BANN KONTRIBISION Pou sa lasanble-la, finn fer bann gro depans pou ki kapav ena bann sez, lekipman sono ek video, ek bann lezot laranzman ki pou fer nou profit bien sa lasanble-la ek ed nou pou vinn pli pros ar Zeova. Gras-a ou bann kontribision volonter, kapav pey sa bann depans-la ek osi soutenir travay lansegnman ki pe fer dan lemond antie. Inpe partou dan Lasal Lasanble, ou pou trouv bann bwat kontribision. Ou kapav osi fer bann kontribision online lor donate.pr418.com. Nou pou bien apresie ou bann kontribision. Komite Santral anvi remersie ou pou zenerozite ki ou montre pou soutenir bann laktivite ki ena enn lien ar Rwayom Bondie.

BANN SEZ Silvouple, ena konsiderasion pou lezot. Pa bliye ki ou kapav rezerv bann sez zis pou ou fami pros, bann ki pe vwayaz ansam avek ou, bann ki res dan mem lakaz ki ou, ek bann ki pe etidie Labib avek ou. Silvouple, pa met ou bann zafer personel lor bann sez ki ou pa pe rezerve.

BATEM Mem si pena okenn instriksion presi, bann sez ki dan premie ranze devan lestrad pou rezerve pou bann dimounn ki pou pran batem. Bann ki pou pran batem bizin fini pran zot plas avan ki diskour batem koumanse Samdi gramatin. Sakenn bizin amenn enn serviet ek met enn mayo-de-bin ki pa indesan.

LAKEY Bann frer ki dan servis lakey zot la pou ed ou. Silvouple, korper avek zot ek swiv bann instriksion ki zot done konsernan parking, rezervasion bann sez, direksion ki bizin ale, ek lezot instriksion ankor.

OBZE TROUVE Si ou finn ramas enn kitsoz ki pa pou ou, ou kapav amenn li dan servis Obze Trouve. Si ou finn perdi kitsoz, ou kapav al ver sa servis-la pou gete si ou retrouv seki ou finn perdi. Si enn zanfan pa pe trouv so paran, ou kapav amenn li ar bann frer ki dan sa servis-la. Selman, pou evit bann konplikasion, silvouple, vey bien ou bann zanfan ek fer zot res avek ou.

PREMIE SEKOUR Silvouple, rapel ki sa servis-la se pou bann irzans selman.

VOLONTER Si ou anvi donn enn koudme dan bann travay ki ena pou sa lasanble-la, silvouple donn ou nom ar servis Volonter.