Malu a mu nsombelu

Tudi mu mudimu wa ku dîba ne ku dîba bua kuela Yehowa tuasakidila!

MALONDA KUDI STANLEY E. REYNOLDS

Mbandelele mu Londres, mu ditunga dia Angleterre mu 1910. Kunyima kua Mvita ya Kumpala ya Buloba bujima, baledi banyi bakaya mu kasoko kavua mu Wiltshire, kadibu babikila ne: Westbury Leigh. Pantshivua muana, mvua ndiebeja misangu mivule ne: ‘Nzambi nnganyi?’ Kakuvua muntu uvua mua kungandamuna. Ne tshivua mumanye tshivuabu bashile nzubu ibidi mijima ya masambila ne tshitanda tshimuepele bua kutendelela Nzambi to.

MU 1935, bidimu binayi kumpala kua Mvita Mibidi ya Buloba bujima kubudikayi, meme ne Dick (muakunyanyi wa balume), tuakenza luendu ku makalu batangile ku Weymouth ku muelelu wa mâyi lua ku Sud kua Angleterre bua kudilaku dikisha. Dimue edi patuvua basombe mu kazubu ketu ka ntenta tuteleja muvua mvula wa mudimbi uloka ne tudikonka tshia kuenza, muntu mukuabu mukulakaje wa malu malenga wakalua kumpesha mikanda isatu (ya mu Anglais) ya kulonga nayi Bible: wa La Harpe de Dieu, wa Lumière I ne wa Lumière II. Meme kuyangata ne kusanka mumvua muyipete bua kuikala nyibala. Malu angakabala akankoka diakamue, kadi musangu au tshivua ngela meji ne: avua mua kushintulula nsombelu wanyi mujima ne wa muakunyanyi Dick nansha.

Pangakapingana kuetu, mamu wakangambila ne: Kate Parsons (muntu mukuabu wa mu musoko wetu) uvua muabanyine bantu mikanda ya muomumue ne ivuabu bampeshe. Kate uvua mumanyike bikole bualu, nansha mukavuaye mukulakaje bikole, uvua uya ne katukutuku bua kutangila bantu mu musoko wetu. Meme kuya kamutangila, ne disanka dionso kumpeshaye mukanda (mu Anglais) wa Création ne wa Richesse pamue ne mikanda mikuabu ya Bantemu ba Yehowa. Wakangambila kabidi ne: uvua Ntemu wa Yehowa.

Pangakabala mikanda ayi ne Bible, ngakamanya ne: Yehowa ke Nzambi mulelela, ne ngakalonga mushindu wa kumutendelela. Nunku ngakafundila bena tshitendelelu tshianyi mukanda wa dipatukamu ne meme kutuadija kulonda malongesha a mu  Bible kua John ne Alice Moody. Bavua basombele mu tshimenga tshia Westbury tshivua pabuipi netu. Tuvua bantu muanda-mutekete patupu bavua babuela mu bisangilu abi. Kumpala kua bisangilu ne kunyima kuabi, Kate Parsons uvua wimba tshiombelu tshia harmonium tuetu bonso eku tuimba misambu ya Bukalenge ne mêyi makole.

Ntuadijilu

Pangakamona ne: tuvua mu tshikondo tshikole, ngakajinga bua kuenza panyi mudimu wa buambi udibu bamanyishe mu Matayo 24:14. Ke meme kulekela mfuanka, kusumba tshibuta tshia kuela mikanda ya kuyisha nayi ne kudilambula kudi Yehowa Nzambi Munene.

Mu ngondo wa muanda-mukulu mu 1936, Joseph Rutherford (uvua mulombodi wa Société Watch Tower) wakalua mu tshimenga tshia Glasgow (mu ditunga dia Écosse) bua kuenza muyiki uvua ne tshiena-bualu etshi: “Armagedone.” Nansha muvua tshimenga tshia Glasgow tshikale mutantshi wa kilometre mitue ku 600, ngakapangadija bua kuyamu bua kutambula mu mpungilu au. Bu mumvua tshiyi ne makuta a nsongo to, ngakabuela ne dikalu dianyi ku kawulu mutangile ku Carlisle, tshimenga tshidi ku mukalu wa Écosse, kumbukila muaba au ngakenza kabidi kilometre 160 lua dikalu mutangile ku Nord. Bua kupingana kuetu, ngakenda kabidi tshitupa tshile ku dikalu, mubidi wonso munzengele kadi mu nyuma mvua ne bukole.

Kubangila anu pinapu, mvua nya ne dikalu dîba dionso dimvua nya bua kuyisha bantu ba mu misoko ya pabuipi. Tshikondo atshi Ntemu yonso uvua ne karte ka buambi kavua ne mêyi a mu Bible avua bantu batuvua tupeta mua kubala. Tuvua kabidi tuela matadi a fono ya mikese avua ne miyuki miangatshila mu Bible ivua mulombondi wa Société muenze. Tshibuta * tshia bibejibeji tshituvua tuambula misangu yonso tshivua tshimanyisha bantu ne: tuvua Bantemu ba Yehowa.

Bampanda-njila mu tshikondo tshia mvita

Dick wakatambula mu 1940. Bu mukavua Mvita mibidi ya buloba bujima mituadije mu 1939, tuakamona bubidi buetu muvuabi bikengela kupeta lukasalukasa bayishi ba ku dîba ne ku dîba. Ke bualu kayi tuakalomba bua kutuadija mudimu wa bumpanda-njila. Tuakanyisha pakatutumabu bua kusombela pamue ku nzubu wa bampanda-njila mu tshimenga tshia Bristol. Tuakasanganaku Edith Poole, Bert Farmer, Tom ne Dorothy Bridges, Bernard Houghton, ne bampanda-njila bakuabu batuvua tuanyisha bua mushindu uvuabu ne ditabuja.

Matuku ne ndepe, mashinyi makese avuabu bafunde (mu Anglais) ku nseke yonso ibidi ne maleta manene ne: “BANTEMU BA YEHOWA,” kuluawu kutuambula. Muendeshi uvua Stanley Jones, wakalua misionere mu ditunga dia Chine ne wakelabu mu buloko bua pa nkayende munkatshi mua bidimu muanda-mutekete, anu bualu uvua uyisha.

 Bu muvua mvita yenda itungunuka, katuvua kabidi tutamba kulala tulu butuku bujima to. Bombe ivua ikuluka pabuipi ne nzubu utuvua, ne bivua bikengela kushala anu batabale bualu bavua bakupa bia-mvita bivua biosha nzubu. Dimue dituku ku dilolo tuakamuangala mu tshimenga tshia Bristol kunyima kua mpuilu mulenga uvuabu babuele kudi Bantemu 200, tuetu kuya kabuela ku nzubu bua kuepukaku njiwu, tuenda tunyemena muinshi mua masashi a bingoma binene avuabu basa ndeke ya mvita.

Dituku diakalonda mu dinda, meme ne Dick tuakapingana mu tshimenga atshi bua kuangata bimue bintu bituvua bashiye. Tuakakema bikole menemene. Bintu bionso mu Bristol bivua bivingakaja. Bavua banyangakaje tshimenga etshi tshijima ne batshioshe tshionso nkong. Nzubu wetu wa Bukalenge uvua ku njila uvuabu babikila ne: Park Street uvua mushale anu mushiki wa bibuwa bivua bifuima muishi. Nansha nanku, Ntemu nansha umue kakafua anyi kutapika to. Tuvua ne diakalenga mutukavua bumbushe mikanda yetu ya malu a Bible ku Nzubu wa Bukalenge bayabanye ku nzubu ya bana betu ba mu tshisumbu. Tuakela Yehowa tuasakidila bua malu onso aa.

Budikadidi butuvua katuyi batekemene

Mu tshisumbu tshia mu Bristol mumvua mutangidi muludiki mukavua bamanyishi ba lumu luimpe 64 dîba dingakapeta mikanda ivua immanyisha dimbueja ku bukole mu busalayi. Bakavua bele Bantemu bakuabu ba bungi mu buloko bualu bavua babenge bua kubuelakana mu mvita, ne mvua ngela meji ne: bavua mua kumpangisha panyi budikadidi bua kuyisha mu mushindu wa muomumue. Bakandumbuluisha ku Kabadi ka mu Bristol kuakangakuilabu kudi Muanetu Anthony Buck uvua mutangidi wa kale wa bena buloko. Uvua ne dikima ne muoyo mukole pavuaye wakula bua bulelela bua mu Bible. Bua mushindu uvuaye mungakuile (muanda umvua tshiyi mutekemene), bakangitabila bua tshibuedi mu busalayi, anu bu meme mua kutungunuka ne mudimu wa ku dîba ne ku dîba.

Ngakasanka bikole mumvua mupete budikadidi, nanku meme kupangadija bua kuyisha muanyi muonso. Pakambikilabu bua kuya ku biro bia filiale bia ku Londres bua kuyikila ne mutangidi wa filiale Albert Schroeder, ngakadiebeja bua kumanya tshivuabu bandongoluele. Ela meji disanka dimvua nadi pakangambilaye bua kuya ku Yorkshire bu mutangidi wa tshijengu bua kutangila tshisumbu tshimue ku lumingu luonso, kuambuluisha ne kukankamija bana betu! Ngakadimona tshiyi mukumbanyine mudimu eu to, kadi bu mumvua tshiyi kabidi ne bua kuenza busalayi, kakuvua tshivua mua kumpangisha bua kuya nansha. Nenku ngakitaba bua Yehowa kundombola, meme kuya ne muoyo muololoke.

Albert Schroeder wakammanyisha kumpala kua bana betu mu mpuilu wakenzekela mu tshimenga tshia Huddersfield, meme kutuadija mudimu wanyi eu mupiamupia mu ngondo muinayi wa 1941. Ngakasanka bikole bua kumanyangana ne bana betu basuibue abu. Dinanga ne malu abu malenga biakansaka bua kushindika menemene se: Yehowa udi ne bantu badi badifile kudiye ne muoyo mujima ne kabidi banangangane.​—Yone 13:35.

 Midimu mikuabu ya bungi

Mu 1941, mpungilu udi kayi kupua muoyo wa matuku atanu wa ditunga dijima wakenzeka mu De Montfort Hall mu tshimenga tshia Leicester. Nansha muvua biakudia ne mashinyi a mbulamatadi bikese menemene, bungi bua bantu bakabuelamu buakafika too ne ku 12 000 mu Dia lumingu; pabi, tshikondo atshi kuvua Bantemu batue amu ku 11 000 mu ditunga dijima. Bakela bande ya miyuki ivua mulombodi wa Société wetu muenze, kupatulabu ne mukanda wa Children (Bana). Mpungilu au uvua bushuwa umue wa ku mianda ya tshikuma mu nsombelu wa bantu ba Yehowa mu Grande-Bretagne, bualu bavua bamuenze munkatshi mua Mvita Mibidi ya Buloba bujima.

Mutantshi mukese panyima pa mpungilu eu, bakambikila bua kuenza mudimu pamue ne bana betu ba ku Betele wa ku Londres. Ngakenzaku mudimu mu tshibambalu tshia dituma bintu ne tshia dibikuta, pashishe ngakenza mudimu mu biro bua kutangila malu a bisumbu.

Bana betu ba mu dîku dia Betele bavua batata bikole bua bombe ivua ndeke yela butuku ne munya mu Londres, ne bua bena mbulamatadi bavua misangu yonso balua kukontolola bana betu bavua balombola midimu. Bakela Pryce Hughes, Ewart Chitty ne Frank Platt mu buloko bualu bavua babenge bua kubuelakana mu malu a tshididi, ne ndekelu wa bionso bakipata Albert Schroeder kumutumabu ku États-Unis. Nansha muvuaku ntatu eyi, tuakatungunuka ne kukumbaja majinga a bisumbu ne kuenza midimu ya Bukalenge.

Ngakaya too ne ku Gilada

Pakajika mvita mu 1945, ngakalomba bua meme kuya kalonga bu-misionere ku Gilada (kalasa ka Société Watchtower) buobu e kuitaba dilomba edi bua kalasa ka muanda-mukulu mu 1946. Société wakalongolola bua tuetu kuangatshila mazuwa a mâyi ku tshitudilu tshia Fowey mu Cornouailles. Tuakaya ne Tony Attwood, Stanley Jones, Harold King, Don Rendell ne Stanley Woodburn. Ntemu mukuabu uvua mutukuatshile muaba mu mazuwa makese avua mambule dima dia kuenza nadi mabumba. Muaba utuvua tulala mu mazuwa aa uvua mufimpakane bikole, ne lutanda lua mazuwa luvua misangu yonso lubole ne mâyi. Tuakatukija mioyo patuakafika pabuipi ne Philadelphie, tshitudilu tshia kubuela mu tshimenga tshituvua tuya!

Tshilongelu tshia Gilada tshivua ku South Lansing ku Nord menemene kua New York, ne malu angakalongamu avua a mushinga wa bungi buanyi meme. Balongi ba mu kalasa ketu bavua bafumine mu matunga 18​—eu uvua musangu wa kumpala uvua Société mubikile basadidi bavule ba mu matunga a ku ba bende, ne tuakalua balunda ba dikema. Ngakasanka bikole mumvua musombe mu nzubu umue ne Kalle Salavaara uvua mufumine mu ditunga dia Finlande.

Matuku akapita lubilu, ne patuakafika ku ndekelu kua ngondo itanu, Nathan Knorr (uvua mulombodi wa Société) wakalua ufumina ku Brooklyn bua kutupesha mapoloma ne bua kutuambila miaba ituvua ne bua kuya kuenzela mudimu. Bikondo abi, balongi bavua bamanya miaba ivuabu babatuma anu dituku dia difila mapoloma. Bakampingaja ku Betele wa ku Londres bua meme kutungunuka ne mudimu wanyi.

Ndi mpingana ku Londres

Bidimu bia panyima pa mvita bivua bia dikenga dikole mu Grande-Bretagne. Bakatungunuka ne kuabanyina bantu biakudia ne bintu bikuabu bivule bia mushinga bu mudi mabeji. Nansha nanku, tuakapanduka ne midimu ya Bukalenge bua Yehowa yakaya kumpala. Pa kumbusha mudimu wa ku Betele, mvua ngambuluisha bua kulombola mpuilu ya distrike ne ya bijengu, ne mvua nkumbula bisumbu too ne bimue bia mu ditunga dia Irlande. Ngakasanka kabidi patuakapetangana ne Erich Frost ne bana betu bakuabu ba ku Mputu, ne patuakumvua bua lulamatu lua Bantemu netu bavuabu bakengeshe ne tshikisu mu maloko manene a bena Nazi. Mudimu wa ku Betele uvua dibenesha dinene menemene.

Kukavua bidimu dikumi katshia ngapetangana ne Joan Webb, mpanda-njila wa pa buende uvua mu Watford, tshimenga tshidi ku Nord kua Londres. Mu 1952 ngakamusela ne meme kumbuka ku Betele. Tuvua bonso ne dijinga dia kutungunuka ne mudimu wa ku dîba ne ku dîba, ke bua tshinganyi tuakasanka bikole pakantekabu mutangidi wa tshijengu. Tshijengu tshia kumpala tshituakenzela mudimu tshivua mu Sussex ne Hampshire, bimenga bia ku muelelu wa mâyi kuinshi kua Angleterre. Mudimu wa batangidi ba bijengu kauvua mupepele mu bikondo abi nansha. Tuvua tutamba kuenza ngendu ku mashinyi, ku makalu ne ku makasa. Bisumbu bia bungi bivua biyisha bipapu binene ku misoko. Ne misangu mivule bivua bikole buakufikaku, nansha nanku bungi bua Bantemu buvua anu buenda bubanda.

Mu New York City mu 1958

Mu 1957, bakantumina kabidi mukenji ku Betele bamba ne: “Udiku mua kuitaba bua kulua ku biro  bua kuambuluisha mu dilongolola malu a ngendu bua badi baya ku mpungilu wa bantu bumbukile mu matunga a bungi ukadi pa kuenzeka mu 1958 mu Yankee Stadium ne mu Polo Grounds mu tshimenga tshia New York City anyi?” Mutantshi mukese, meme ne Joan tuakatuadija kukonkonona mikanda ya bana betu bavua balombe bua kuenzela luendu ku ndeke ne mazuwa avua Société mufutshile. Mpungilu eu uvua ne tshiena-bualu tshia se: “Disua dia Nzambi,” uvua muende lumu bikole bualu bantu 253 922 bavua babuelemu. Mu mpungilu eu, bantu 7 136 bakaleja muvuabu badilambule kudi Yehowa pa kutambula (bungi ebu buvua bupite bua bantu bavudija misangu ibidi bakatambula dîba dia muanda wa tshikuma wa mu Pentekoste wa mu 33 B.B., mushindu udi Bible ubiamba).​—Bienzedi 2:41.

Meme ne Joan katuakupua malu malenga a Muanetu Knorr muoyo nansha kakese, muakatubikilaye bua kubuela mu mpuilu au bua kutangila bana betu ba mu matunga 123 bavua balua mu New York City. Mudimu au uvua muimpe ne wakatusankisha meme ne mukajanyi.

Masanka a mu mudimu wa ku dîba ne ku dîba

Diakamue patuakapingana, tuakatungunuka ne mudimu wa diendakana too ne pakalua masama kutukuata. Joan wakabuela mu lupitadi, meme panyi ngakapeta disama dia apoplexie. Tuakalua bampanda-njila ba pa buabu, kadi tuvua kabidi pashishe ne diakalenga dia kuambuluisha imue misangu mu mudimu wa tshijengu. Ndekelu wa bionso, tuakapingana ku Bristol kutudi batungunuke ne mudimu wa ku dîba ne ku dîba. Muakunyanyi wa balume Dick mmusombele ne dîku diende pamue ne muaba utudi, ne misangu mivule tutu tumuvuluka.

Mu 1971 mêsu anyi akanyanguka kashidi. Katshia anu pinapu ndi ntata bikole bua kubala, nunku ndi ngangata bande ya dibala dia mikanda ya malu a mu Bible bu dipa dilenga didi Yehowa mutupe. Meme ne Joan tutshidi tulombola malonga a Bible, ne munkatshi mua bidimu bia bungi, tudi bapete ne diakalenga dia kuambuluisha bantu batue ku 40 bua kumanyabu bulelela, kusangisha ne dîku kampanda dia bantu muanda-mutekete.

Patuakadilambula kudi Yehowa (kukadi bidimu bipite pa 60), dijinga dietu divua dia kubuela mu mudimu wa ku dîba ne ku dîba ne kushalamu. Tudi ne dianyisha divule mututshidiku ne makanda a kukuatshila Mfumu Munene Yehowa mudimu, eu ke mushindu umuepele utudi mua kumuela tuasakidila bua malu mimpe adiye mutuenzele mu bidimu bia disanka bitudi benze meme ne mukajanyi!

[Mêyi adi kuinshi]

[Tshimfuanyi mu dibeji 25]

Meme ne muanetu Dick (ku dia bakaji; Dick mmuimane kuulu) ne bampanda-njila bakuabu kumpala kua nzubu utuvua mu Bristol

[Tshimfuanyi mu dibeji 25]

Nzubu utuvua wa mu Bristol mu 1940

[Bimfuanyi mu dibeji 26]

Stanley ne Joan Reynolds dituku dia dibaka diabu mu dia 12 Tshiongo 1952, ne lelu’eu