Sugilanon sang Kabuhi

Pagpasalamat kay Jehova​—⁠Paagi sa Bug-os Tion nga Pag-alagad!

PANUGIRON NI STANLEY E. REYNOLDS

Natawo ako sa London, Inglaterra, sang 1910. Pagkatapos sang Bug-os Kalibutan nga Inaway I, nagsaylo ang akon mga ginikanan sa magamay nga minuro sa Wiltshire nga ginatawag Westbury Leigh. Sang lamharon pa ako, pirme ako nagapalibog, ‘Sin-o ang Dios?’ Wala sing makasugid sa akon. Kag indi ko mahangpan kon ngaa ang amon magamay nga komunidad nagakinahanglan sing duha ka kapelya subong man sing simbahan agod simbahon ang Dios.

SANG 1935, apat ka tuig antes magsugod ang Bug-os Kalibutan nga Inaway II, nagbisikleta kami sang akon manghod nga lalaki, nga si Dick, pakadto sa Weymouth sa bagatnan nga baybayon sang Inglaterra para magpiknik. Samtang nagapungko kami sa amon tolda nga nagapamati sa nagatulo nga ulan kag nagapalibog kon ano ang himuon, isa ka tigulang nga lalaki ang nagpalapit kag nagtanyag sa akon sing tatlo ka balasahon nga nagabulig sa pagtuon sa Biblia​—⁠The Harp of God, Light I, kag Light II. Ginkuha ko ini, nga nalipay nga may mabasa agod madula ang kataka. Gilayon nga nawili ako sa akon nabasahan, apang wala ako sing hinalung-ong nga bag-uhon sini sing bug-os ang akon kabuhi​—⁠kag sang akon man manghod.

Sang pagpauli ko, ang akon iloy nagsugid sa akon nga si Kate Parsons, nga nagapuyo sa amon minuro, nagapanagtag sing amo man nga sahi sang literatura sa Biblia. Kilala gid sia bangod, bisan medyo tigulang na, nagamotorsiklo sia agod duawon ang mga tawo sa amon nagalinapta nga komunidad. Nakigkita ako sa iya, kag malipayon nga ginhatagan niya ako sing mga libro nga Creation kag Riches subong man sing iban pa nga mga publikasyon sang Watch Tower Society. Ginsugiran man niya ako nga isa sia sang mga Saksi ni Jehova.

Sa tapos mabasa ang mga libro upod sa akon Biblia, nahibal-an ko nga si Jehova amo ang matuod nga Dios kag luyag ko sia simbahon. Gani nagpadala ako sing sulat sa paghalin sa amon simbahan kag  nagsugod sa pagtambong sa pagtinuon sa Biblia sa puluy-an nanday John kag Alice Moody. Nagapuyo sila sa Westbury, ang banwa nga pinakamalapit sa amon. Pito lamang kami nga nagatambong sa amo nga mga miting. Antes kag pagkatapos sang miting, nagatokar si Kate Parsons sing harmonium samtang ginaamba namon sing hanuot ang mga ambahanon sang Ginharian!

Una nga mga Adlaw

Nakita ko nga nagakabuhi kami sa importante nga mga tion, kag luyag ko gid nga makapakigbahin sa pagbantala nga hilikuton nga gintagna sa Mateo 24:⁠14. Gani nag-untat ako sa pagpanigarilyo, nagbakal sing bag, kag nagdedikar sa Dakung Dios, si Jehova.

Sang Agosto 1936, nagduaw si Joseph F. Rutherford, presidente sang Watch Tower Society, sa Glasgow, Scotland, agod magpamulongpulong sa tema nga “Armagedon.” Bisan pa ang Glasgow mga 600 kilometros ang kalayuon, determinado gid ako nga magtambong kag magpabawtismo sa amo nga kombension. Kulang ang akon kuwarta, gani ginsakay ko ang akon bisikleta sa tren pakadto sa Carlisle, isa ka banwa sa dulunan sang Scotland, kag nagbisikleta halin didto sing 160 kilometros pa aminhan. Ginbisikleta ko man ang daku nga bahin pauli, nagpauli nga lapyo sa pisikal apang napabakod sa espirituwal.

Kutob sadto, nagabisikleta ako sa kada tion nga nagalakat ako sa pagpaambit sang akon pagtuo sa mga tawo sa kaingod nga mga minuro. Ang kada Saksi sadto may yara testimony card nga may Makasulatanhon nga mensahe para basahon sang mga tagbalay. Naggamit man kami sing mabitbit nga mga ponograpo agod patokaron ang mga plaka sang mga pamulongpulong sa Biblia sang presidente sang Sosiedad. Kag, siempre, pirme kami may bag para sa mga magasin,⁠ * nga nagapakilala sa amon subong mga Saksi ni Jehova.

Pagpayunir sa Tion Sang Inaway

Ang akon manghod ginbawtismuhan sang 1940. Ang ikaduha nga bug-os kalibutan nga inaway nagsugod sang 1939, kag nakita namon ang hilingagawon nga pagkinahanglan para sa bug-os tion nga mga manugbantala. Gani, naghatag kami sang amon mga aplikasyon sa pagpayunir. Nagpasalamat kami nga maasayn sing magkaupod sa puluy-an sang mga payunir sa Bristol, agod magbuylog kanday Edith Poole, Bert Farmer, Tom kag Dorothy Bridges, Bernard Houghton, kag sang iban pa nga mga payunir nga ang pagtuo madugay na namon gindayaw.

Wala magdugay nag-abot ang isa ka magamay nga van nga may nasulat nga “JEHOVAH’S WITNESSES” sa mga kilid sini sa madukot nga mga letra agod sugaton kami. Ang drayber amo si Stanley Jones, nga nangin misyonero sang ulihi sa China kag ginbartolina didto sa sulod sang pito ka tuig bangod sang iya pagbantala nga hilikuton.

Samtang nagpadayon ang inaway, talagsa lang  gid kami nagatulog sa bug-os nga gab-i. Nagakahulog ang mga bomba sa palibot sang amon puluy-an sang mga payunir, kag dapat kami pirme mag-andam sa mga butang nga magakalayo kon imo matandog. Isa ka gab-i nagbiya kami sa sentro sang Bristol pagkatapos sang isa ka maayo gid nga asambleya nga gintambungan sang 200 ka Saksi kag nakalambot kami sa amon puluy-an nga wala mahaliti sang basiyo sang bala nga ginapaulan sa mga eroplano sa inaway.

Pagkaaga nagbalik kami ni Dick sa siudad agod kuhaon ang pila ka butang nga nabilin namon. Nakibot gid kami. Nahapay gid ang Bristol. Ang bug-os nga sentro nga siudad nalaglag kag nasunog. Ang Park Street, nga ginatindugan sang amon Kingdom Hall, nangin isa ka tumpok sang nagaaso nga kagulub-an. Apang, wala sing mga Saksi nga napatay ukon nahalitan. Sing makalilipay, nakuha na namon ang amon mga literatura sa Biblia sa Kingdom Hall kag ginpanagtag sa mga puluy-an sang mga katapo sang kongregasyon. Ginpasalamatan namon si Jehova bangod sini.

Wala Ginapaabot nga Kahilwayan

Ang Kongregasyon sang Bristol diin nagaalagad ako subong nagadumala nga manugtatap nagdamo tubtob sa 64 ka ministro sang tion nga nabaton ko ang akon mga papeles para magsoldado. Madamo pa nga Saksi ang ginbilanggo bangod sang ila neutral nga tindog, kag ginpaabot ko nga ang akon kahilwayan sa pagbantala mauntat man. Ginbista ang akon kaso sa isa ka lokal nga Bristol Tribunal diin si Utod Anthony Buck, isa anay ka opisyal sang bilangguan, nagtiglawas sa akon. Isa sia ka maisog, walay kahadlok nga tawo, isa ka malig-on nga manugsakdag sang kamatuoran sa Biblia, kag subong resulta sang iya maayo nga pagtiglawas, wala ginapaabot nga ginhatagan ako sing bug-os nga kahilwayan gikan sa pagsoldado sa kondisyon nga magpadayon ako sa akon bug-os tion nga ministeryo!

Nakunyag gid ako sa akon kahilwayan, kag determinado ako nga gamiton ini sa pagbantala tubtob sa pinakadaku nga kasangkaron subong posible. Sang ginpareport ako sa sanga talatapan sa London agod makighambal kay Albert D. Schroeder, ang manugtatap sa sanga, nagpalibog gid ako kon ano ang nagahulat sa akon. Handurawa lamang ang akon kakibot sang gin-agda ako nga magkadto sa Yorkshire agod mag-alagad subong nagalakbay nga manugtatap, nagaduaw sa nanuhaytuhay nga kongregasyon kada semana agod buligan kag palig-unon ang mga kauturan. Nagbatyag ako nga di-sangkol sa amo nga asaynment, apang hilway na ako gikan sa pagsoldado kag hilway sa paglakat. Gani ginbaton ko ang panuytoy ni Jehova kag kinabubut-on nga naglakat.

Ginpakilala ako ni Albert Schroeder sa mga kauturan sa asambleya sa Huddersfield, kag sang Abril 1941, ginsugdan ko ang akon bag-o nga asaynment. Makalilipay gid nga makilala yadtong mahal nga mga kauturan! Bangod sang ila gugma kag kaayo, naapresyar ko sing kapin pa nga si Jehova may katawhan nga debotado sing bug-os sa iya nga nagahigugmaanay.​—⁠Juan 13:⁠35.

Dugang Pa nga mga Pribilehiyo sa Pag-alagad

Ang di-malimtan nga lima-ka-adlaw nga pungsudnon nga kombension ginhiwat sang 1941 sa  De Montfort Hall sa Leicester. Walay sapayan sang maiwat nga kalan-on kag limitado nga pungsudnon nga transportasyon, ang tumalambong nagdugang tubtob sa kadamuon nga 12,000 sang Domingo; apang, may kapin lamang sa 11,000 ka Saksi sadto sa pungsod. Ginpatokar ang narekord nga mga pamulongpulong sang presidente sang Sosiedad, kag ginpaguwa ang libro nga Children. Yadto nga kombension isa gid ka importante nga hitabo sa teokratikong maragtas sang katawhan ni Jehova sa Britanya, kay ginhiwat ini sa tion sang Bug-os Kalibutan nga Inaway II.

Wala magdugay pagkatapos sini nga kombension, nakabaton ako sing imbitasyon nga mag-alagad upod sa pamilya Bethel sa London. Nagtrabaho ako didto sa mga departamento sang shipping kag packing kag sang ulihi sa opisina, nagauyat sing mga butang may kaangtanan sa mga kongregasyon.

Dapat atubangon sang pamilya Bethel ang mga pagsalakay sang mga eroplano sa London gab-i kag adlaw, subong man ang pirme nga pag-usisa sang mga awtoridad sa may katungdanan nga mga kauturan nga nagatrabaho didto. Sanday Pryce Hughes, Ewart Chitty, kag Frank Platt ginbilanggo tanan bangod sang ila neutral nga tindog, kag sang ulihi gintapok si Albert Schroeder sa Estados Unidos. Walay sapayan sining mga pag-ipit, ang mga kongregasyon kag mga intereses sang Ginharian padayon nga ginaatipan sing maayo.

Padayon Tubtob sa Gilead!

Sang natapos ang inaway sang 1945, nag-aplay ako sa misyonero nga paghanas sa Watchtower Bible School of Gilead kag nabaton para sa ikawalo nga klase sang 1946. Naghimo ang Sosiedad sing kahimusan para sa pila sa amon, lakip sanday Tony Attwood, Stanley Jones, Harold King, Don Rendell, kag Stanley Woodburn, nga maglayag gikan sa pantalan sa pagpangisda sang Fowey sa Cornwall. Isa ka lokal nga Saksi ang nagpatigayon sang amon pagsakay sa isa ka magamay nga de-karga nga barko nga nagakarga sing china clay. Ang amon tululugan makitid kaayo kag ang salog tubigon. Naumpawan kami sang nag-abot gid man kami sa amon dulungkaan nga pantalan, ang Philadelphia!

Ang eskwelahan sang Gilead nahamtang sing matahom sa South Lansing sa naaminhan sang New York, kag ang paghanas nga nabaton ko didto importante gid sa akon. Ang mga estudyante sa amon klase naghalin sa 18 ka pungsod​—⁠ang una nga tion nga ang Sosiedad nagpaeskwela sing madamo gid nga ministro halin sa iban nga pungsod​—⁠kag kami tanan nangin suod nga mga mag-abyan. Naluyagan ko gid ang pagpakig-upod sa akon kaupod sa hulot, si Kalle Salavaara nga halin sa Finland.

Madasig nga nagligad ang panahon, kag sa hingapusan sang lima ka bulan, ang presidente sang Sosiedad, si Nathan H. Knorr, nag-abot halin sa ulong-talatapan sa Brooklyn sa paghatag sa amon sang amon mga diploma kag sa pagsugid sa amon kon diin ang amon mga teritoryo. Sadtong mga adlaw, wala mahibaluan sang mga estudyante ang ila destinasyon tubtob nga ipahibalo ini sa seremonya sang gradwasyon. Gintangdo ako nga magbalik sa London Bethel agod padayunon ang akon hilikuton didto.

Balik sa London

Ang mga tinuig sa tapos sang inaway mabudlay sa Britanya. Ang kalan-on kag ang madamo iban pa nga mga kinahanglanon, lakip ang papel, padayon nga maiwat. Apang nalampuwasan namon ini, kag nag-uswag ang mga intereses sang Ginharian ni Jehova. Dugang pa sa pagtrabaho sa Bethel, nag-alagad ako sa distrito kag sirkito nga mga asambleya kag nagduaw sa mga kongregasyon, lakip ang pila sa Ireland. Isa man ka pribilehiyo nga nakilala si Erich Frost kag ang iban pa nga mga kauturan halin sa Europa kag nakatuon sa ila sing pila ka butang tuhoy sa integridad sang mga masigka-Saksi nga nag-atubang sang kakugmat sa mga kampo konsentrasyon sang mga Nazi. Isa gid ka pagpakamaayo nga pribilehiyo ang pag-alagad sa Bethel.

Sa sulod sang napulo ka tuig nakilala ko si Joan Webb, isa ka espesyal payunir nga nagaalagad sa Watford, isa ka banwa sa aminhan lamang sang London. Sang 1952 nagpakasal kami. Luyag namon nga duha nga makapadayon sa bug-os tion nga pag-alagad, gani nalipay gid kami sang, pagkatapos nga naghalin ako sa Bethel, gintangdo ako subong manugtatap sa sirkito. Ang amon una nga sirkito amo ang panghigaron sang bagatnan nga baybayon sang Inglaterra, sa Sussex kag Hampshire. Ang hilikuton sa sirkito indi mahapos sadto. Nagalakbay kami paagi sa bus, bisikleta, kag nagalakat. Madamo nga kongregasyon ang may daku, uma nga mga teritoryo, nga masami mabudlay kadtuan, apang padayon nga nagadamo ang mga Saksi.

Siudad Sang New York 1958

Sang 1957, nakabaton ako liwat sing imbitasyon sa Bethel: “Luyag mo bala magkadto sa opisina kag magbulig sa mga kahimusan sa paglakbay para sa palaabuton nga internasyonal nga asambleya nga pagahiwaton sa Yankee Stadium kag sa Polo Grounds sa Siudad sang New York sa 1958?”  Wala magdugay masako na kami ni Joan sa pagbaton sing mga aplikasyon gikan sa mga kauturan para sa gin-arkilahan nga mga eroplano kag mga barko sang Sosiedad. Nagresulta ini sa bantog nga Divine Will International Assembly, nga gintambungan sang 253,922 kadamo nga tumalambong. Sa sini nga kombension, 7,136 ang nagsimbulo sang ila dedikasyon kay Jehova paagi sa pagpatugmaw sa tubig​—⁠kapin sa doble nga kadamuon sang ginbawtismuhan sa maragtason nga okasyon sang Pentecostes 33 C.⁠E., suno sa ginreport sa Biblia.​—⁠Binuhatan 2:⁠41.

Indi gid namon ni Joan malimtan ang kaayo ni Utod Knorr sang gin-agda niya kami sing personal nga magtambong sa asambleya sa pagbulig sa pag-atipan sa mga delegado nga nagaabot sa Siudad sang New York halin sa 123 ka pungsod. Isa yadto ka makalilipay kag makaalayaw nga eksperiensia para sa amon.

Mga Pagpakamaayo sa Bug-os Tion nga Pag-alagad

Sang pagbalik namon, nagpadayon kami sa nagalakbay nga hilikuton tubtob nga nag-utwas ang mga balatian. Naospital si Joan kag na-stroke ako sing indi gid man grabe. Nag-espesyal payunir kami apang sang ulihi may pribilehiyo nga mag-alagad liwat sing temporaryo sa sirkito nga hilikuton. Sang ulihi nagbalik kami sa Bristol diin nagpabilin kami sa bug-os tion nga pag-alagad. Ang akon manghod, si Dick, nagapuyo sa malapit upod sa iya pamilya, kag masunson kami nagahinumdom sang nagligad.

Sang 1971, nahalitan gid ang akon panulok bangod sang deperensia sa mga retina. Kutob sadto nabudlayan gid ako magbasa, gani nasapwan ko ang narekord sa cassette nga mga literatura sa Biblia nga isa ka makalilipay nga aman gikan kay Jehova. Nagadumala gihapon kami ni Joan sing mga pagtuon sa Biblia, kag sa sulod sang mga tinuig, may pribilehiyo kami nga mabuligan ang mga 40 ka indibiduwal nga makatigayon sing ihibalo sang kamatuoran, lakip ang isa ka pamilya nga may pito ka katapo.

Sang gindedikar namon ang amon kabuhi kay Jehova sang nagligad nga kapin sa 60 ka tuig, handum namon nga magsulod sa bug-os tion nga pag-alagad kag magpabilin sa sini. Nagapasalamat gid kami nga may yara kami gihapon kusog sa pag-alagad sa Daku nga Jehova​—⁠ang lamang nga paagi nga makapasalamat kami sa iya bangod sang iya kaayo sa amon kag sang amon tinuig sang kalipay nga magkaupod!

[Nota]

[Retrato sa pahina 25]

Upod sa akon manghod nga si Dick (sa pinakawala; si Dick nagatindog) kag ang iban pa nga mga payunir sa atubangan sang puluy-an sang mga payunir sa Bristol

[Retrato sa pahina 25]

Ang puluy-an sang mga payunir sa Bristol sang 1940

[Retrato sa pahina 26]

Sanday Stanley kag Joan Reynolds sa adlaw sang ila kasal, Enero 12, 1952, kag sa karon