Nitre gobran ngöbökwe kukwe driekä tä kukwe mike gare

Nüna kwin namani kwe

OVEJA Jesukwe ye gare Jesús ie (Juan 10:14). Ni iti brukwä kwin tä kä jäme aune kukwe nuainta metre ye tarere ngwane, nitre ja tötikaka Jesukwe ye ngätäite tö rabai ja tuabätä. Kukwe kwin tä kräke rabai gare ie, meri iti käi Bélgica yebätä namani bare erere. Kukwe ne niebare kwe:

“Ti nämä ulire krubäte aune ti tö nämä ja murie ketabätä ye ngwane, nitre testiko Jehovakwe jukwe metaba tie. Kukwe blo kä nebätä ye ükaite nieba kwetre tie ye rababa tuen kwin tie, akwa Ngöbökwe kukwe ye ükaite nieba kwetre ye ñan rababa debe tikrä. Kä kwäkwära ti ñan nämä nemen iglesiate, ñan ñobätä aune nitre iglesia yete nämä ja bämike jerekäbe bä nämä nemen bätätre. Akwa nitre testiko Jehovakwe nämä kukwe metre niere rababa tuen tie aune ni ñan raba nüne kaibe jenena Ngöböbätä rükaba gare tie.

“Nitre testiko Jehovakwe ti tuabitiba köbö ruäre te, ye bitikäre ti ñan ja tuabata bentre. Ja ñan rababa ruen kwin tie. Cigarrillo cajita kubu ti nämä duen köbö kwatire kwatire aune ti jataba droga duen arato. Ti ruai krütani yebe ti tö rababa blitai, aisete kukwe sukiakwe ye jataba tuen kwin tie. ¡Kukwe kri rababa bare! Deu ti nämä kaibe ngwane, chokalitre nämä ti mike klabore ja kisete aune ye nuaba sö kabre te. Kä nämä kite iko aune ti nämä kaibe, yebätä kä jürä nämä nemen tibätä.

“Bati ti nämä dikekä ngwane, jibiti ti nämä dikekä yebiti ti ñan rikaba, ti rikaba ji madabiti aune ti mata rababa ju kri sribe nämä yebätä. Nitre kwati nämä sribire yekwe ti töi mikaba niä. Nitre ye abokän testiko Jehovakwe aune nämäntre Ju Ja Ükarakrö sribere rükaba gare tie, ti rikaba mate ja ken ngwane. Ti tuabiti nämä rükabata törö tie aune nitre testiko Jehovakwe nämä nüne ño ye erere nünandre, ye kwin krubäte nütüba tikwe.

“Nitre testiko Jehovakwe rikadreta tikänti ye ie ti tö nämä, aisete nitre sribikä ruäre Ju Ja Ükarakrö yete ben tikwe blitaba. Tikwe oraba Ngöböi aune köbö rikaba köbö jätä ta ngwane, ja mräkä ben tikwe blitaba kena ye rükabata jukwebätä tie. Ti tötikaita kwe nieba kwe tie aune tikwe jän nieba ie kä jutobiti. Ben gwairebe ti nübaiba kwe gätäbätä Ju Ja Ükarakrö yete aune rükabitiba tie. Nitre nüne kä jutobiti, ja tarere ye ti nämä känene aune kwanba tie.

“Yete ja käne käre tita kwen gätäbätä. Bämän rikaba kroma ta ye bitikäre tikwe sö dua ye tuametreba. Tärä astrología aune musika satanakwe discoi nämä tikwe ye tikwe kitakaba aune chokalitre ñan jatabara ti nike jataba tuen tie. Jehovakwe kukwe ükaninte Bibliabätä ye ererebätä ti jataba ja ngwen aune sö rikaba kräma ta ye bitikäre, ti jataba kukwe driere. Sö rikaba krä ti ta ye bitikäre tikwe ja ngökaba ñöte aune köbö rikaba köböbu ta ngwane, tikwe ja mikaba prekursora auxiliar.

“Jehovakwe dre nuainbarera tikrä yebätä tita debe bien ie. Nengwane kukwe kwin niena tikwe. Jehová ye abokän torre dite, niara ti ükaka aune ti kriemikaka (Proverbios 18:10). Ni salmo tikaka ie ja namani ruen ño ye erere ja ruen tie: ‘Köböitibe mä juete ye bäri kwin nun tädre köbö mil te kä madakänti ye kräke. Ngöbö tikwe jue yete ti tädre nünaninkä krö jukwebätä ye bäri kwin ti tädre nüne nitre käme juete ye kräke ie ti tö’”.

Meri töi kwin yekwe nüna kwin namani. Ni ño erere tä Jehová känene ja brukwä kwinbiti, yekwe nüna kwin raba nemen arato.