KOYDHOM. An koydhom neʼets ti tólmiychik. Ka lej otsʼówiy jawaʼ ti uchaʼ tin kwéntaj an laktem axi a éjtowal ka eyendhaʼ, tam kit beláts altáj ban local ani tam kit ulits kʼal an carro.

JITAʼ NEʼETS KA PUJAN. Max yab ka uluwat kʼeʼat jantʼoj, neʼets ka jilan takudh an laktemchik abal axi neʼets ka pujan. Axi neʼets ka pujan kwaʼal ka ketlej ti an laktem axi in tomnál sábado dhajuw okʼxidh ka bináj an tʼilomtaláb. Axi neʼets ka pujan kwaʼal kin chiʼdhaʼ in tóltomil axi in tomnál.

TUMÍN AXI A BINÁL KʼAL A KULBÉTAL. Pakwamej lej yan abal tatáʼ ka koʼoy juʼtáj kit ketlej, an sonido ani an video ani kʼeʼat más jantʼoj abal ki ejtow ki koʼoy axéʼ xi púlik tamkuntaláb ani antsanáʼ ku utey más kʼal a Jehová. An tumín axi a binál, jats axi i eyendhál abal ki jálbiy jawaʼ u pakwnal ani jayej abal ki tólmiy an olnomtaláb tin puwél an tsabál. Tin tonídh an local waʼats i cajas juʼtáj a ejtowal ka jolow an tumín axi a leʼ ka bínaʼ. Jayej a éjtowal ka bínaʼ i donaciones ti Internet ti donate.pr418.com. I lej kʼakʼnál jawaʼ a binamalchik. An Kwenél i Ókʼnom in leʼ ti kʼakʼnanchij kom a binálchik kʼal a kulbétal.

TOLMIXTALÁB MAX KI YAWʼLÁTS. Ka tʼilaʼ abal axéʼ xi departamento expidh pel abal jitaʼ in lej yéjenchal i tolmixtaláb.

MAX A KʼIBAʼ JANTʼOJ. Max ka elaʼ jantʼoj axi yab a kʼál, ka neʼdhaʼ juʼtáj tu dhayáb jawaʼ kʼibnenek. Max a kʼibámal jantʼoj, kit kʼalej al axéʼ xi departamento. Jayej kwaʼal ka neʼdhaʼ al axéʼ xi departamento, an tsakamchik axi kʼwajat kʼibenek. Abal yab ti tʼeʼpindhaʼ jantʼoj, ka lej beletnaʼ a tsakámil ani ka koʼoy etsʼey utat kʼal tatáʼ.

LAKTEM. Yab ka jilaʼ jantʼoj ban laktem axi yab neʼets ka eyendhaʼ. Ka tʼilaʼ abal expidh a éjtowal ka tákuy i laktem abal a yanél, abal axi neʼets kʼal tatáʼ al an carro o axi a exóbchal kʼal an Biblia abal axi kʼeʼat jayej kin bajuw i laktem.

JITAʼ IN LEʼ TI TOLMIX. Max a leʼ ti tólmix kʼal an tʼojláb axi ti púlik tamkuntaláb, kit kʼalej al an departamento Olchixtaláb ani Jitaʼ in leʼ ti tolmix.