Jiñi muʼ bʌ i subob chaʼan i Yumʌntel Dios miʼ yʌlob

Tsiʼ taja jiñi i sujmlel i cuxtʌlel

JESÚS miʼ yʌl chaʼan i cʌñʌyʌch jiñi i tiñʌmeʼ tac (Juan 10:14). Mi juntiquil lac piʼʌl utsʌch i pusicʼal, maʼañic miʼ mulan jontolil yicʼot miʼ mulan chaʼan miʼ mejlel chuqui toj, mi caj i mulan i ñochtan jiñi i wiñicob Jesús. Mi caj i tajben i sujmlel jiñi i cuxtʌlel cheʼ bajcheʼ tsaʼ ujti tiʼ tojlel juntiquil xʼixic chʼoyol bʌ ti Bélgica. Ili jiñʌch tsaʼ bʌ i yʌlʌ:

«Cheʼ bʌ jiñi i testigojob Jehová tsaʼ cʼotiyob ti cotot, wen chʼijyemon i com c tsʌnsan c bʌ. Tsaʼ c mulaj cheʼ bʌ tiʼ subeyoñob chaʼan jiñi wocol tac mi caj i lajmel, pero maʼañic tsaʼ c mulaj cheʼ muʼ bʌ caj i tojʼesan jiñi wocol jiñʌch Dios. Añix 8 jab maʼañic mi cajñel ti iglesia, come maʼañic mic mulan chuqui muʼ bʌ i melob. Pero tsaʼ cʼoti j cʌn chaʼan i sujmlelʌch jiñi tsaʼ bʌ i subeyoñob jiñi i testigojob Jehová, i tsaʼ j cʌñʌ chaʼan maʼañic mi lac mejlel ti ajñel mi maʼañic la quicʼotic Dios».

«Ti ñaxan jiñi i testigojob Jehová miʼ julaʼtañoñob, ti wiʼil maʼañix tsaʼ caji cubiñob tiʼ tojlel. Wen chʼijyem tsaʼ cubi c bʌ. Ti jumpʼejl qʼuin mic ñucʼ chaʼpʼejl caja cigarro, i cheʼ jaʼel tsaʼ caji j cʼʌn droga tac. Come com c pejcan jiñi c tatuch tsaʼix bʌ chʌmi tsaʼ caji c mulan i chaʼan bʌ espiritismo. ¡Wen bʌbʌqʼuen jax chuqui tsaʼ caji c ñusan! Ti jiñi acʼʌlel mi cubin chaʼan jiñi xibajob miʼ cʼotelob chaʼan miʼ ticʼlañoñob. Wen cabʌlʌch uw cheʼ tsaʼ c ñusa bajcheʼ jiñi, i jujumpʼejl acʼʌlel maʼañic mic mulan cheʼ c bajñel jach».

«Ti jumpʼejl bʌ qʼuin tsaʼ loqʼuiyon ti xʌmbal i tsaʼ ñumiyon majlel baqui mach wen ñʌmʌlic mic ñumel, i tsaʼ cʼotiyon yaʼ baqui woliʼ mejlel jumpʼejl colem otot. Toj sajtel c pusicʼal cheʼ tsaʼ j qʼuele cabʌl quixtañujob woliyob ti eʼtel. Cheʼ bʌ tsaʼ c lʌcʼtesa majlel c bʌ, tsaʼ j qʼuele chaʼan jiñʌch i testigojob Jehová woliʼ melob jumpʼejl i Yotlel tempa bʌ. Tsaʼ cʼajtiyi c chaʼan cheʼ bʌ miʼ julaʼtañoñob ti cotot i tsaʼ c ñaʼta chaʼan wen utsʼatʌch cheʼ luʼ temelonla cheʼ bajcheʼob».

«Tiʼ sujm comʌch miʼ chaʼ julaʼtañoñob ti cotot, jin chaʼan tsaʼ pejca juntiquil yaʼ bʌ woli ti eʼtel. Tsaʼ c melbe oración Dios, i tsaʼ ñumi 10 qʼuin, tsaʼ cʼoti jiñi xsubtʼan tsaʼ bʌ i ñaxan julaʼtayon ti cotot ti jiñi bʌ ora. Tiʼ subeyon chaʼan mic chaʼ tech jiñi c estudio i tsaʼʌch c jacʼʌ. Cheʼ jaʼel, tiʼ subeyon chaʼan mic majlel ti tempa bʌ i tsaʼʌch cajiyon ti majlel. ¡Maʼañic baʼ qʼuelbil c chaʼan jiñi tsaʼ bʌ j qʼuele! Añix ora tsaʼ caji c sʌclan jiñi lac piʼʌlob wen tijicñayoʼ bʌ, muʼ bʌ i lajal cʼuxbiñob i bʌ, i tsaʼʌch cʼoti c tajob».

«Cʼʌlʌl ti jiñi bʌ ora, maʼañic cʌyʌl c chaʼan jiñi tempa bʌ, uxpʼejl semana tsaʼ ñumi tsaʼ j cʌyʌ c ñucʼ cigarro. Tsaʼ c choco jiñi c libro tac chaʼan bʌ astrología yicʼot jiñi disco tac muʼ bʌ i cʼʌyin i chaʼan tac bʌ Satanás i tsaʼʌch cubi bajcheʼ tsaʼ caji i cʌy i ticʼlañon jiñi xibajob. Tsaʼ caji c chumtan bajcheʼ miʼ yʌl jiñi i mandar tac Jehová i tsaʼ ñumi uxpʼejl uw tsaʼ caji c tech subtʼan i cheʼ bʌ añix 6 uw tsaʼ c chʼʌmʌ jaʼ i chaʼpʼejl jach qʼuin tsaʼ ñumi, tsaʼ c teche bajcheʼ precursora auxiliar».

«Mi cʌqʼuen wocolix i yʌlʌ Jehová chaʼan chuqui am bʌ i mele tic tojlel, waʼli tsaʼix c tajbe i sujmlel j cuxtʌlel. Come ‹jiñi i cʼabaʼ Jehová jiñʌch jumpʼejl wen tsʌts bʌ tsʼajc. Jiñʌch baqui miʼ taj i putsʼib jiñi toj bʌ, i miʼ taj i coltʌntel› (Proverbios 18:10, Traducción del Nuevo Mundo). Cheʼ mi cubin c bʌ cheʼ bajcheʼ tiʼ tsʼijbu jiñi salmista am bʌ ti Salmo 84:10 ‹Come utsʼat jumpʼejl qʼuin yaʼ ti mal a Templo. Mach utsʼatic jumpʼejl mil qʼuin ti jumpat. Utsʼat mi tsaʼ wʌqʼueyon j cʌntʌben i tiʼ a wotot c Dios. Mach utsʼatic mi chumulon tiʼ yotot jontoloʼ bʌ›».

Ili xʼixic uts bʌ i pusicʼal tsiʼ tajbe i sujmlel i cuxtʌlel i cheʼ jaʼel majqui jach yambʌ uts bʌ i pusicʼal miʼ mejlel i taj Jehová.