Iwhowho Uvie A N’iyẹrẹ

Epanọ Aye Jọ O ro Wo Evawere Evaọ Uzuazọ

JESU ọ ta nọ ọ riẹ igodẹ riẹ. (Jọn 10:14) Nọ ohwo o te wo emamọ eva, yọ udhedhẹ gbe ẹrẹreokie e rẹ were iẹe, ọ rẹ gwọlọ kuomagbe ilele Jesu. Ohwo otiọye na o re wo evawere evaọ uzuazọ wọhọ epanọ o via kẹ aye jọ evaọ obọ Belgium. Aye na o gbiku nana:

“Ẹdẹ ọsosuọ nọ Isẹri Jihova a ro kporo ẹthẹ mẹ, ọkora ọ jọ omẹ oma gaga, me je tube roro kpahe epanọ me re ro kpe omamẹ no dede. Eme nọ Isẹri Jihova a ta kpahe epanọ ebẹbẹ nọ e rrọ akpọ nana i ti ro kuhọ e were omẹ. Rekọ nọ me yo nọ Ọghẹnẹ họ ọnọ o ti ku ebẹbẹ na họ o were omẹ hẹ. Whaọ u te ikpe eree no nọ me gbe je ro kpohọ ichọche he fiki eware eviẹhọ nọ a bi ru. Rekọ mẹ jọ ẹme nọ Isẹri Jihova na a ta ruẹ umuzẹme jọ, mẹ tẹ te ruẹ nọ ohwo ọ sae rria ababọ Ọghẹnẹ hẹ.

“O da omẹ gaga inọ nọ Isẹri Jihova na a nyaze unuẹse jọ no, mẹ gbẹ ruẹ e rai vrẹ ere he. O kẹ omẹ uye gaga. Mẹ jẹ hai vovo epakẹte isagareti ivẹ okpẹdẹ, yọ mẹ jẹ hae tubẹ rehọ imu egaga dede. Me te dhomahọ iruẹru-imizi fikinọ mẹ jẹ gwọlọ epanọ me re ro lele ọsẹ ologbo mẹ nọ o whu no ta ẹme. Fiki onana, evaọ aso nọ mẹ ọvo mẹ tẹ rrọ, idhivẹri e jẹ hae họre omẹ. Onana o jẹ lẹliẹ ozọ mu omẹ gaga. Yọ ere o jẹ via evaọ emerae buobu. Ozọ nọ mẹ ọvo mẹ rẹ rọ jọ oria evaọ owọwọ kpobi o jẹ hai mu omẹ gaga.

“Ẹdẹ jọ nọ mẹ jẹ nya omonya, mẹ tẹ nya edhere jọ nọ mẹ re nya vẹre he, mẹ tẹ ruẹ oria ulogbo jọ nọ a be bọ uwou fihọ. U gbe omẹ unu gaga nọ mẹ ruẹ ogbotu ahwo buobu evaọ etẹe. Nọ mẹ nya kẹle ae, mẹ tẹ ruẹ nọ kpakọ Isẹri Jihova nọ e be bọ Ọgwa Uvie. Mẹ tẹ nwane kareghẹhọ okenọ Isẹri Jihova na a jẹ hae rọ nyaze obọ uwou mẹ na, mẹ tẹ be vuẹ omamẹ nọ otẹrọnọ ahwo akpọ na kpobi a re ru wọhọ ahwo nana, akpọ na o re woma wumuo ho.

“Mẹ ginẹ gwọlọ nọ Isẹri Jihova na a wariẹ mu obọ uwou mẹ họ ẹnyaze, fikiere mẹ tẹ ta ẹme kẹ ejọ evaọ usu ahwo nọ a jẹ bọ uwou na. Mẹ tẹ lẹ se Ọghẹnẹ. Nọ edẹ ikpe e vrẹ no, ọzae nọ ọ kake ta usi uwoma kẹ omẹ na ọ tẹ nyabru omẹ ze. Ọ tẹ ta nọ ma wariẹ mu Ebaibol na họ ewuhrẹ, yọ mẹ rọwo avọ evawere. Ẹdẹdẹ yena o te zizie omẹ kẹ ewuhrẹ evaọ obọ Ọgwa Uvie. Mẹ tẹ ginẹ nya. Me ri kpohọ oghẹrẹ oria utioye na ẹdẹvo ho! U kri no nọ mẹ be rọ gwọlọ ahwo nọ a you omomarai nọ eva e be were. Whaọ mẹ nwa ruẹ ahwo na no!

“No umuo ẹdẹ yena vrẹ, me te je kpohọ ewuhrẹ ẹsikpobi. Nọ oware wọhọ eka esa e vrẹ no, mẹ tẹ siọ isagareti ba evovo. Me te gbolo ebe ẹva-ọgba mẹ kpobi kufiẹ, gbe ile kpobi nọ i wobọ kugbe Setan avọ idhivẹri riẹ. Me te bi muẹrohọ nọ idhivẹri na e be kẹnoma kẹ omẹ. Me te mu uzuazọ mẹ họ eyeri wọhọ epanọ Jihova ọ gwọlọ. Nọ emerae esa e vrẹ no, me te mu usi uwoma họ ẹta. Mẹ tẹ te họ-ame nọ emerae ezeza e vrẹ no. Edẹ ivẹ nọ i lele i rie, me te mu ọkobaro obufihọ họ.

“Me yere Jihova rọkẹ eware iwoma kpobi nọ o ru kẹ omẹ no. Mẹ nwa wo evawere no evaọ uzuazọ. Odẹ Jihova ginọ uwou ukpehru ogaga, yọ mẹ jariẹ wo ọthọwẹ nọ mẹ dhẹ ruọ eva riẹ. (Itẹ 18:10) O jọ omẹ oma wọhọ epanọ o jọ ọso-ilezi na oma okenọ o kere evaọ Olezi 84:10 nọ: ‘Ẹdẹ ọvo evaọ ighẹ ra o woma vi edẹ odu (1,000) evaọ oria ofa kpobi! Mẹ salọ nọ me re dikihẹ unuẹthẹ uwou Ọghẹnẹ mẹ ukpenọ mẹ rẹ rria iwou-udhu irumuomu.’ ”

Aye nana nọ o wo emamọ eva na o wo evawere evaọ uzuazọ. Yọ ere o sae jọ kẹ ohwo kpobi nọ ọ be rehọ emamọ eva gwọlọ Jihova.