Eripoti ey’Abathuliri b’Obwami

Mwabana Ekighendererwa omo Ngebe

YESU mwabugha athi anasi esyombuli siwe. (Yoane 10:14) Omundu amabya inianawithe omuthima owuwene kandi inianzire obuholho n’erithunganene, oyo iniakendi lethwa okwa bigha ba Yesu. Omundu ng’oyo iniakendi bana ekighendererwa omwa ngebe, ng’omukali mughuma owe Belgium. Ono w’omwatsi wiwe:

“Abema ba Yehova babere bakakongotha okwa lhuyi lhwaghe, nabya inabiriyinuwa kandi ingane mulengekania okw’iyitha. Munanza ebyo Bema babugha okwa kikendi syaghunzaho ekihugho ekilhwere kino aliwe mungathanza eky’eribugha indi Nyamuhanga atholere in’ingira omo mwatsi oyu. Nabya inamabirighunza myaka munani isingakighenda okwa kanisa, kundi munapona obulibathangania obwa nabya ingalhangirayo. Aliwe bikahika okwa Bema, munatsuka erilhangira ngoku ebya bakabugha ni kwenene kandi munaminya nibya ngoku kikalire eribyaho butsira Nyamuhanga.

“Eky’obulighe, Abema babere babinyibungira habw’obuthuku buke munabya isinangathasya babana. Munayiponera kutsibu. Obuli kiro ininganywa obupaketi bubiri bw’ethaba kandi nibya munatsuka erikolesya ebibatsi bikathamiraya. Erianza erikania na sukulhu waghe oyuwabiriholho, munayingirya omwa by’obukumu. Ikikanyitha obuba bunene omwa kiro emirimu yikanyasira ingane ingyuwene! Eki mukyanyibyako habw’amezi. Obul’igholho-gholho iningabya omwa buba habw’eribya ingyuwene.

“Neryo kiro kighuma munayibungya-bungya, namalhaba omwa nzira eyo ngathabeghere, neryo munalhangira obuhimbe bw’enyumba nene. Ekyanyiswekaya munalhangiraho abandu banene. Nabere ingaseghera hakuhi, munalhangira ini Bema ba Yehova ibakahimba Ekisenge ky’Obwami. Mun’ibuka Abema ababya bakanyibungira, kandi munalengekania ngoku ekihugho kyosi kyang’uwene kutsibu ku kyabya mw’abandu ng’aba.

“Omo kwenene munanza indi Abema bathasyasa ewaghe, neryo munakania n’ababya bakahimba Ekisenge ky’Obwami. Munasaba Nyamuhanga, neryo enyuma w’ebiro ikumi omulhume oyuwatsuka erinyihikako mwanyisubako. Mwabugha athi nga thuthasyalholha embere n’erigha lyethu, neryo inganatsemire munaligha. Aho n’aho mwanyikokya okwa Kisenge ky’Obwami. Munaligha. Nabya isingali nathabana abandu ng’ibo! Nabya inabirisondya habw’obuthuku buuli abandu abanzene kandi abatsemire. Kandi erighunzerera munababana!

“Enyuma waho munatsuka erighenda okwa mihindano yosi. Enyuma w’esyowiki ng’isathu, munaleka omutse waghe mubi ow’erinywa ethaba n’ebibatsi ebikathamiraya. Munaghusa ebitabu byaghe ebihambire okw’ilhaghulirya esyongununu n’esyonyimbo esihambire okwa by’ekisitani-sitani, kandi munatsuka eriyowa esyombinga isisikinyilyambaya. Munatsuka erighendera okwa bihano bya Yehova ebiri omwa Biblia, n’enyuma w’amezi asathu munatsuka erithulhughania engulhu yuwene. Enyuma w’amezi mukagha munabatizibwa. Biro bibiri ngali batizibirwe, munatsuka obutemburi bw’obuwathikya.

“Ngasima Yehova busana n’ebibuya ebyosi ebyo abirinyikolera. Lino engebe yaghe yiwithe ekighendererwa. Omo kwenene, erina lya Yehova ni hakongothere aho ngabana obusayiro n’obutheya. (Emisyo 18:10) Ahathe erithika-thika nga yowa ng’omuhandiki w’esyonyimbo omughulhu ahandika ebiri omwa Esyonyimbo 84:10: ‘Ekiro kighuma omo Hekalu yawu, kyowene kwilhaba ebiro elfu ehandi; nyanzire erihangana oko lhukyo lhw’enyumba ya Nyamuhanga waghe, kwilhaba erikalha omo manyumba w’ababi.’”

Omukali w’omuthima mwolho oyu mwabana ekighendererwa omwa ngebe. Kwesi owosi-wosi oyukasondaya Yehova iniane n’omuthima mubuya nayu anganabanakyo.