
-
7. Ke ke manatuʼi tuʼumaʼu tau ako. Kole kia Sehova ke ina tapuakiʼi ʼana faiga. Toe kole kia te ia ke ina foaki atu te poto pea ʼe tokoni atu anai ke ke liliu ko he faiako lelei.