Iyẹnrẹn rẹ ihwo ri ghwoghwo uvie na

Ọ Rhe Mrẹ Otọ rẹ Akpeyeren Re

JESU tare nẹ ọyen riẹn igodẹ rọyen. (Jọn 10:14) Ohwo ro vwo ẹwẹn esiri ro ji vwo ẹguọnọ rẹ ufuoma kugbe ọvwata yen siẹkẹrẹ idibo ri Jesu. Ohwo ọtiọyena cha mrẹvughe nẹ akpeyeren vwo otọ, kirobo rẹ aye ọvo vwẹ Belgium mrẹvughe. Ọnana ikuegbe rọyen:

“Ọke rẹ ẹwẹn mẹ vwọ kuọrọn totọ, ri mi vwo roro kpahẹn obo mi vwo churu ghwu, ọyen Iseri ri Jihova vwọ vwẹ obọ hworo ẹchẹ mẹ. Oma vwerhen ovwẹ kpahen ekpahọnphiyọ rẹ Iseri na vwọ kẹ vwẹ nẹ a cha rhuẹrẹ ebẹnbẹn rẹ akpọ na phiyọ, ẹkẹvuọvo oma rha vwerhen ovwẹ rẹ ayen vwọ tanẹ Ọghẹnẹ yen che ruo-o. O te ẹgbukpe ẹrenren mi vwo jẹ ishoshi ẹra vwo re, kidie uruemu rẹ omeru rayen tun vwe oma. Jẹ Iseri na fẹnẹre, kidie mi rhi vwo oniso nẹ oborẹ ayen tare eje uyota, me je mrẹvughe nẹ ohworakpọ che se yerin ababọ rẹ Ọghẹnẹ-ẹ.

“Ofu dje vwẹ uvwre rẹ ọke evo kidie me vẹ Iseri na rha sa mrẹ ohwohwo-o. Ẹwẹn mẹ da rhe hra totọ. Mi phopho ipakẹti rẹ isigati ivẹ ẹdọke je reyọ ihunvwun egangan dede. Kidie nẹ me guọnọ nene ọsẹ mẹ rode ta ota kugbe, ki mi vwobọ vwẹ iruemu rẹ orhan. Ọtiọyena, oshọ ọvo kọyen mu vwe vwẹ ason fikirẹ ukpokpoma rẹ emekashe rẹ idẹbono! Ọnana reyọ emeranvwe ibro. Kovwọnvwọn kovwọnvwọn yen oshọ rẹ mẹvwẹ ọvo vwọ dia vwo muvwe.

“Vwẹ ẹdẹ ọvo me vwọ yan wan idjerhe rọ fẹnẹ ọ rẹ me wan jovwo, me da mrẹ uwevwin rode ọvo ra bọn. O gbevwunu me vwọ mrẹ ihwo buebun vwẹ etiyin. Mi vwo siẹkẹrẹ ayen re, kẹsiẹye me ke rhe mrẹvughe nẹ ayen Iseri ri Jihova re bọn Ọguan Ruvie. Me karophiyọ ọke buebun rẹ Iseri na vwọ kọn rhe uwevwin mẹ, ki mi roro kpahẹn oborẹ ọ cha vwerhen oma te siẹrẹ ihwo eje vwẹ akpọ na de se yerin kerẹ Iseri na.

“Mane kẹ Iseri na sa rhoma bru vwe rhe obọ ọfa, ọtiọyena me da ta ota kẹ evo vwẹ usun rẹ ihwo ri ruiruo rẹ ebanbọn na kpahọn. Me da nẹrhovwo rhe Ọghẹnẹ, ẹdẹ ihwe vwọ wan nu ohwo ro ke bru vwe rhe ẹsosuọ ye, kọyen rhoma rhivwin rhe. O de jiro kẹ vwẹ nẹ avwanre rhoma tuẹn uyono na phiyọ, me da rhọnvwe vẹ omavwerhovwẹn. Ugege yena o de durhie uvwe kpo uyono vwẹ Ọguan Ruvie. Me da rhọnvwe. Me je rhe mrẹ obo re me mrẹre ẹdẹ yena dẹvo-o! O krakpọ re me vwọ guọnọ ihwo ri vwo ẹguọnọ rẹ ohwohwo rẹ oma je vwerhan. Asaọkiephana me mrẹ ayen re!

“Vwo nẹ ọke yena yanran ki mi kpo emẹvwa na eje. Omarẹ idughwrẹn erha vwọ wan nu, me da dobọ rẹ isigati ephopho ji. Mi de do ẹbe re me vwọ fan otọ rẹ isio kugbe uhworo ri churobọ si idẹbono kufia, ọtiọyena, mi rhe rhiẹromrẹ ukpokpoma rẹ emekashe rẹ idẹbono ọfa-a. Ki mi yeren akpọ nene iwan ri Jihova rọhẹ Baibol na. Emeranvwe erha vwọ wan nu, me da ton iruo rẹ aghwoghwo phiyọ. Emeranvwe esan vwọ wan nu mi de bromaphiyame. Ẹdẹ ivẹ vwọ wan nu, me da ton iruo ọkobaro rẹ ubrọke phiyọ.

“Me kpẹvwẹ Jihova vwọ kẹ emu esiri eje ro ru kẹ vwẹ. Akpeyeren mẹ rhi vwo otọ re. Vwọrẹ uyota, odẹ ri Jihova ọyen ohẹrhe rode re me djẹro rere me sa vwọ mrẹ adjarhọ kugbe ochọnvwe. (Isẹ 18:10) Oma kọ vwerhen ovwẹ kerẹ ọbuine ro si ọbe rẹ Une Rẹ Ejiro 84:10: ‘Kidie ẹdẹ ọvo vwẹ eguan wẹn o yovwi nọ uriori vwẹ asan ọfa. O fori re me dia ọrhẹrẹ ẹchẹ vwẹ uwevwi rẹ Ọghẹnẹ mẹ nọ re me da dia itughẹ rẹ ihwo imwemwu.’ ”

Aye nana ro vwo ẹwẹn esiri na da rhe mrevughe nẹ akpeyeren vwo otọ. Ọtiọyen ji te kohwo kohwo rọ hiẹ guọnọ Jihova vẹ ẹwẹn esiri.