Phihlelo

Go Leboga Jehofa—Ka Tirelo ya Nako e Tletšego!

KA GE GO ANEGA STANLEY E. REYNOLDS

Ke belegetšwe London, Engelane ka 1910. Ka morago ga Ntwa ya I ya Lefase, batswadi ba-ka ba ile ba hudugela motsaneng o monyenyane wa Wiltshire wo o bitšwago Westbury Leigh. Bjalo ka lesogana, ke be ke dula ke ipotšiša gore, ‘Modimo ke mang?’ Go be go se na motho yo a bego a kgona go mpotša. Gomme ga se ka ka kwešiša lebaka leo ka lona setšhaba se senyenyane se bjalo ka sa rena se bego se nyaka nywako e mebedi ya thapelo gotee le kereke bakeng sa go rapela Modimo.

KA 1935, nywaga e mene pele ga go thoma ga Ntwa ya II ya Lefase, nna le moratho wa-ka Dick, re ile ra sepela ka dipaesekele ra ya Weymouth ka lebopong la ka borwa la Engelane bakeng sa go kampa nakong ya maikhutšo. Ge re dutše ka tenteng ya rena re theeditše pula ye e bego e tšhologa gomme re ipotšiša gore re ka dira eng, mokgalabje o ile a re etela gomme a nnea dipuku tše tharo tša go ithuta Beibele​—The Harp of God, Light I, le Light II. Ke ile ka di tšea e bile ke thabetše go hwetša selo seo se bego se tla ntloša bodutu. Kapejana ke ile ka tanywa ke seo ke bego ke se bala, eupša ka nako yeo ke be ke sa tsebe gore seo ke bego ke se bala se be se tla fetola bophelo bja-ka ka mo go feletšego​—le bja ngwanešo ka mo go swanago.

Ge ke boela gae, mma o ile a mpotša gore Kate Parsons yo a bego a dula motseng wa rena o aba mohuta o swanago wa dipuku tša Beibele. O be a tumile ka gobane gaešita le ge a be a tšofetše kudu, o be a namela sethuthuthu se senyenyane go ya go etela batho setšhabeng sa rena seo se gašanego. Ke ile ka ya go mmona, gomme o ile a thabela go nnea puku ya Creation le ya Riches gotee le dikgatišo tše dingwe tša Mokgatlo wa Watch Tower. O ile a ba a mpotša gore ke yo mongwe wa Dihlatse tša Jehofa.

Ka morago ga go bala dipuku gotee le Beibele ya-ka, ke ile ka tseba gore Jehofa ke Modimo wa therešo gomme ke be ke nyaka go mo rapela. Ka gona ke ile ka romela lengwalo la go tlogela kerekeng ya rena gomme ka thoma go ba gona dithutong tša  Beibele legaeng la John le Alice Moody. Ba be ba dula Westbury, toropo ya rena ya kgaufsinyana. Re be re le ba šupa feela dibokeng tšeo. Pele le ka morago ga diboka, Kate Parsons o be a letša harmonium ge re be re opela dikopelo tša Mmušo gotee ka mantšu a hlabošago!

Matšatši a Pele

Ke be ke kgona go bona gore re phela nakong ya bohlokwa, gomme ke ile ka rata go tšea karolo modirong wa boboledi woo go porofetilwego ka wona go Mateo 24:14. Ka gona, ke ile ka tlogela go kgoga, ka ithekela mokotla wa dipuku gomme ka dira boineelo go Modimo yo Mogolo, Jehofa.

Ka August 1936, Joseph F. Rutherford, mopresidente wa Mokgatlo wa Watch Tower o be a etetše Glasgow, Scotland go tlo bolela ka taba ya “Haramagedone.” Gaešita le ge Glasgow e be e le bokgole bja dikhilomithara tše 600, ke be ke ikemišeditše go ba gona moo gomme ke kolobetšwe kopanong yeo. Tšhelete ya-ka e be e hlaela, ka gona ke ile ka namela le paesekele ya-ka ka setimeleng seo se yago Carlisle, toropo ya mollwaneng wa Scotland, gomme ka sepela ka paesekele go tloga moo go ya bokgoleng bja dikhilomithara tše 160 ka leboa. Ke ile ka sepela ka paesekele leeto le letelele la ge ke boela gae, ka boa ke lapile mmeleng eupša ke matlafetše moyeng.

Go tloga ka nako yeo go ya pele, ke be ke sepela ka paesekele nako le nako ge ke e-ya go abelana tumelo ya-ka le batho bao ba lego metsaneng ya kgaufsi. Mehleng yeo Hlatse e nngwe le e nngwe e be e e-na le karata ya bohlatse yeo e bego e e-na le molaetša o tšwago ka Mangwalong bakeng sa gore beng ba magae ba o bale. Gape re be re diriša dikeremafomo tša go šikarwa bakeng sa go bapala direkhoto tša dipolelo tša Beibele tša mopresidente wa Mokgatlo. Ee, gape re be re rwala mokotla wa dimakasine * woo o bego o re hlaola re le Dihlatse tša Jehofa.

Go Bula Madibogo Nakong ya Ntwa

Ngwanešo o kolobeditšwe ka 1940. Ntwa ya bobedi ya lefase e be e thomile ka 1939, gomme bobedi bja rena re ile ra bona go nyakega mo go akgofilego ga go ba baboledi ba nako e tletšego. Ka gona re ile ra tsenya dikgopelo tša rena tša bobulamadibogo. Re be re thabile kudu go abelwa gotee legaeng la babulamadibogo la Bristol, moo re ile ra tlatša Edith Poole, Bert Farmer, Tom le Dorothy Bridges, Bernard Houghton le babulamadibogo ba bangwe bao tumelo ya bona re ilego ra e hlompha ka lebaka le letelele.

Bene e nyenyane yeo e ngwadilwego “DIHLATSE TŠA JEHOFA” ka mahlakoreng a yona ka ditlhaka tše dikoto kapejana e ile ya fihla bakeng sa go tlo re tšea. Mootledi e be e le Stanley Jones, yoo ka morago a ilego a ba moromiwa kua China le yoo a ilego a golegwa moo ka nywaga e šupago a le kgolegong ya bodula-noši a golegelwa modiro wa gagwe wa go ruta.

 Ge ntwa e be e tšwela pele, e be e e-ba ka sewelo moo re bego re robala bošego ka moka. Dipomo di be di e-wa go dikologa legae la rena la babulamadibogo, gomme re be re swanetše go lebelela ka mehla dilo tšeo di bego di ka baka mollo. Mantšiboeng a mangwe, re ile ra tloga lefelong leo le bego le e-na le badudi ba bantši la Bristol ka morago ga kopano e botse yeo go yona go bego go bile le Dihlatse tše 200 gomme ra fihla legaeng la rena leo ge go bapišwa le bego le šireletšegile, re phatša sefako sa makgapetla a dikolo tša dithunya tša go lwantšha difofane tše di hlaselago.

Mesong e latelago nna le Dick re ile ra boela motseng bakeng sa go ya go tšea dilo tše dingwe tšeo re bego re di tlogetše. Re ile ra tlabega. Bristol e be e senyegile. Motse ka moka o be o thuthupišitšwe gomme o fsele. Setarateng sa Park, moo Holo ya rena ya Mmušo e bego e le gona, go be go e-na le mokgobo wa dikago tše di sentšwego tšeo di bego di tupa muši. Lega go le bjalo, ga go na Dihlatse tšeo di bego di bolailwe goba di gobetše. Ka mo go thabišago, re be re šetše re tlošitše dipuku tša rena tša Beibele Holong ya Mmušo gomme re di abile magaeng a ditho tša phuthego. Re ile ra leboga Jehofa ditiragalong tše ka bobedi.

Tokologo e sa Letelwago

Phuthegong ya Bristol moo ke bego ke hlankela gona ke le molebeledi yo a okamelago, e be e godile go fihla go bagoeledi ba 64 ka nako ya ge ke amogela dipampiri tša-ka bakeng sa tirelo ya tša bohlabani. Dihlatse tše dingwe tše dintši di be di rometšwe kgolegong ka baka la boemo bja tšona bja boema-gare, gomme ke be ke letetše gore tokologo ya-ka ya go bolela e thibelwe ka mo go swanago. Molato wa-ka o ile wa theetšwa Kgorong ya Tsheko ya lefelong leo ya Bristol moo Ngwanešo Anthony Buck, yo e bego e le mohlankedi wa kgolego, a ilego a mpolelela. E be e le monna wa sebete yo a sa boifego, a sa tekeme bakeng sa go emela therešo ya Beibele, gomme ka baka la go bea ga gagwe mabaka gabotse, ka mo go sa letelwago ke ile ka ntšhwa ka mo go feletšego tirelong ya bohlabani ge feela ke be ke tla tšwela pele tirelong ya-ka ya nako e tletšego!

Ke be ke thabetše go hwetša tokologo ya-ka, gomme ke be ke ikemišeditše go e šomišetša go bolela go fihla bokgoleng bjo bogolo ka mo go ka kgonegago. Ge ke be ke amogela taletšo ya go ipega ofising ya lekala ya London go boledišana le Albert D. Schroeder, molebeledi wa lekala, ka tlwaelo ke ile ka ipotšiša gore ke eng seo se nkemetšego. Anke o nagane ka go makala ga-ka ge ke be ke laletšwa go ya Yorkshire go ya go hlankela moo bjalo ka molebeledi wa tikologo, ke etela diphuthego tše di fapa-fapanego beke e nngwe le e nngwe bakeng sa go thuša le go kgothatša banababo rena. Ke ile ka ikwa ke sa swanelege bakeng sa kabelo yeo, eupša ke be ke lokolotšwe gomme ke lokologile go ka sepela. Ka gona, ke ile ka amogela tlhahlo ya Jehofa gomme ka go ithatela ka ya.

Albert Schroeder o ile a ntsebiša banababo rena kopanong kua Huddersfield, gomme ka April 1941, ka thoma kabelong ya-ka e mpsha. E be e le lethabo gakaakang go tseba bana bao babo rena! Lerato la bona le botho bja bona di ile tša ntira gore ke leboge kudu gore Jehofa o na le batho bao ba ineetšego ka mo go feletšego go yena bao ba ratanago.​—Johane 13:35.

 Ditokelo tše di Oketšegilego tša Tirelo

Kopano ya naga ka moka e sa lebalegego ya matšatši a mahlano e be e swerwe ka 1941 kua Leicester’s De Montfort Hall. Go sa šetšwe go lekanyetšwa ga dijo le dinamelwa tša naga tšeo di bego di e-na le mellwane, palo e ile ya oketšega go fihla go tlhora ya ba 12 000 ka Sontaga; lega go le bjalo, ka nako yeo go be go e-na le Dihlatse tša ka godingwana ga 11 000 feela nageng. Go ile gwa bapalwa direkhoto tša dipolelo tša mopresidente wa Mokgatlo gomme puku ya Children e ile ya lokollwa. Kopano yeo e be e tloga e le e bohlokwa kudu historing ya pušo ya Modimo ya batho ba Jehofa kua Brithania, yeo go ka thwego e be e swaretšwe ka gare ga Ntwa ya II ya Lefase.

Kapejana ka morago ga kopano ye, ke ile ka amogela taletšo ya go ya go hlankela le lapa la Bethele ya London. Moo, ke ile ka šoma mafapheng a tša thomelo le a go phuthela gomme ka morago ke ile ka šoma ka ofising, ke swaragana le ditaba tšeo di lego mabapi le diphuthego.

Lapa la Bethele le be le swanetše go katana le tlhaselo ya moyeng kua London bošego le mosegare, gaešita le go fatišiša leboelela ga bahlankedi ba mmušo go banababo rena bao ba ikarabelago ba ba šomago moo. Pryce Hughes, Ewart Chitty le Frank Platt, ka moka ga bona ba ile ba išwa kgolegong ka baka la boemo bja bona bja boema-gare, gomme mafelelong Albert Schroeder o ile a hudušetšwa United States. Go sa šetšwe dikgateletšo tše, diphuthego le dikgahlego tša Mmušo di ile tša tšwela pele go hlokomelwa gabotse.

Go ya Gilead!

Ge ntwa e be e fela ka 1945, ke ile ka dira kgopelo ya tlwaetšo ya boromiwa Sekolong sa Beibele sa Watchtower sa Gilead gomme ka amogelwa sehlopheng sa bo-seswai ka 1946. Mokgatlo o ile wa rulaganyeletša ba mmalwa ba rena go akaretša Tony Attwood, Stanley Jones, Harold King, Don Rendell le Stanley Woodburn gore re sepele ka sekepe go tloga boema-kepeng bja go rea dihlapi bja Cornish bja Fowey. Hlatse ya lefelong e be e re beeleleditše leeto la rena la go fetela pele sekepeng se senyenyane sa go rwala dithoto seo se rwalago letsopa le lešweu. Mafelo a rena a bodulo e be e le a pitlaganego kudu, gomme karolo e sa rulelwago ya sekepe e be e dula e khupeditšwe ke meetse. Re ile ra imologa gakaakang ge mafelelong re fihla boema-kepeng bjoo re bego re tlo tsena go bjona bja Philadelphia!

Meago ya sekolo sa Gilead e be e dutše gabotse ka Borwa bja Lansing motseng wa ka godimo wa New York, gomme tlwaetšo yeo ke ilego ka e amogela moo e be e bolela mo go ntši kudu go nna. Barutwana ba sehlopheng sa rena ba be ba e-tšwa ditšhabeng tše 18​—ka lekga la pele Mokgatlo o ilego wa kgona go ngwadiša barutwana ba bantši gakaakaa go tšwa dinageng dišele​—gomme ka moka ga rena ra ba bagwera ba kgaufsi. Ke ile ka thabela kudu bogwera bja yo ke bego ke dula le yena ka phapošing, Kalle Salavaara yo a tšwago Finland.

Nako e ile ya sepela ka lebelo, gomme mafelelong a dikgwedi tše tlhano, mopresidente wa Mokgatlo Nathan H. Knorr o ile a goroga go tšwa ntlong-kgolo ya Brooklyn go tla go re nea di-diploma tša rena le go re botša moo re abetšwego gona. Matšatšing ao, barutwana ba be ba sa tsebe moo ba tlago go abelwa gona go fihla ge se se be se tsebišwa moletlong wa go aloga. Ke ile ka abelwa go boela Bethele ya London go ya go tšwela pele ka mošomo wa-ka moo.

Ge ke Boela Morago London

Nywaga ya ka morago ga ntwa e be e le thata kua Brithania. Dijo le dinyakwa tše dingwe tše dintši, go akaretša le pampiri di ile tša tšwela pele di abja ka tekanyetšo. Eupša re ile ra kgona go phela gomme dikgahlego tša Mmušo wa Jehofa di ile tša atlega. Go tlaleletša go šomeng Bethele, ke ile ka hlankela dikopanong tša selete le tša tikologo gomme ka etela diphuthego, go akaretša le tše dingwe kua Ireland. Gape e be e le tokelo go kopana le Erich Frost le banababo rena ba bangwe le dikgaetšedi bao ba tšwago Yuropa gomme ra ithuta go tšwa go bona se sengwe mabapi le potego ya Dihlatse-gotee le bona tšeo di ilego tša lebeletšana le ditiro tša sehlogo dikampeng tša tshwenyo tša Nazi. Tirelo ya Bethele e be e tloga e le tokelo e šegofaditšwego.

Ke be ke e-na le nywaga e lesome ke tsebana le Joan Webb, mmulamadibogo yo a kgethegilego yo a hlankelago kua Watford, toropo yeo e lego ka leboa la London. Ka 1952 re ile ra nyalana. Bobedi bja rena re be re nyaka go tšwela pele tirelong ya nako e tletšego, ka gona re be re thabile ge ka morago ga ge ke tlogile Bethele, ke ile ka kgethelwa go ba molebeledi wa tikologo. Tikologo ya rena ya mathomo e be e le go bapa le lebopo la ka borwa la Engelane, kua Sussex le Hampshire. Modiro wa tikologo o be o se bonolo matšatšing ao. Re be re sepela kudu ka pese, paesekele le ka maoto. Diphuthego tše dintši di be di na le mašemo a magolo a magaeng, ao gantši go bego go le thata go a fihlelela, eupša palo ya Dihlatse e ile ya tšwela pele e gola ka mehla.

 Motse wa New York ka 1958

Ka 1957, ke ile ka amogela taletšo e nngwe go tšwa Bethele e rego: “Na o ka se rate go tla ofising go tla go thuša ka ditokišetšo tša tša dinamelwa bakeng sa kopano e tlago ya ditšhaba-tšhaba yeo e tla swarelwago Yankee Stadium le Polo Grounds Motseng wa New York ka 1958?” Nna le Joan go se go ye kae ke ge re šetše re swaregile ka dikgopelo tše tšwago go banababo rena bakeng sa difofane le dikepe tšeo di hirilwego ke Mokgatlo. Ye e ile ya ba Kopano ya Ditšhaba-tšhaba e tumilego kudu ya Thato ya Modimo, yeo e bego e e-na le batheetši ba 253 922. Kopanong ye, ba 7 136 ba ile ba bontšha boineelo bja bona go Jehofa ka go inwa meetseng​—mo e ka bago gabedi palo ya batho bao ba ilego ba kolobetšwa tiragalong ya histori ka Pentekoste ya 33 C.E., bjalo ka ge go begilwe ka Beibeleng.​—Ditiro 2:41.

Nna le Joan re ka se tsoge re lebetše botho bja Ngwanabo rena Knorr ge a be a re laletša ka boyena gore re be gona kopanong bakeng sa go thuša ka go hlokomela baemedi bao ba bego ba fihla Motseng wa New York go tšwa dinageng tše 123. Yeo e be e le phihlelo e thabišago le yeo e kgotsofatšago go rena ka bobedi.

Ditšhegofatšo tša Tirelo ya Nako e Tletšego

Ge re boa, re ile ra tšwela pele modirong wa bosepedi go fihlela ge mathata a tša maphelo a tšwelela. Joan o ile a robatšwa sepetlele gomme nna ke ile ka hwa lehlakore ganyenyane. Re ile ra bušetšwa go beng babulamadibogo ba kgethegilego eupša ka morago re ile ra ba le tokelo ya nakwana ya go hlankela modirong wa tikologo gape. Mafelelong re ile ra boela Bristol moo re ilego ra tšwela pele re le tirelong ya nako e tletšego. Ngwanešo Dick o dula kgaufsinyana le lapa la gagwe, gomme re etelana gantši.

Go bona ga-ka go ile gwa senyetšwa ruri ke go arogana ga magatswana a retina (legapi leo le thušago mahlo go bona) ka 1971. Ga e sa le go tloga ka nako yeo ke ile ka ba le bothata bjo bogolo kudu bja go bala, ka gona ke ile ka hwetša dikgatišo tša dikhasete tša dipuku tša Beibele e le tokišetšo e botse kudu e tšwago go Jehofa. Nna le Joan re sa dutše re swara dithuto tša magae tša Beibele, gomme go theoša le nywaga, re bile le tokelo ya go thuša batho ba 40 go hwetša tsebo ya therešo, go akaretša le lapa le lengwe la ba šupago.

Ge re be re neela maphelo a rena go Jehofa nywageng e ka godimo ga e 60 e fetilego, kganyogo ya rena e be e le go tsenela tirelo ya nako e tletšego gomme re dule go yona. Re thabile gakaakang go ba le matla a go tšwela pele re hlankela Jehofa yo Mogolo​—e lego tsela e nnoši yeo re ka mo lebogago ka yona bakeng sa go loka mo a re bontšhitšego gona le bakeng sa nywaga ya rena ya lethabo re le gotee!

[Mongwalo wa ka tlase]

[Seswantšho go letlakala 25]

Ke e-na le ngwanešo Dick (mafelelong ka go le letshadi; Dick o eme) le babulamadibogo ba bangwe ka pele ga legae la babulamadibogo la Bristol

[Seswantšho go letlakala 25]

Legae la babulamadibogo la Bristol ka 1940

[Seswantšho go letlakala 26]

Stanley le Joan Reynolds ka letšatši la bona la lenyalo, January 12, 1952, le lehono