Ntọt M’ọkwọrọ Obio Ubọn̄

Enye Ama Okụt Uduak ke Uwem

JESUS ọdọhọ ete ke imọ imọdiọn̄ọ erọn̄ imọ. (John 10:14) Edieke owo enyenede eti esịt ye ima ọnọ emem ye edinen ido, owo oro eyesan̄a ekpere mme anditiene Jesus. Utọ owo oro eyekụt uduak ke uwem, nte n̄wan kiet ke Belgium okokụtde. Emi edi mbụk esie:

“Ke ini Mme Ntiense Jehovah ẹkekọn̄de usụn̄ mi, ami mma nnen̄ede n̄kop mfụhọ nnyụn̄ n̄kere ndiwot idem. Mma mma se Mme Ntiense oro ẹketịn̄de ẹban̄a usọbọ oro odude ke mme mfịna ọdọn̄ọ-udọn̄ọ ererimbot emi edi ami n̄kamaha ekikere oro nte ke Abasi enyene ubọk do. Mma ntre ndika ufọkabasi isua itiaita ke edem, sia n̄kasuade mbubịk ido oro n̄kokụtde do. Nte ededi, ye Mme Ntiense ẹmi, mma n̄kụt akpanikọ ke se mmọ ẹketịn̄de nnyụn̄ ndikụt nte ke edi ọkpọsọn̄ n̄kpọ ndidu uwem ke ẹsiode Abasi ẹfep.

“Ke mfụhọ, ke mmọ ẹma ekedi ke ini ifan̄, mma ntaba ebuana ye Mme Ntiense. Mma n̄kop idiọkesịt. Ami n̄kesin̄wọn̄ efọk sika iba ke usen idem nnyụn̄ ntọn̄ọde ndida n̄kpọsọn̄ ibọk. Ke nyomde ndinyene nneme ye eteete mi oro ama akakpa, mma ndụk ubụpekpo. Ekedi n̄kpọndịk didie ntem ke ini ndude ikpọn̄ ke okoneyo mma n̄kụt demon an̄wanade ye ami nte utịp! Emi ama ebịghi ke ediwak ọfiọn̄. Ami mma nsikop ndịk kpukpru mbubịteyo ke ekikere edidu ikpọn̄.

“Ekem, usen kiet mma nnam isan̄, nsan̄ade isio isio usụn̄ utu ke enyeoro nsiwakde ndisan̄a, ndien mma ndisobo ata akamba itie ubọpufọk. Ke n̄kpaidem mi mma n̄kụt akwa otuowo do. Ke nsan̄ade n̄kpere, mma n̄kụt nte ke edi Mme Ntiense Jehovah ẹkenam utom edibọp Ufọkmbono Obio Ubọn̄. Mma nti edidi ndise oro Mme Ntiense ẹkesidide ufọk mi, ndien mma n̄kere adan̄a nte edidide utịben̄kpọ edieke ofụri ererimbot ẹkpedude uwem nte mme owo ẹmi ẹdude.

“Mma nnen̄ede nyom nte Mme Ntiense ẹkpefiak ẹdi ufọk mi, ntre mma nnyene nneme ye ndusụk mbon oro ẹkenamde utom ke ufọkmbono oro. Mma mbọn̄ akam nnọ Abasi, ndien usen duop ke ukperedem eren oro ekedide ke akpa ama awaha ke enyịnusụn̄ mi. Enye ama ọnọ ekikere ete nnyịn ikaiso ke ukpepn̄kpọ Bible, ndien mma nnyịme ye idatesịt. Ye unana ubiatini enye ama ọnọ mi ikot ndidụk mme mbonoesop ke Ufọkmbono Obio Ubọn̄. Mma nnyịme. Akananam ami n̄kwe utọ n̄kpọ oro! Mma nnyom mbon oro ẹmade kiet eken ẹnyụn̄ ẹkopde inemesịt ke anyanini. Ndien sese mmọ mi ke akpatre!

“Ke oro ebede mma ndụk kpukpru mme mbonoesop. Ke urua ita ẹma ẹkebe, mma ntre idiọk edu un̄wọn̄ sika. Mma ntomo mme n̄wed mi ẹban̄ade ukpepn̄kpọ ntantaọfiọn̄ ye mme usanikwọ Satan nduọn̄ọ, mma nnyụn̄ n̄keme ndikere nte ke mme demon ẹkpọn̄ mi. Mma nnam uwem mi odu ke n̄kemuyo ye mme idaha oro Jehovah onịmde ke Bible, ndien ke ọfiọn̄ ita ẹma ẹkebe mma ntọn̄ọ ndikwọrọ eti mbụk. Ke ọfiọn̄ itiokiet ẹma ẹkebe mma nna baptism. Usen iba ke mma n̄kana baptism, mma ntọn̄ọ usiakusụn̄ unọ un̄wam.

“Mmọkọm Jehovah ke kpukpru nti n̄kpọ oro enye anamde ọnọ mi. Uwem mi enyene uduak ke akpatre. Ih, enyịn̄ Jehovah edi ọkpọsọn̄ tọwa emi n̄kụtde ubọhọ ye ukpeme. (Mme N̄ke 18:10) Mmenen̄ede n̄kere nte andiwet psalm ekekerede ke ini enye ekewetde Psalm 84:10: ‘Usen kiet ke okụre fo ọmọfọn akan tọsịn. Mmemek ndida ke asan̄udọk ke ufọk Abasi mi, akan ndidụn̄ ke mme tent mme oburọbụt owo.’”

Osụhọde esịt an̄wan emi ama okụt uduak ke uwem. Ntre ke owo ekededi oro oyomde Jehovah ke eti esịt ekeme ndikụt.