UTIAʼAL XAKʼALXOOK 3
¿Bix jeʼel a tsʼáaik xook yéetel le libro ¡Disfrutart le kuxtaloʼ!?
Le sukuʼunoʼoboʼ sen orarnajoʼob yéetel tu tukultoʼob tubeel baʼaxoʼob ken u táakbesoʼob ichil le libro ¡Disfrutart le kuxtaloʼ! Le oʼolal utiaʼal ka meyajnaktoʼon tubeel le kéen k-tsʼáa xook tiʼ wa máaxeʼ maʼalob ka k-beet jeʼex kun tsolbiltoʼon beoraaʼ.
Antes a tsʼáaik xook
-
1. Preparartaba tubeel. Tuukulnen tiʼ baʼax kʼaʼabéet tiʼ le j-xoknáaloʼ, tiʼ baʼax táan u aktáantik yéetel tiʼ baʼax ku creertik. Tuukulnen tiʼ baʼaxoʼob jeʼel u chan difíciltaltiʼ u naʼatik wa u tsʼáaik ichil u kuxtaleʼ. Xakʼalt le información yéetel le videoʼob ku taasik le jaats «Kan u maasil», beyoʼ wa ku kʼaʼabéettaleʼ yaan u páajtal u meyajtech utiaʼal a wáantik a j-xoknáal le táan a xookeʼexoʼ.
Le táan a tsʼáaik xookoʼ
-
2. Wa uts tu tʼaan le j-xoknáaloʼ beet junpʼéel oración utiaʼal u káajal bey xan utiaʼal u tsʼoʼokol le xookoʼ.
-
3. Maʼ a tsolik yaʼab baʼaloʼob, chéen tsol le baʼax ku taasik le xookoʼ, yéetel chaʼa tiʼ a j-xoknáal u yaʼalik bix tu naʼatil.
-
4. Le librooʼ yaan kanpʼéel jaatsoʼob tiʼ, kéen a káajs junpʼéel jaatseʼ xok le xóotʼ «Tiʼ baʼax ku tʼaan», yéetel aʼal u kʼaabaʼ jujunpʼéel xookoʼob.
-
5. Kéen tsʼoʼokok le xookoʼob ku taasik le jaatsoʼ meyajnaktech le kʼáatchiʼob yaan teʼ «Baʼax ta kanaj» utiaʼal u kʼaʼajsik le j-xoknáal le baʼaxoʼob tu kanoʼ.
-
6. Le kéen a xakʼalt cada junpʼéel xook yéetel a j-xoknáaleʼ:
-
1) Múul xokeʼex le párrafos ku taasik le yáax jaats tiʼ le xookoʼ.
-
2) Xokeʼex tuláakal le tekstoʼob ku yaʼalik «Xok».
-
3) Xokeʼex le uláakʼ tekstoʼob wa ku kʼaʼabéettaloʼ.
-
4) Ilawil a chaʼantikeʼex tuláakal le videoʼob ku yaʼalik «Chaʼanteʼex le videooʼ» (wa yaanteʼexoʼ).
-
5) Beet tuláakal le kʼáatchiʼob ku taasik le xookoʼ.
-
6) Tsikbalt yéetel a j-xoknáal le fotoʼob yéetel le dibujoʼob ku taasik le jaats «Utiaʼal a maas naʼatik».
-
7) Utiaʼal u yilik le j-xoknáal bukaʼaj tsʼoʼok u progresaroʼ meyajnaktech le cuadro «Beet lelaʼ». Áant utiaʼal ka u tsʼáa le meta ku chíikpajal teʼ cuadrooʼ wa uláakʼ meta.
-
8) Kʼáat tiʼ le j-xoknáal máakalmáak tiʼ le xookoʼob wa tiʼ le videoʼob ku taasik le jaats «Kan u maasil» maas jatsʼuts tu yilil le táan u prepararkubaoʼ.
-
9) Cada ken xooknakeʼexeʼ ilawil a tsʼoʼoksikeʼex junpʼéel xook.
-
Le kéen tsʼoʼokok le xookoʼ
-
7. Seguernak a tuukul tiʼ le j-xoknáaloʼ. Kʼáat tiʼ Jéeoba ka u yáant progresar, kʼáat xan tiʼ ka u tsʼáatech u naʼatil utiaʼal a wilik bix jeʼel a wáantikeʼ.
