Lipoti lya Ŵakulalichila ya Uchimwene

Jwamanyilile Kuti Umi Wakwe Ukwete Chakulinga

YESU jwasasile kuti akusasimanyilila ngondolo syakwe. (Yohane 10:14) Naga mundu akwete mtima wambone soni akusanonyela mtendele ni chilungamo, mpaka aŵe jwakumkuya jwakwe. Mundu jweleju mpaka apate yindu yakusosekwa mnope ya paumi mpela muyaŵelele ni jwamkongwe jwine jwa ku Belgium. Apikane ngani jakwe:

“Ŵa Mboni sya Yehofa paŵayiche pa nyumba jangu, umi wangu nawuwonaga kuti wangali masengo mwamti nasakaga kuliwulaga. Nayinonyele yaŵasalile mwampaka mwalanile ni yakusawusya yanasimanaga nayo nambo nganasala kuti Mlungu ni jwakusatendekasya yeleyo. Pamasile yaka 8 chilechele kwawula ku chalichi ligongo lya yindu yangali chilungamo yanayiwonaga kweleko. Ni ŵamboniwo nalijiganyise panandi kuti yindu nganiŵa yikujendele naga ngawukumkulupilila Mlungu.

“Chakutesya chanasa chili chakuti ali agambile kunjendela kwa masiku gamnono nalesile kulijiganya. Mwamti yasokonechele kwabasi. Namalisisyaga yipaketi yiŵili ya sona pa lisiku soni namwaga mitela jakusokonasya mtwe. Pakusaka kuti lumbikaneje ni anganga ŵangu ŵaŵawile, natandite kutenda ya misimu. Yaliji yakutesya woga ligongo pangonile chilo, yiŵandayi yalagasyaga mnope. Yeleyi yatendekwe kwa miyisi nditu. Chilo chilichose natendaga woga soni nalipikanaga kuti ndili jika.

“Nambo lisiku line ndili nganichisye yakwenda msewo wakulekangana ni wanajendaga ndaŵi syosope, naweni ŵandu ali mkutaŵa chinechakwe. Kwa une nasimonjele kwawona ŵandu ŵajinji ali pamalopo. Panaŵandichile nayiweni kuti ŵaliji ŵa Mboni sya Yehofa ŵaŵataŵaga Nyumba ja Uchimwene. Pandaŵiji nakumbuchila ya ŵa Mboni ŵaŵayikaga ku nyumba jangu mwamti naganisya kuti umi mpaka uŵe wambone pachilambopa naga ŵandu akutenda yindu mpela muŵatendelaga jemanjaji.

“Nasachililaga ŵa Mboni ali mkwika kunyumba jangu mwamti naŵechetene ni jumo mwa ŵandu ŵaŵakamulaga masengoga. Napopesile kwa Mlungu kaneko panyuma pa masiku 10, mundu juŵanjiganyaga kundanda jula jwayiche ku nyumba jangu. Ali ayiche jwasaile kuti tupitilisye kulijiganya Baibulo mwamti nakundile. Ndaŵi jijojo jwasalile kuti tukatende misongano ku Nyumba ja Uchimwene. Ni nakundile kwawula. Yanayiweni kweleku yali yakuti nganinayiwoneje. Kwa ndaŵi jelewu mbele ndi mkuwungunya ya ŵandu ŵakusanonyelana jwine ni mjakwe. Mwamti kweleku ni kunapatile ŵanduŵa.

“Kutyochela pandaŵiji natandite kusimanikwa pa misongano josope. Pali pamasile mawiki gatatu nalesile kwemba soona. Konjechesya pelepa najasile mabuku soni nyimbo syakwayana ni masimu ni chakulinga chakuti jikalagasyaga. Natesile yakuti ndendeje yindu yakamulana ni yakusasaka Yehofa mwamti pali masile miyesi jitatu natandite kulalichila. Pali pamasile miyesi 6 nabatisidwe. Kaneko pali pamasile masiku gaŵili natandite upayiniya wakamuchisya.

“Ngumyamichila mnope Yehofa pa yindu yambone yosope yandendele. Apano nguwona kuti umi wangu ukwete chakulinga. Kusala yisyene lina lya Yehofa lili lyamachili soni kwa jwalakwe ni kwampaka mbate chikamuchisyo. (Misyungu 18:10) Ngusalipikana mpela muŵalipikanilaga jwamalumbo paŵalembaga Salimo 84:10. Jwalakwe jwatite, ‘Kutama lisiku limope m’Nyumba jawo, chili chakunonyelesya mnope kulekangana ni kutama masiku gamajinji kwine kulikose. Nganonyelwe kuŵa jwakulimbichila pa mlango wa Nyumba ja AMBUJE jwangu kulekangana ni kutama m’Nyumba sya ŵandu ŵakusakala.’”

Msimayiju jwapatile chakulinga cha umi. Myoyo jwakusamsosasosa Yehofa ni mtima wambone mpaka atende yeleyi.