Aju in tzaj kyqʼamaʼn pakbʼal tiʼj Tkawbʼil Dios

Kanet ttxolil tanqʼibʼil

TQʼAMA JESÚS qa ojtzqiʼn qe t-ẍneʼl tuʼn (Juan 10:14). Qa at tbʼanel tanmi jun xjal, qa in jyon tiʼj mujbʼabʼil ex tiʼjju tzʼaqli, kʼonil jlu tiʼj tuʼn tkubʼ t-ximen tuʼn tten kyxol t-xnaqʼtzbʼen Jesús. Ok kkanetel ttxolil tanqʼibʼil ik tzeʼn bʼaj tiʼj jun xuʼj moqa qya te tnam Bélgica. In tzaj tqʼamaʼn jlu:

«Tej kypon testigos de Jehová pakbʼal njaye, attoq nim bʼis wiʼje ex kubʼ nximane tuʼn tkubʼ nbʼyon wibʼe. Tbʼanel ela toj nwitze tej ttzaj kyqʼamaʼn alkye tten kxel bʼinchaʼn tiʼj nya bʼaʼn at twitz Txʼotxʼ, pero nya bʼaʼn ela toj nwitze tej tok nbʼiʼne qa tuʼn Dios kxel tbʼinchaʼn tiʼj. Otoq tzikʼ wajxaq abʼqʼi ya mintiʼ in chinxe toj iglesia, tuʼnju nya ngane aju in bʼant kyuʼn xjal toj iglesia. Noqtzun tuʼnj, el nnikʼe tiʼj qa axix tok aju kyqʼama testigos de Jehová, tuʼnju mlay qo anqʼin qa mintiʼ Dios».

«Bʼisbʼajil tuʼnju ya mintiʼ bʼant tuʼn nyoline kyukʼil testigos de Jehová. Attoq nim nya bʼaʼn toj wanqʼibʼile. Xi tzyet tuʼn nsichʼine ex in bʼajtoq kabʼe kaj wuʼne toj jun qʼij. Ax ikx xi tzyet tuʼn tajbʼen droga wuʼne. Wajtoqe tuʼn nyoline tukʼil n-aweloye otoq kyim ex tuʼn jlu kubʼ nximane tuʼn tel mas nnikʼe tiʼj espiritismo. ¡Tzaj nimxix nya bʼaʼn wiʼje! Tej ntene njunalxe kyoj qonikʼen, kubʼ nnaʼne qa in che ultoq demonio wiʼje. Bʼaj jlu kyoj nimku xjaw. Nyatoq waje tuʼn ntene njunalxe toj qonikʼen».

«Toj jun qʼij, in nexe bʼetil ex in xiʼye toj junxitl bʼe, ex in pone jatumel in jaw bʼinchaʼn jun matij edificio. In jaw labʼine tuʼnju in che aqʼunantoq nim xjal. Tej in xi laqʼeʼye keʼyilte, el nnikʼe tiʼj qa aʼye testigos de Jehová in che bʼinchan jun Ja te Chmabʼil. Tzaj nnaʼne tej kypon junjun maj njaye, ex kubʼ nximane qa tbʼanel noqwit ax kyanqʼibʼil xjal ik tzeʼn kye».

«Wajtoqe tuʼn kymeltzʼaj visitaril weye, tuʼntzunju, in xi laqʼeʼye yolil kyukʼil junjun in che aqʼunan tiʼj salón. In naʼne Dios ex tej tikʼ lajaj qʼij, pon jun erman visitaril weye, aju otoq yolin wukʼile tnejel maj. Tzaj tqʼamaʼn weye tuʼn nxnaqʼtzane juntl maj tiʼj Biblia ex tzaj nkʼamoʼne xnaqʼtzbʼil. Ax ikx tzaj tqʼamaʼn tuʼn nxiʼye kyoj chmabʼil, ex kubʼ nximane tuʼn nxiʼye. ¡Naʼmxtoq tok nkeʼyine jun tiʼ ik tzeʼn jlu! Otoq tzikʼ nim ambʼil in chin jyone kyiʼj xjal in che tzalaj ex in nok kykʼujlan kyibʼ kyxolx, ex otoq che kanet wuʼne».

«Atxix toj ambʼil aju o chin tene kyoj kykyaqil chmabʼil. Tej tikʼ oxe seman kyaj ntzaqpiʼne tuʼn nsichʼine, ex nxoʼne qe uʼj at toklen kyukʼil chman moqa aj kabʼ ex kubʼ nnajsaʼne qe disco te bʼitz at toklen kyukʼil demonio. Toj ambʼil aju kubʼ nnaʼne qa ya mintiʼ e pon demonio wiʼje. Xi tzyet tuʼn tkubʼ wanqʼine aju in tzaj tqʼamaʼn Tyol Dios, ex tej tikʼ oxe xjaw in nexe pakbʼal. In bautisarine tej tikʼ qaq xjaw, ex tej tikʼ kabʼe qʼij, in noke te precursora auxiliar».

«In xi nqʼoʼne chjonte te Jehová tiʼj tkyaqilju o bʼant tuʼn wiʼje. Jaʼlo at ttxolil wanqʼibʼile. O tzʼel nnikʼe tiʼj qa in nok Jehová ik tzeʼn jun ja maʼ twaʼl ex kyuw tten, tuʼnju o xqʼuqin wiʼje (Proverbios 18:10). Axju in kubʼ nnaʼne ik tzeʼn te salmista tej tkubʼ ttzʼibʼin Salmo 84:10. Tqʼama jlu: ‹Mas bʼaʼn tuʼn ntene jun qʼij tuj tjaya, twitzju tuʼn ntene jun mil qʼij mya tuj tjaya; mas bʼaʼn tuʼn ntene ttzi tja Ndiose, ex mya tuʼn ntene jatum najl qeju bʼinchal mya bʼaʼn›».

Kanet ttxolil tanqʼibʼil tbʼanel xuʼj lu. Ax ikx, kkanetel ttxolil tanqʼibʼil alkyexku xjal qa ma jyon tiʼj Jehová tuʼn tkyaqil tanmi.