Ovaivisi Vouhamba Vapopia

Pahe Wanoñgonoka Oityi Tueya Okulinga Kouye

SESUSI wii onongi mbae. (Suau 10:14) Omunthu una omutima omuwa, uhole ombembwa, ulinga etyi tyaviuka, mahande okukala omulongwa wae. Omunthu oo manoñgonoka oityi tweya okulinga kouye, ngetyi tyalinga omukai umwe woko Bélgica. Tutalei etyi apopia:

“Onthiki Onombangi mba Siovaa vatotola pepito liange ankho neliunga unene, ankho ndyisoka vala okuliipaa. Etyi vapopia okuti ovitateka mouye mavipu, andyihambukwa, mahi etyi vapopia okuti mevimaneko o Huku, anehetyihande. Ankho pena-le omanima etyinana nahai vali ko ingelesa, mokonda ankho kavalingi etyi valongesa. Mahi namona okuti Onombangi mba Siovaa valongesa umwe otyili, tupu andyimono okuti omunthu okwahande Huku kakala nawa.

“Atulilongesa umwe ononthiki mbumwe, mahi Onombangi mba Siovaa anehevemono vali. Ankho nasoya unene. Monthiki ankho ndyipwena onosikalu mbuna 40, andyihiki umwe kokusipa epangwe. Mokonda ankho nahanda okupopia na vavoo yange wanyima, andyihimbika okwenda kovimbanda. Pahe ankho ndyina unene owoma. Kounthiki, ovilulu ankho vinthyonga. Ngatyo umwe ndyikala onohanyi ononyingi. Ononthiki ambuho kounthiki ankho ndyina owoma mokonda ankho ndyikala andyike.

“Nthiki imwe andyikaenda-enda, mahi anahakwate ondyila ankho ndyihole okukwata-kwata. Pokwenda opo, andyivasi ovanthu veli nokutunga. Ankho ovanthu ovanyingi. Etyi natala ñgaa, naina ankho Onombangi mba Siovaa veli nokutunga ondyuo yavo yomaliongiyo. Andyisoko Konombangi ankho veya okundongesa Ombimbiliya, andyilipopila andyiti: ‘Ñgeno ovanthu aveho vakala vala ngavo.’

“Ankho nahanda Onombangi mba Siovaa vandongese vali Ombimbiliya. Pahe andyipopi novanthu ankho veli nokutunga vandyovolele ou mandongaisa. Etyi nakondoka keumbo, andyilikuambela ku Huku. Etyi palamba ononthiki 10, omukulu wokuandongesile kohale eya, amphulu ine tyitavela tutualeko okulilongesa Ombimbiliya. Ame andyiti: ‘Yoo tyitavela.’ Tupu ankhongo ndyende komaliongiyo, ame andyitavela. Etyi namwene-ko hinetyimone! Ankho ndyili umwe nokuovola ovanthu vekahi ngavo, velihole, vena ehambu. Andyivevasi umwe!

“Okutuka umwe opo, andyende komaliongiyo aeho. Etyi pakala onosimanu ononthatu, anahapwene vali. Andyiyumbuhi omikanda viange aviho vipopia ovilulu, noviimbo vipopia ovilulu anehevitehela vali, onondisku mbatyo andyimbuyumbuhi. Pahe ovilulu ankho kavinthyongo vali. Andyihimbika okulinga ovipuka Siovaa ahanda, etyi pakala onohanyi ononthatu naame andyihimbika okulongesa ovanthu Ombimbiliya. Etyi pakala onohanyi epandu andyimbatisalwa. Apalambe vala ononthiki onombali, andyikala omukokoli-ndyila wapola pokati.

“Ndyipandula unene Siovaa ovipuka aviho andingila. Pahe ndyili umwe nawa. Tyili enyina lya Siovaa otyiholamo tyapama, omu navasa ondyakulilo. (Provérbios 18:10) Na ame ndyiliivite ngetyi tyakalele omuhoneki wa Salmo 84:10: ‘Okukala onthiki ike vala pomapata ove, tyipona okukala ononthiki 1000 popakwavo vali! Ame nakoya okutalama pombundi yondyuo ya Huku yange, tyipona okukala vala monohinge mbovivi.’”

Omukai oo, una omutima omuwa, wanoñgonoka okuti naina kouye tuna umwe etyi tweya okulingako. Novanthu aveho vena omutima omuwa, vaovola Siovaa, otyo mavanoñgonoka.