Olchixtaláb tin kwéntaj an ólchixchik

In exla’ jant’ini’ kin eyendha’ in ejatal

A JESÚS in uluw abal in exlál in aykólilchik. (Juan 10:14.) Max jun i atikláb in kwaʼal i tsaʼataláb tin ichích ani in kʼanidhál an koyomadhtaláb ani an bolidhtaláb, neʼets ki léʼnaʼ ki junkuw in aykólilchik a Jesús ani neʼets kin atsʼaʼ alwaʼ tin éjatal, jantʼiniʼ tin watʼaʼ jun i mimláb axi kʼwajat ti Bélgica. Ki tsuʼuw jawaʼ jajáʼ in uluw:

«Tam ti an ólchixchik kʼal a Jeho­vá tin takchij an wiʼleb, u kwaʼalak jun i púlik kʼibataláb ani u tsálpayalak ku tixkʼaʼ u éjatal. U lej kulbétnaʼ jawaʼ in exóbchin, abal neʼets ka tixkʼáj patal an kʼibataláb axi waʼats al axéʼ xi xeʼtsintaláb, pero yab u kulbétnaʼ abal a Dios játs expidh axi neʼets kin tsʼejkaʼ nixéʼ xi kʼibataláb. In kwaʼalakits 8 i támub tu jilámal kin kʼalej ti iglesia kom yab u kulbetnálak jawaʼ u tʼajnalák tanáʼ. Tokot u tʼajaʼ ti kwéntaj abal an ólchixchik kʼal a Jehová in olnál an chubaxtaláb ani abal yab i éjtowal ku kʼwajiy alwaʼ max yab i kʼakʼnál a Dios.

Pero talbél, an ólchixchik kʼal a Jehová yabáts in éjtowchik tin elaʼ. Ani u atsʼaʼ lej tʼeʼpidh. Ti kʼicháj u jutsʼuwalak yan i may, jayej u tujchij ku éyendhaʼ i droga. Kom u léʼak kin tʼilmáts kʼal u mam axi biyálits ti tsémenek, in tʼajaʼ abal kin útey kʼal an dhimantaláb. Lej kʼakʼadh jawaʼ u watʼaʼ kom tam akal tam in kʼwájatak kwetém, tin lej odhnálak an demonios. Nixéʼ owey yan a ítsʼ. Ani yabak u léʼ kin kʼwajiy kwetém tam u yikʼwtsinál.

Jun a kʼicháj tam tin xeʼetsak tin belelél u yekʼwaʼ kʼeʼat i bel ani in ulits juʼtáj ti kʼwájatak ti tsʼejkáb jun i púlik atáj. U lej jikʼpaʼ tam ti u tsuʼuw abal kʼwájatak yan i atikláb ti tʼojnal. Tam tin útey u tʼajaʼ ti kwéntaj abal pel an ólchixchik axi kʼwájatakchik in tsʼejkál an Atáj Tamkuntaláb. U tʼilaʼ tam tin tsaʼbiyalakchik tu kʼimaʼ ani u tsálpay, lej alwaʼak max patal an atikláb kin tʼajaʼ ejtíl jajáʼchik.

U léʼak max wichelakchik tu kʼimaʼ, jaxtám in káwin kʼal talchik axi kʼwájatak ti tʼojnal ban Atáj Tamkuntaláb. U ólonchij a Dios ani talbél, an ólnom axi tin tsaʼbiyalak wichiy junílekʼij abal ti kin aliy. Ani tin uchaʼ max u leʼak tin exóbal junílekʼij ani uchaʼ abal aníts ani dhubatkʼij tin kániy ti tamkuntaláb. Ani in kʼalej, yab jaykʼiʼ u tsuʼúmal antsanáʼ biyálits u áliyal i atiklábchik axi ka kʼwajiy kulbél. Ani xowéʼ u elaʼ.

Ma ti tam, yab u kʼibámal ni jun i tamkuntaláb. Talbél ti óx i semana yabáts in jutsʼulak, ani u petʼnaʼ an libros, an discos axi in chiʼdhálak an son axi in kulbetnálak a Satanás ani tanáʼ abal okʼox an demonios yabátschik tin ódhnaʼ. U tʼajaʼ tu éjatal patal jawaʼ u exobnálak ti Bi­blia ani óx a ítsʼ talbél in xeʼtsin tin ólnom kʼal an alwaʼ kaw. Talbél ti akak a ítsʼ in pujan ani tsab a ítsʼ talbél u tʼajaʼ tin precursor auxiliar.

U lej pidhál i kʼakʼnámal a Jeho­vá kʼal patal jawaʼ in tʼajámal kʼal nanáʼ. Xowéʼ u éjtowal kin kʼwajiy más kulbél. In bij a Jeho­vá pel jun i torre axi alwaʼ kubat, tanáʼ u elaʼ jitaʼ ti kin kʼániy ani ti kin béletnaʼ. (Proverbios 18:10.) U atsʼál ejtíl an salmista axi in dhuchaʼ: ‹Kin kʼwajiy jun i kʼicháj tin kʼimaʼ a Jehová yab in jumbiyal kʼal ni jantʼoj. U takuyámal kin kʼwajiy tin kʼimaʼ a Dios ani yab píl juʼtáj ti waʼats i pojkaxtaláb›.»

Axéʼ xi uxum axi in kwaʼal i tsaʼataláb tin ichích in ejtowámal kin elaʼ an kulbetaláb tin éjatal. Jayej axi kʼeʼat an atiklábchik neʼets kin éjtow kin elaʼ a Jehová max kin aliy kʼal patal in ichích.