Ri rtzjol nkiyaʼ ri yetzjon rqʼatbʼäl tzij Dios

Xtamaj achkë kʼo chë nuʼän chpan rkʼaslemal

JESÚS xuʼij chë rtaman kiwäch rtzeqelbʼëy (Juan 10:14). Si jun winäq ütz ran chqä ma nqä ta chwäch chʼaʼoj y nrajoʼ chë pa rbʼeyal nbʼan che rä jontir, xtrajoʼ xttok rtzeqelbʼëy Jesús. Ri winäq riʼ xtnaʼ chë kʼo rma kʼäs achiʼel xbʼanatäj rkʼë jun ixöq aj Bélgica. Ryä nutzjoj ri xbʼanatäj rkʼë:

«Taq ri testigos de Jehová xkikokaj rchiʼ wachoch, kan majun ütz ta nnaʼon, kan nchʼobʼon wä nkamsaj wiʼ. Kan xqä chi nwäch taq xkitzjoj chwä achkë rbʼanik xtsolotäj jontir ri kʼayewal, ye kʼa ma xqä ta chi nwäch chë yë Dios xtbʼanö jontir riʼ. Rïn ocho jnaʼ ma yïn bʼenäq ta wä chik pan iglesia, rma ma nqä ta chi nwäch chë ri winäq xa kaʼiʼ kipaläj nkiʼän. Ye kʼa xqʼax chi nwäch chë ri testigos de Jehová yë ri kantzij taq naʼoj najin nkikʼüt chi nwäch. Chqä xqʼax chi nwäch chë tapeʼ xa bʼa achkë najin nqʼaxaj, nkʼatzin Dios pa nkʼaslemal.

Ye kʼa xa xuʼ jojun mul xenwïl ri Testigos. Kan itzel xinnaʼ rma riʼ. Rïn ntäj wä kaʼiʼ cajas sikʼ ronojel qʼij, chqä xinchäp rtjik drogas. Rma nwajoʼ wä yitzjon rkʼë nmamaʼ ri kamnäq chik, xinchäp rbʼanik itzinïk. ¡Ya riʼ kan majun ütz ta xkʼäm pä pa nwiʼ! Chaqʼaʼ taq nyonïl wä yïn kʼo, yinkinäq wä ri demonios. Ya riʼ kan pan ikʼ xbʼanatäj. Chaqʼaʼ kowan wä nxiʼij wiʼ taq nyonïl yïn kʼo.

Kʼo jun qʼij ri xinebʼiyaj jbʼaʼ, ma xibʼä ta chpan ri bʼey ri yibʼä ronojel mul. Rma riʼ xinapon akuchï najin nbʼan wä jun mamaʼ jay. Kan xel nkʼuʼx taq xintzʼët chë ye kʼïy winäq najin yesamäj. Taq xijelun apü kikʼë, xintzʼët chë ye wä ri testigos de Jehová ri najin nkiyäk jun Salón del Reino. Xnatäj pä chwä taq ri testigos de Jehová yeʼapon wä chinchʼbʼexik, y xinquʼ chë jaʼäl ta riʼ xa ta jontir winäq nkikʼwaj jun kʼaslemal achiʼel ryeʼ.

Kan nwajoʼ wä chë ryeʼ yeʼapon chik jmul chwachoch. Rma riʼ, xitzjon kikʼë jojun ri najin wä yesamäj chyakik ri Salón. Xichʼö rkʼë Dios, y taq xqʼax diez qʼij, ri publicador ri naʼäy mul xitzjon rkʼë xapon chik jmul chwachoch. Ryä xkʼutuj chwä we nwajoʼ ntjoj chik jmul wiʼ chrij le Biblia, y xinwajoʼ chwäch. Ryä chqä xuʼij chwä chë kinapon pa Salón del Reino, y xinbʼij che rä chë xkinapon. ¡Majun bʼëy ntzʼeton ta ri xintzʼët chriʼ! Kan kʼïy chik tiempo ye nkanun ri winäq ri kiʼ kikʼuʼx chqä nkajoʼ kiʼ chkiwäch, ye kʼa komä xenwïl.

Kan chpan ri qʼij riʼ kʼa komä, ronojel mul yïn bʼenäq pa moloj. Taq xqʼax oxiʼ semanas, xinyaʼ qa rtjik sikʼ, xinkʼäq äl ri libros rchë itz chqä xinkʼäq äl ri discos ri kʼo itzel taq bʼix chkipan. Taq xinbʼän riʼ, ma xinkinäq ta chik ri demonios. Rïn chqä xinchäp kisamajxik ri naʼoj ye kʼo chpan le Biblia. Oxiʼ ikʼ chrij riʼ, xinchäp rtzjoxik le Biblia. Taq xqʼax seis ikʼ, xiqasäx pa yaʼ; y kaʼiʼ q’ij chrij riʼ, xinchäp äl nprecursorado auxiliar.

Ntyoxij che rä Jehová rma jontir ri rbʼanon pa nwiʼ. Komä nnaʼ chë kʼo rma yïn kʼäs. Rïn nnaʼon chë rbʼiʼ Jehová kan achiʼel jun torre ri akuchï natoʼ wä awiʼ (Proverbios 18:10). Rïn nnaʼ achiʼel xnaʼ ri salmista taq xtzʼibʼaj reʼ chpan ri Salmo 84:10: ‹¡Rma ri yijeʼ jun qʼij pan awachoch, más ütz chwäch ri yijeʼ mil qʼij jukʼan chik! Rïn nwajoʼ yijeʼ chuchiʼ rachoch nDios chwäch ri yijeʼ pa kachoch ri yebʼanö itzelal›».

Re ixöq reʼ xqʼalajin chwäch chë kʼo rma kʼäs. Y xa bʼa achkë winäq ri nukanuj Jehová xtnaʼ ya riʼ chqä.