Aianhpiricha Reinueri uandantasïntiksï

Niárasti tsípikua jingoni irekani

JESÚSI uandasïndi eska míteaska imeeri karichichani (Juanu 10:14). Kʼuiripu ma enga ambakiti mintsita ma jataka ka uékani pínandikua ka jurhimbikua jingoni irekani, ima uékati Jesúsiri chúxapatini. Niáraakajtsï kánikua tsípikua jingoni irekani, ísï nitamakuarhispti Bélgica anapu kʼuiripu ma. Ju je exeni ambe enga uandantajka:

“Jiáni engaksï Jeobaeri testiguecha juchiniu uámutapka, kánikua no sési pʼikuarheraxaka ka eratsexapka, uándikukuarheni. Sési pʼikuarheraspka engajtsïni arhipka eskaksï parhakpinirhu nóteru jauakia uandanhiatecha peru, no tsitispka engajtsïni arhipka eska Tata Diosï úpiringa indeni ambe. Ochu uéxurhinisïsptia engani nóteruni nípkia iglesiarhu, no tsitisïreenga jimbokaksï no ísï úsïreenga eskaksï na jorhentpienga. Joperuni exespka eskajtsï testiguecha jurhimbitku ambe aianguaxapka ka kurhanguspka eskachi meru uétarhinchasïnga Tata Diosïni”.

“Joperu engajtsïni na pʼorhembipkia ma tiempu, tátsekuachi nóteru uandajperhaspkia. Kánikua no sési pʼikuarherasïreenga. Itsutasïrhenga tsimani kajetiia ma jurhiatikua jimbo ka ístuni, uénaspkia úrani drogechani. Uékani uandontskuarheni papa kʼéri jingoni enga uarhikia, úspti eskani uénapiringa tsitini sïkuamikueri ambe. ¡Xáni engareni no sési nichepka! Chúrikuechani engani jandiajkuni jarhenga, pʼikuarherasïreenga na engajtsïni andarhiereenga demoniuecha. Ísï nitamakuarhichaspka máru mesechani. Chúrikuechani kánikua chonharhisïrhenga jandiajkuni jarhani”.

“Ma jurhiatikua engani nípka xanharani, no jimeesïsï niraspka engani pʼindepkia nirani ka jimesïsi niáraspka nani engaksï edifisiu ma úni japka. Ískuni pakaraspka engani exeapka xáni uáni kʼuiripuechani ánchikuarhini jarhani. Engani andarhierapka, kuenta íntskukuarhespka eskaksï Jeobaeri testiguechespka engaksï Kʼumanchikua Reinueri ma úni japka. Miántaspka jiáni engajtsïni pʼorhembienga ka eratsespka eska ambakiti ambeepiringa engaksï iápuru parhakpinirhu anapuecha ísï irekapiringa eska imeecha”.

“Uékasïreenga eskajtsïni ménderu ueenapiringa pʼorhembini ísï jimbo, uandontskuarhekuaspka máru imeechani engaksï jima ánchikuarhini japka. Kómarhispka Tata Diosïni, ka diesi jurhiatikua tátsekua, ima publikadori engareni uénapka uandontskuarhecheni, ménderurini niraspti pʼorhembini. Arhisptirini sini uékapirini ménderu jorhenguarhini Biblieri ambe ka ji arhispka eska jo. Jirejiresïrini pʼímarhispti tánguarhikuecharhu kʼumanchikua Reinuerirhu ka ji niraspka. ¡No méni exexapka xásï ambe! Iónisptia engani jirinhani japka xásï ambe, kʼuiripuechani engaksï tsípikua jingoni irekajka ka xénchperani, iásï kʼóruni exeantaspkia”.

“Jiáni uératini, no méni kuerataska tánguarhikuecharhu. Tanimu semana tátsekua nóteruni itsutasïrhenguia. Kʼuanikuaspka libruechani engaksï astrolojierhipka ka diskuechani engaksï musika satanikerhipka ka pʼikuarheraspka eskajtsï demoniuecha nóteru andarhierasïrhenguia ka uénaspka ísï úni eskaksï Jeobaeri prinsipiuecha na uandajka. Ka tanimu mesi tátsekua, uénaspkia aianhpini ambakiti aianhpikueri ambe. Ka ísï seisi mesi tátsekua, itsï atakuarhispkia ka tsimani jurhiatikua tátsekua, prekursora uaksiliari”.

“Agradeserhikusïnga Jeobani, iámindu ambe enga úka jindeeni jimbo. Iásï kʼóruni tsípikua jingoni irekaxakaia. Jo, Jeobaeri arhinhakua uiuinhasï torre máesti ka ma jima nirasïndi ma para kuájchakukuarhini (Proverbios 18:10). Ísï pʼikuarherasïnga eska Salmista enga karapka: ‘Jimboka ma jurhiatikua chiiti patiuecharhu sánderu sésiska eska mili jurhiatikuecha máteru lugari jimbo! Ji sánderuni tsitisïnga anhandetini jarhani juchiiti Tata Diosïri kʼumanchikuarhu jamukuteni ka eska imani kʼumanchikuarhu irekani enga no sési ambe niátanhajka’”.

I kʼuiripu enga ambakiti mintsita ma jataka, tsípikua jingoni irekaxatiia. Ístu, náki uéjki kʼuiripu ma enga ambakiti mintsita ma jataaka enga jirinhaaka Jeobani, exentaati.