Jehova uummatitsinnit anneruvoq

JEHOVAP mianerinnitsini iluarai. Aap, kiffani nunamiittut ilungersorlutik najoqqutassiaanik naapertuilluartunik eqqortitsiniaasut isigalugit Jehovap ilumut nuannaarutigaa. Guutip ilumoorfiginnitsini annikilliorneranni pilluaqqusarpai, qiimmassartarlugit tuppallersartarlugillu. Nalunngilaa pallorfiginnitsini naammalluinnanngitsuusut, taamaattumillu taakkununnga piumaffiginninnermini piviusorsiortuuvoq. — Tussiaat 147:11.

Jehovap kiffaminut nalinginnaasumik asanningaarnera immaqa upperiuminaatsipparput. Ilaasali sanngiissusertik kukkusarnitillu ima ingasatsigisumik isumakuluutigaat allaat isumaqavillutik Jehovamit asaneqarsinnaanaviaratik. „Jehovamit asaneqarsinnaanissannut ajorteqarpallaarpunga,“ immaqa oqarput. Soorunami tamatta ilaanikkut nikallornartunik misigissuseqartarpugut. Kisianni ilaat misigissutsimik ajukkunnermik akiugassaqartuarunarput.

Nikallunganermik misigineq

Biibilip nalaani Guutip kiffai aalajaatsut arlallit nikallortaqaat. Jobip inuunini qatsussimavaa misigalunilu Guutip qimassimagaani. Hanna, Samuelimik ernertaartoq, ilaanni meerartaarsinnaannginnini aliasuutigisimaqaa qissatigalugulu. David ’nanertisimaqaaq’, Epafroditusilu nikallorsimavoq nappaateqarnermi tusarneqarnera qatanngutinut aliasutsitsimmat. — Tussiaat 38:7; 1 Samuel 1:7, 10; Job 29:2, 4, 5; Filípimiut 2:25, 26.

Ullumikkummi kristumiut? Immaqa nappaat, utoqqalineq imaluunniit pissutsit allat atukkatik pissutigalugit kristumiut nalunaajaasarnerminni piumassartik naapertorlugu annertutigisumik iliorsinnaanngillat. Immaqa isummerput Jehova uppeqatitillu sumiginnarlugit. Ilaat siornatigut kukkunitik pillugit imminut avoqqaariuarput Jehovallu isumakkeerfigigaatik qularalugu. Allallu immaqa ilaqutariittut ajornartorsiutilinnik tunuliaqutaqarput isumaqavillutillu asaneqarnissaminnut pissutissaqanngitsoq. Suna pissutaava?

Inuit ilaat ilaqutariinni asannissuseqanngivissuni aamma namminissarsiornermik, tusangiasaarinermik ersinermillu atugarliorfiusumi alliartorput. Immaqa misiginngisaannassavaat ataataq asanningaartoq, imaluunniit nersualaariniarluni qiimmassaaniarlunilu iliuuseqartoq, kukkunernik isiginngitsuusaartartoq kukkunernillu sualuttunik allaat isumakkeerfiginnittartoq, taassumalu asanninnera ilaqutariinni toqqissisimanermik misigisitsisartoq. Maani nunami asannittumik ataataqanngisaannarmata qilammi asannittumik Ataataqarneq qanoq isumaqarnersoq taakkununnga paasiuminaassinnaavoq.

Assersuutigalugu Fritz allappoq: „Meeraanera inuusunneralu ataatama asanninngitsumik pissusianit assut sunnerneqarpoq. * Nersunngisaannarpaanga, qanimullu attavigalugu misiginngisaannarpunga. Iluamik oqaatigalugu amerlanertigut ersigisarpara.“ Tamassuma kinguneraa Fritz, maanna 60-it tungaanut ukiulik, misigissutsimik suli imminut annikiginermik akiuisoq. Margarettelu oqaluttuarpoq:  „Angajoqqaakka inussiarniitsuupput asannitsuunatillu. Biibili atuaqqissaalerakku ataataq asannittoq qanoq innersoq takorluussallugu ajornakusoortippara.“

Misigissutsit taama ittut sumilluunniit pissuteqaraluaraangata kingunerisinnaavaat Guutimut kiffartornerput ilaatigut imminut pisuutinnermit ersinermilluunniit pissuteqarnerusoq asanninnermik pinnani. Sapinngisarput tamaat ilioraluaraangatta naammagineq ajorlugu misigisarpugut. Jehova uppeqaterpullu nuannaartikkumallugit kissaatitta misigitissinnaavaatigut piumasavut naapertorlugu iliorsinnaanata. Tamatumalu kinguneraa anguniakkat piviusorsiunngitsut anguniarlugit ilungersulussinnartugut, imminut avoqqaarisarluta nikallungaarlutalu.

Tamanna iliuuseqarfigineqarsinnaava? Immaqa imminut eqqaasittariaqarpugut Jehova qanoq paasinnitigisoq misiginneqataatigisorlu. Guutip pissusianik matuminnga apustili Johannes paasisaqarluarsimavoq.

’Guuti uummatitsinnit anneruvoq’

Ukiut hundredellit siulliit naaneranni ukiunik naatsorsuisalerfitta kingorna Johannesip uppeqatini imaattumik allaffigai: ’Tamatumannga nalujunnaassaagut sallusuissummit pisugut, taavalu uummativut taassuma saani tuppallersarsinnaavavut, uummatitta pillagassaatikkaluarpatigut Guuti uummatitsinnit annerummat suullu tamaasa ilisimallugit.’ Sooq Johannesip oqaatsit tamakku allappai? — 1 Juánase 3:19, 20.

Johannesip nalunngilluarpaa Jehovamut kiffaasoq imminut pisuutittutut misigisinnaasoq. Johannesip immaqa nammineq tamanna misigisimavaa. Inuusuttuugallarami kamajasuusimavoq, ilaannilu Jesusimit naveerneqarpoq allanik eqqartuussigajummat. Allaat Jesusip Johannes qatanngutaalu Jakob ’atserpai Boanergesinik, imaappoq: kallerup erneri’. — Mákorse 3:17; Lúkarse 9:49-56.

Ukiut 60-it tulliuttut ingerlanerani Johannes inersimasunngorpoq kristumiutullu allanngoraarunnaarluni, kristumiunngorluni asannittoq nallittuisorlu. Apustilini suli inuusuni kingullersaatut allakkani isumassarsiarititaasut siulliit allakkamigit nalunngilaa Jehovap kiffani sunik tamanik kukkunerannik akisussaatinngikkai. Akerlianili Guuti asannittutut, paasinnittutut, tukkortutut misiginneqataasutullu ataataavoq, asannitsini ilumoortumik pallorfiginnitsini tamaasa asangaarpai. Johannes allappoq: ’Guuti asassutaavoq.’ — 1 Juánase 4:8.

Jehovap kiffartoratsigu nuannaarutigaa

Guutip inunnguutsitsinni sanngiissutsivut naammalluinnanngissutsivullu nalunngilai eqqarsaatigisarlugillu. „Nalunngilaami qanoq pinngortitaasugut, eqqaamavaa pujualaannaasugut,“ David allappoq. Jehovap nalunngilaa inuttut qanoq ittunngornitsinnut tunuliaquterput peqqutaasoq. Iluamik oqaatigalugu uatsinnit taassuma nalunngilluarneruaatigut. — Tussiaat 103:14.

Taassuma nalunngilaa amerlasuujulluta allatut inoorusukkaluartugut, kisiannili kukkusarnivut ajugaaffigisinnaanagit. Pissutsit atukkavut pissutsinut apustilip Paulusip atugaanut naleqqiunneqarsinnaapput. Taanna allappoq: ’Piumasara ajunngitsoq suliarisarinngilara, kisianni piumanngisara ajortoq suliarisarpara.’ Taannatut tamatta akiuuppugut. Ilaatigut imminut assuaraluta kingunerisinnaavaa. — Rûmamiut 7:19.

Eqqaamajuaruk: Jehovap uagutsinnut qanoq isumaqarfiginninnera imminut pilluta isumatsinnit pingaarneruvoq. Nuannaartinniarutsigu naammagiinnanngilaa. Aap, tipaatsuutigaa. (Ussatit 27:11) Naak naammassisavut isumarput naapertorlugu annikikkaluartut Jehovap piumassuserput ajunngitsumillu siunertavut nuannaarutigai. Naammassisimasavut isigai; paasivaa qanoq iliorusulluta kissaativut; piumasavut erinisunnivullu nalunngilai. Jehovap uummammiuvut ilisimavai. — Jeremia 12:3; 17:10.

 Assersuutigalugu Jehovamut Nalunaajaasut arlallit inuttut kisittuupput tunuarsimaartuullutik akuliukkumasuunngillat. Inunnut taama ittunut nutaarsiassap nuannersup illumiit illumut oqaluussissutiginnissaa qununarluni unamminiarnartuusinnaavoq. Kisianni Guutimik kiffartuussinissartik inoqatiminnullu ikiuinissartik assut kissaatigigamikku, allaat kisittut Biibili pillugu tulliminnut saaffiginninnissartik ilinniartarpaat. Immaqa annikitsuinnarnik naammassisaqartutut misigipput, tamannalu pillugu nikallungasinnaapput. Uummatimikkut tamanut oqaluussinertik iluaqutaanngitsutut misigisarpaat. Kisianni oqaluussinermi peqataaniarlutik ilungersornerat Jehovap nuannaarutigilluinnarpaa. Aamma ilisimasinnaanngilaat sallusuissutip naatsiiassartai qaqugu sumilu puttutissanersut, naallutik inerititaqassallutillu. — Nalunaajaasup oqaasii 11:6; Mákorse 12:41-44; 2 Korintumiut 8:12.

Oqaluussisartut allat katsorsarneqarsinnaanngitsunik nappaateqarput utoqqalilerlutilluunniit. Naalagaaffilersaartarfimmi ataatsimeeqataaneq taakkununnga anniaateqarnermik ernumassuteqarnermillu nassataqarsinnaavoq. Oqaluussineq pillugu oqalugiaatip eqqaasissinnaavai qanoq iliortarsimanitik, sulilu qanoq iliorusukkaluarluni pillugit, sanngiissutsitilli innarluutitillu pissutigalugit iliorsinnaajunnaarlutik. Immaqa imminut pisuutipput siunnersuutit kissaatigisamissut maleruarsinnaannginnamikkik. Jehovalli ilumoorfiginninnerat qasusuissusiallu pingaarteqai. Ilumoorfiginnittuartillugit aalajaallutik kiffartorsimanerat Jehovap puiunngisaannassavai. — Tussiaat 18:26; 37:28.

’Uumativut tuppallersarsinnaavavut’

Johannes utoqqaligami Guuti qanoq misiginneqataatigillunilu paasinnissinnaatiginera paasilluarsimassavaa. Imami allappoq: ’Guuti uummatitsinnit anneruvoq suullu tamaasa ilisimallugit.’ Tassunga tunngatillugu Johannesip kajumissaarpaatigut uummaterput tuppallersaqqullugu. Qanoq isumaqarpa?

Vine’s Expository Dictionary of Old and New Testament Words naapertorlugu oqaluut griikerisooq ’tuppallersarnermik’ nutserneqartoq isumaqarpoq „akuersisippaa, ajugaaffigaa, qularunnaarsippaa“. Imaappoq, uummaterput ajugaaffigisariaqarparput, qularunnaarsillugu Jehovap asagaatigut. Qanoq taamaaliorsinnaavugut?

Fritz, allaaserisami matumani taaneqareersoq, Jehovap Nalunaajaasuisa ilagiivini ukiut 25-t sinnerlugit utoqqaanertatut kiffartorsimavoq, paasilersimavaalu nammineq atuaqqissaartarnermikkut Jehovap asanninneranik qularunnaarsinneqarsinnaalluni. „Biibili atuagassiaativullu aalajangersimasumik peqqissaartumillu atuartarpakka. Tamatuma ikiorpaanga pereersimasut pinnagit kisianni siunissarput nuanningaartoq sammiuarnissannik. Ilaatigut qanga pisimasut eqqaaginnarlugit sapilersittarpaanga misigalunga Jehovap asasinnaanngisaannassagaanga. Kisianni ataatsimut oqaatigissagaanni paasivara aalajangersimasumik atuaqqissaartarnerma uummatiga nakussatsikkaa, uppernera aalajaannerulersillugu aammalu nuannaartuarnissannut oqimaaqatigiissaarinissannullu ikiorlunga.“

Biibilimik atuartarnitta eqqarsaatiginneqqissaartarnittalu pissutsit maannakkut atukkavut allanngortikkunnanngilaat. Kisianni pissutsinut isiginnitaaserput allanngortissinnaavaat. Uummaterput Guutip eqqarsaataanik immerutsigu Guutitut eqqarsartariaaseqarnissatsinnut iluaqutigisinnaavarput. Aammattaaq atuaqqissaartarnerup paasitissavaatigut  Guuti qanoq misiginneqataatigisoq paasinnitigisorlu. Paasilersarparput Jehovap kukkusarnivut alliartornitsinnilu avatangiisigisimasavut pillugit avoqqaarinngikkaatigut. Nalunngilaa misigissutsikkut timikkulluunniit nammatavut qaqutiguinnaq nammineq pisuussutigisarivut, tamannalu pillugu qajassuuppaatigut.

Margarettemi siuliani eqqaaneqartoq? Jehova ilisarileramiuk taassumattaaq Biibilimik atuaqqissaartarneq iluaqutigingaarpaa. Ataatap qanoq ittuuneranik isumani Fritzitulli allanngortittariaqarsimavaa. Atuaqqissaartarnikkut ilikkakkani Margarettep qinuneq ikiortigalugu paasilluarnerulerpai. „Aallaqqaataani Jehova qanimut ikinngutaasutut isigivara, tassami asannittunik ikinnguteqarneq asannitumik ataataqarnermit nalunnginneruara. Piffissap ingerlanerani misigissutsikka, qularnera, annilaanganera ajornartorsiutikkalu pillugit Jehovap oqaluttuunnissaa ilikkarpara. Qinnuigiuartarpara, taannalu pillugu ilikkakkakka nutaat, soorlu mosaikkinik ikkussuisutut, katiterniarsarisarlugit. Tamatuma kingorna Jehovamut misigissutsikka ima ineriartortigisimapput allaat qaqutiguinnaq ataatattut asannittutut isiginissaa ajornartorsiutigisarlugu,“ Margarette oqarpoq.

Isumakuluuteqarunnaavinneq

Aaqqissuussaaneq pisoqaq ajortorlu manna atuutsillugu ilimagissanngilarput isumakuluutaarutivinnissarput. Kristumiut ilaannut tamanna isumaqarpoq ilaatigut ernumatsattarumaartut naleqassusertillu qularalugu. Kisianni qularutigissaanngilarput Jehovap siunertavut ajunngitsut imminullu ilungersorluta kiffartornitsinni suliavut nalunngikkai. Aterminut asanninnerput puiunngisaannassavai. — Eprîarit 6:10.

Nunarsuassami, Naalagaaffiup Messiasikkoortup ataani, inuit aalajaatsut tamarmik qilanaarisinnaavaat nammakkaminnit, aaqqissuussaanermi Satanip pilersitani atuuttunit, aniguisitaanissartik. Oqiliallannangaaqaaq! Taava annerungaartumik misigissavarput Jehovap qanoq misiginneqataatiginera paasinnitsigineralu. Tamatuma tungaanut qularutiginngivittariaqarparput ’Guuti uummatitsinnit annerusoq suullu tamaasa ilisimallugit’. — 1 Juánase 3:20. (wE 1/5 2000)

[Quppernerup ataani ilanngussaq]

[Qupp. 30-mi issuagaq]

Jehova soqutigittaatsuunngilaq, ataataavorli asannittoq, paasinnittoq misiginneqataasorlu.

[Qupp. 31-mi assiliartaq]

Guutip oqaasia atuaqqissaartaraangatsigu Guutitut eqqarsartariaaseqarnissarput ilinniartarparput