Si Jehova Mas Labaw Kay sa Atong mga Kasingkasing

“SI Jehova nahimuot niadtong mga nahadlok kaniya,” misulat ang salmista. Sa pagkatinuod, ang Maglalalang malipay sa pagtan-aw sa matag usa sa iyang tawhanong mga alagad samtang nanglimbasog sila sa pagtuboy sa iyang matarong nga mga sukdanan. Ang Diyos mopanalangin sa iyang mga maunongon, modasig kanila, ug mohupay kanila sa mga panahon sa kawalay-paglaom. Siya nahibalo nga dili-hingpit ang iyang mga magsisimba, busa siya realistikanhon sa iyang gidahom kanila.—Salmo 147:11.

Tingali dili kita malisdan sa pagtuo nga si Jehova adunay dakong gugma alang sa iyang mga alagad sa katibuk-an. Apan, ang uban daw sobrang nabalaka bahin sa ilang kaugalingong mga kakulangan nga kombinsido silang dili gayod sila mahigugma ni Jehova. “Sobra ang akong pagkadili-hingpit nga dili ako puwedeng higugmaon ni Jehova,” sila mahimong manghinapos. Tinuod, kitang tanan adunay negatibong mga pagbati matag karon ug unya. Apan ang pipila daw kanunayng nakigbugno batok sa mga pagbati sa pagkawalay-pulos.

Mga Pagbati sa Kalugda

Sa kapanahonan sa Bibliya daghang matinumanong mga tawo ang nag-antos gumikan sa mga pagbati sa sobrang kalugda. Gikasilagan ni Job ang kinabuhi ug mibati nga ang Diyos nagsalikway kaniya.  Si Ana, nga nahimong inahan ni Samuel, sa usa ka panahon naguol pag-ayo bahin sa iyang pagkawalay-anak ug mihilak sa hilabihan. Si David “natikuko sa hilabihan gayod,” ug si Epafrodito nabalisa tungod kay ang balita bahin sa iyang pagsakit nakapaguol sa iyang mga igsoon.—Salmo 38:6; 1 Samuel 1:7, 10; Job 29:2, 4, 5; Filipos 2:25, 26.

Komosta ang mga Kristohanon karon? Tingali ang sakit, pagkatigulang, o ubang personal nga mga kahimtang nagpugong sa uban sa paghimo taman sa gusto unta nilang himoon diha sa sagradong pag-alagad. Mahimong motultol kini kanila sa paghinapos nga wala nila mahimo ang gidahom ni Jehova ug sa ilang mga isigkamagtutuo. O ang pipila tingali kanunayng magbasol sa ilang kaugalingon tungod sa mga kasaypanan sa miagi, nga nagduhaduha kon napasaylo ba sila ni Jehova. Malagmit ang uban nga may malisod nga nangaging mga kasinatian sa pamilya kombinsidong dili gayod sila takos nga higugmaon. Sa unsang paagi kini nahitabo?

Ang uban midako sa mga pamilya diin ang nangibabaw nga espiritu dili gugma kondili kahakog, pagbiaybiay, ug kahadlok. Sila wala gayod tingali makasinati ug usa ka amahan nga nahigugma pag-ayo kanila, kinsa nangitag mga kahigayonan nga modayeg ug modasig, kinsa dili magtagad sa ginagmayng mga sayop ug andam nga mopasaylo bisan sa mas seryosong mga sala, ug kansang kamainiton nagpabati sa tibuok pamilya nga masaligon. Sanglit sila wala gayod makabaton ug usa ka mahigugmaong yutan-ong amahan, tingali malisdan sila sa pagsabot kon sama sa unsa ang pagbaton ug mahigugmaong langitnong Amahan.

Pananglitan, si Fritz misulat: “Ang akong panahon sa pagkabata ug pagkabatan-on naimpluwensiyahan pag-ayo sa dili-mahigugmaong batasan sa akong amahan. a Wala gayod siya maghatag ug bisan unsang komendasyon, ug wala gayod ako mobati nga suod kaniya. Sa pagkatinuod, halos sa tanang panahon, nahadlok ko niya.” Tungod niini, si Fritz, kinsa nagpangedaron nag 50, aduna gihapoy mga pagbati sa pagkawalay-katakos. Ug si Margarette mipatin-aw: “Ang akong mga ginikanan dili matinagdanon ug dili mahigugmaon. Sa dihang misugod ako sa pagtuon sa Bibliya, nalisdan ako sa paghanduraw kon sama sa unsa ang usa ka mahigugmaong amahan.”

Ang maong mga pagbati, kon unsa man ugaling ang katarongan, nagpasabot nga ang atong pag-alagad sa Diyos usahay sa dakong bahin napalihok, dili tungod sa gugma, kondili sa dakong sukod tungod sa pagkasad-an o kahadlok. Ang atong kinamaayohan daw kulang gihapon. Ang tinguha sa pagpahimuot kang Jehova ug sa atong mga isigkamagtutuo tingali makapabati kanato nga dili nato arang mahimo ang tanan nga buot natong himoon. Ingong resulta, tingali dili nato maabot ang atong mga tumong, basolon ang atong kaugalingon, ug maguol pag-ayo.

Unsa ang puwedeng mahimo? Tingali kinahanglan natong pahinumdoman ang atong kaugalingon kon unsa ka dako ang kasingkasing ni Jehova. Ang usa ka tawo nga nakasabot niining mahigugmaong bahin sa personalidad sa Diyos mao si apostol Juan.

“Ang Diyos Mas Labaw kay sa Atong mga Kasingkasing”

Sa kataposan sa unang siglo K.P., si Juan misulat ngadto sa iyang mga isigkamagtutuo: “Pinaagi niini atong mahibaloan nga kita nagagikan sa kamatuoran, ug atong mapasaligan ang atong mga kasingkasing atubangan kaniya bahin sa bisan unsa nga ang atong mga kasingkasing mahimong maghusga kanato, tungod kay ang Diyos mas labaw kay sa atong mga kasingkasing ug nahibalo sa tanang butang.” Ngano mang gisulat ni Juan kining mga pulonga?—1 Juan 3:19, 20.

Tin-aw nga nahibalo si Juan nga posible para sa usa ka alagad ni Jehova nga mobating gihukman sa kaugalingong kasingkasing. Tingali si Juan mismo nakasinati sa maong mga pagbati. Sa batan-on pa nga may maisog nga taras, si Juan badlongon usahay ni Jesu-Kristo tungod sa sobrang pagkaestrikto sa pagpakiglabot sa uban. Sa pagkatinuod, gihatagan ni Jesus si Juan ug ang iyang igsoong si Santiago “sa angga nga Boanerges, nga nagakahulogang Mga Anak sa Dalugdog.”—Marcos 3:17; Lucas 9:49-56.

Sulod sa misunod nga 60 ka tuig, si Juan mikalma ug nahimong timbang, mahigugmaon, ug maluluy-ong Kristohanon. Sa panahon nga siya, ingong ang kataposang buhi nga apostol, misulat sa iyang unang inspiradong sulat, siya nahibalo nga si Jehova dili maningil sa kada usa sa iyang mga alagad tungod sa matag ginagmayng sayop. Hinunoa, siya mainiton, dakog-kasingkasing, mahinatagon, ug maluluy-ong Amahan, kinsa dunay dulot nga gugma alang sa tanan nga nahigugma kaniya ug nagsimba kaniya sa kamatuoran. Si Juan misulat: “Ang Diyos gugma.”—1 Juan 4:8.

Si Jehova Malipay sa Atong Pag-alagad Kaniya

Nahibalo ang Diyos sa atong dala-sa-pagkatawo nga mga kahuyangan ug mga kakulangan, ug iya  kining hatagag konsiderasyon. “Siya nahibalo pag-ayo sa atong pagkaumol, nga nahinumdom nga kita mga abog,” misulat si David. Nakasabot si Jehova sa epekto sa atong nangaging kasinatian nga naghimo kanato sa kon unsa kita. Sa pagkatinuod, mas nakaila kaayo siya kanato kay sa atong pagkaila sa atong kaugalingon.—Salmo 103:14.

Nahibalo siya nga daghan kanato ang gusto unta nga mahimong lahi, apan dili kita makabuntog sa atong mga pagkadili-hingpit. Ang atong kahimtang ikatandi nianang kang apostol Pablo, kinsa misulat: “Ang maayo nga buot ko wala ko buhata, apan ang daotan nga dili ko buot mao ang akong ginabuhat.” Kitang tanan nalambigit sa samang pakigbisog. Sa pipila ka kahimtang mahimong mosangpot kini sa atong pagbaton ug nagahukom-sa-kaugalingon nga kasingkasing.—Roma 7:19.

Hinumdomi kini kanunay: Labing hinungdanon kay sa atong panglantaw sa atong kaugalingon mao ang panglantaw ni Jehova kanato. Sa matag higayon nga makita niya kitang naningkamot sa pagpahimuot kaniya, ang iyang reaksiyon dili lang kay gamayng katagbawan kondili kalipay. (Proverbio 27:11) Bisan kon ang atong mabuhat medyo gamay tingali sa atong kaugalingong panglantaw, ang atong pagkaandam nga mobuhat ug ang maayong motibo makapalipay kaniya. Molantaw siya saylo sa kon unsay atong mahimo; iyang masabot kon unsay buot natong himoon; nasayod siya sa atong mga pangandoy ug mga tinguha. Si Jehova makabasa sa atong kasingkasing.—Jeremias 12:3; 17:10.

Pananglitan, daghan sa mga Saksi ni Jehova ang kinaiyanhong maulawon ug hilomon nga mga tawo nga mas gustong dili kaayo mamatikdan. Alang sa maong mga tawo, ang pagsangyaw sa maayong balita sa balay ug balay mahimong usa ka makapahadlok nga hagit. Apan, tungod kay gipalihok sa ilang tinguha sa pag-alagad sa Diyos ug sa pagtabang sa ilang isigkatawo, bisan ang mga maulawon nakakat-on sa pagduol sa ilang mga isigkatawo ug sa paghisgot bahin sa Bibliya. Tingali ilang bation nga gamay ra ang ilang mahimo, ug mahimong makawala kini sa ilang kalipay. Basin bation sa ilang kasingkasing nga ang ilang publikong ministeryo dili mapuslanon. Apan si Jehova tino nga nalipay sa dakong paningkamot nga gihimo niining mga tawhana diha sa ilang pag-alagad. Dugang pa, dili nila maseguro kon kanus-a ug asa manurok, manubo, ug mamunga ang mga binhi nga gipugas.—Ecclesiastes 11:6; Marcos 12:41-44; 2 Corinto 8:12.

Ang ubang mga Saksi dugay nga nag-antos sa sakit o nagkatigulang na. Alang kanila, ang regular nga pagtambong sa mga tigom sa Kingdom Hall kanunayng dinuyogan sa kasakit ug kabalaka. Ang pagpamati sa usa ka pakigpulong bahin sa buluhatong pagsangyaw malagmit magpahinumdom kanila sa ilang gihimo kanhi ug sa ilang buot pang himoon, bisan pag gipugngan sila sa balatian. Kini sila mahimong mobati ug mga pagtulisok sa pagkasad-an tungod kay dili na nila masunod ang tambag taman sa gusto unta nila. Hinunoa, ginapabilhan gayod ni Jehova ang ilang pagkamaunongon ug pagkamalahutayon. Basta magpabilin silang maunongon, dili gayod niya hikalimtan ang ilang rekord sa pagkamatinumanon.—Salmo 18:25; 37:28.

“Mapasaligan ang Atong mga Kasingkasing”

Sa dihang natigulang na si Juan, daghan na gayod siyag nasabtan bahin sa pagkadako sa kasingkasing sa Diyos. Hinumdomi nga siya misulat: “Ang Diyos mas labaw kay sa atong mga kasingkasing ug nahibalo sa tanang butang.” Dugang pa, gidasig kita ni Juan nga ‘pasaligan ang atong mga kasingkasing.’ Unsay gipasabot ni Juan niining mga pulonga?

Sumala sa Vine’s Expository Dictionary of Old and New Testament Words, ang Gregong berbo nga gihubad nga “mapasaligan” nagkahulogang “paggamit ug pangdani, pagkombinsir o pagkombertir, pagdani.” Sa laing pagkasulti, aron mapasaligan ang atong kasingkasing, kinahanglang atong makombertir ang atong kasingkasing, danihon kini aron motuo nga si Jehova nahigugma kanato. Sa unsang paagi?

Si Fritz, nga gihisgotan ganiha niining artikuloha, nag-alagad ingong ansiyano sa usa sa mga kongregasyon sa mga Saksi ni Jehova sa kapin sa 25 ka tuig ug nakakaplag nga ang personal nga pagtuon makapasalig sa iyang kasingkasing sa gugma ni Jehova. “Ako regular nga nagtuon pag-ayo sa Bibliya ug sa among mga publikasyon. Nagtabang kini nako nga dili magsigeg hunahuna sa nangagi kondili maghupot ug tin-awng panan-aw sa atong katingalahang umaabot. Usahay, dag-on ako sa akong kagahapon, ug bation  ko nga dili gayod ako puwedeng higugmaon sa Diyos. Apan, sa katibuk-an, akong nakaplagan nga ang regular nga pagtuon nagpalig-on sa akong kasingkasing, nagpauswag sa akong pagtuo, ug nagtabang kanako nga magpadayong malipayon ug timbang.”

Tinuod, ang pagbasa sa Bibliya ug pagpamalandong dili tingali makausab sa atong aktuwal nga kahimtang. Apan, mausab niini ang paagi sa atong paglantaw sa atong kahimtang. Ang pagsilsil sa mga hunahuna sa Pulong sa Diyos diha sa atong mga kasingkasing motabang kanato sa paghunahuna sama sa iyang paagi sa paghunahuna. Dugang pa, ang pagtuon magpaarang kanato nga motubo sa pagsabot bahin sa pagkadako sa kasingkasing sa Diyos. Kita hinayhinayng makadawat nga si Jehova wala magbasol kanato tungod sa atong naagoman sa bata pa, ug wala siya magbasol kanato tungod sa atong mga kahuyangan. Siya nahibalo nga ang mga luwan nga ginapas-an sa daghan kanato—emosyonal man kini o pisikal—sagad nga dili ato mismong kahimoan, ug mahigugmaon niyang hatagag konsiderasyon kini.

Komosta si Margarette, kinsa gihisgotan ganiha? Sa dihang iyang nailhan si Jehova, ang pagtuon sa Bibliya dako usab ug kapuslanan kaniya. Siya, sama ni Fritz, kinahanglang mag-usab sa kon unsay iyang paghanduraw sa usa ka amahan. Ang pag-ampo nagtabang kang Margarette nga lig-onon ang iyang nakat-onan sa pagtuon. “Sa pagsugod akong giisip si Jehova ingong suod nga higala, sanglit mas daghan kog eksperyensiya uban sa mahigugmaong mga higala kay sa usa ka mahigugmaong amahan. Sa hinayhinay, nakatuon ko sa pagbubo sa akong pagbati, pagduhaduha, kabalaka, ug mga problema ngadto kang Jehova. Masubsob akong makig-estorya kaniya diha sa pag-ampo, nga sa samang higayon naghiusa sa tanang bag-ong mga butang nga akong natun-an bahin kaniya, nga morag sama sa usa ka mosayko. Human ang taastaas nga panahon, ang akong pagbati kang Jehova milambo sa puntong talagsa na ko karon maglisod sa pag-isip kaniya ingong akong mahigugmaong Amahan,” matod ni Margarette.

Kagawasan Gikan sa Tanang Kabalaka

Samtang naglungtad kining daotan, daang sistema, walay usa ang makalaom nga malibre sa mga kabalaka. Alang sa pipila ka Kristohanon kini nagpasabot nga ang mga pagbati sa kabalaka o pagduhaduha sa kaugalingon mahimong motungha pag-usab ug mohatag ug kaguol. Apan makasalig kita nga nahibalo si Jehova sa atong maayong motibo ug sa kakugi nga atong ginahimo sa iya nga pag-alagad. Dili gayod niya kalimtan ang gugma nga atong ginapakita alang sa iyang ngalan.—Hebreohanon 6:10.

Sa nagsingabot nga bag-ong yuta ubos sa Mesiyanikong Gingharian, ang tanang matinumanong mga tawo makadahom nga mapahigawas gikan sa mga kabug-at sa sistema ni Satanas. Pagkadakong kahupayan unya kana! Dayon ato unyang makita ang dugang pang pamatuod kon unsa ka dako ang kasingkasing ni Jehova. Hangtod sa pag-abot nianang panahona, makasalig ang tanan nga “ang Diyos mas labaw kay sa atong mga kasingkasing ug nahibalo sa tanang butang.”—1 Juan 3:20.

[Footnote]

[Blurb sa panid 30]

Si Jehova dili usa ka estriktong magmamando kondili usa ka mainiton, dakog-kasingkasing, ug maluluy-ong Amahan

[Hulagway sa panid 31]

Ang pagtuon sa Pulong sa Diyos motabang kanato sa paghunahuna sama sa iyang paagi sa paghunahuna