Jeova Elap jen Buruer

DRI jeje sam ear je, “Jeova e mõnõnõ kake ro remjõk E.” Emol, dri Kõmmanman eo ej lõñliñ ilo an lo an kajjojo ian dri karejar ro an kate ir ñan mour ekkar ñan kien ko an rewãnik. Anij ej kejerammõn, kõketak, im kainemõn ro rej tiljek ñan e ilo ien rej buromõj. Ejelã bwe dri karejar ro an rejjab wãppen, inem ejjab kõtõmene bwe jen kõmmani men ko relap jen joñan maroñ ko ad.—Sam 147:11.

Jejelã bwe elap an Jeova yokwe aolep dri karejar ro an. Bõtab, jet emaroñ tarjen joñan air inebata kin likjab ko air make im kin men in rej tõmak bwe Jeova ejamin yokwe ir. Remaroñ bõk lemnak in, “Elap aõ jab wãppen ñan an Jeova yokwe iõ.” Emol, kij kajjojo jej bõk iñjake ko rekabwerer jen ien ñan ien. Bõtab, ñan jet, aolep ien rej aikwij tõrinaek iñjake eo bwe ejelok tokjeir.

Buromõj

Ilo ien ko ilo Baibel, elõñ dri karejar ro retiljek rar iñtan kin air kar lukkun buromõj. Job ear jab kõnan mour im ear lemnak bwe Anij ear kejol e. Hanna, jinen Samuel, ear lukkun buromõj juõn ien kinke ewar im ear lap an jañ. Devid ear “kanuij kumliklik,” im Epaprodaitõs ear lukkun buromõj kinke dri tõmak ro mõttan rar buromõj ke rar roñ bwe ear nañinmij.—Sam 38:6; 1 Samuel 1:7, 10; Job 29:2, 4, 5; Dri Pilippai 2:25, 26.

Ak ta kin dri Kristian ro rainin? Bwelen nañinmij, bwijwõlã, ak wãwen ko jet rej bõprae jet jen air kalaplok ijo kwonair ilo jerbal eo an Jeova. Men in emaroñ kõmman air bõk lemnak eo bwe rej likjab in kajejjet ijo kwonair ñan Jeova im dri tõmak ro mõttair. Ak jet remaroñ narueir make aolep ien kin bwid ko rar kõmmani mokta, im berre bwe emwij an Jeova jeorlok bwid ko air. Bwelen ro jet im rej itok jen baamle ko me ejjab emmõn air kõmman ñan dron rej tõmak bwe ejelok juõn emaroñ yokwe ir. Etke rej bõk lemnak in?

Jet rar ridtolok ilo baamle ko me elap air kibbon, kajirere, im mijak, im ejelok yokwe. Bwelen jemeir ejjab juõn eo ej kwalok an yokwe ir ilo an bukot ien ko remmõn ñan an nebar im rejañ ir. Ejjab kalimjek likjab ko air im ej bojak in jeorlok air bwid, elaptata bwid ko air relap, im yokwe eo an ej kõmman bwe aolepen baamle eo en jokõne. Kinke jemeir ejjab kwaloki men kein, emaroñ bin ñan air tõmak bwe ewor juõn Jemen eyokwe ilañ.

Ñan wanjoñok, Fritz ear je: “Kõmman ko renana an jema ear lap air jelet wãwen mour eo aõ ilo juõn wãwen enana. * Ejelok juõn ien ear nebar iõ, im kimro ar jab ebake dron. Ilo mol, enañin aolep ien iar mijak e.” Kin men in, Fritz, eo im ej 50 jima an yiõ kiõ, ej bõk wõt iñjake eo bwe ejelok tokjen. Juõn kõrã etan Margarette ear kemelele im ba: “Jema im jinõ rar lukkun lej im rar jab yokwe iõ. Ke iar jino katak Baibel eo, ear lukkun bin ñan aõ pijaik juõn jemen eo ej yokwe.”

Jekron ta un eo unin ad bõk iñjake rõt in, ak men in emaroñ melelen bwe jet ien men eo im elap an kamakõt kij ñan ad jerbal ñan Anij, ej kin ad mijak ak iñjake bwe ewor juõn men ebwid jar kõmmane, im jab kin ad yokwe Anij. Meñe jej kate kij, ak jemaroñ watõke bwe ejjab bwe. Kõnan eo ñan kabuñburuen  Jeova im dri tõmak ro mõttad emaroñ kõmman ad bõk iñjake eo bwe jej aikwij kõmman elã jen joñan ad maroñ. Men in emaroñ kõmman bwe jen likjab in kajejjet mejenkajik ko ad, naruer make, im buromõj.

Ta eo jemaroñ kõmmane? Bwelen jej aikwij kakememej kij make bwe elap joij im tiriamo ibben Jeova . Dri jilik Jon ear juõn eo im ear lukkun melele bwe Anij ej juõn eo elap an yokwe.

“Anij Elap jen Buruer”

Ilo ien ko an dri Kristian ro jinoin, Jon ear jejelok ñan dri tõmak ro mõttan im ba: “Ilo men in je naj jela bwe kij jen mol im je naj karel buruer iman mejen. Bwe elañe buruer ej liakelok kij, Anij elap jen buruer im E jela men otemjelok.” Etke Jon ear je nan kein?—1 Jon 3:19, 20.

Jon ear jelã bwe juõn eo ej karejar ñan Jeova emaroñ bõk iñjake ko rekabwerer. Bwelen Jon ear bõk ejja iñjake rõt kein wõt. Jon ear juõn eo emõkõj an illu, im eñin unin elõñ ien Jisõs Kraist ear kajimweik e kinke ear lej an jerbal ibben ro jet. Ilo mol, Jisõs ear naetan Jon im Jemes, leo jein, “ãtkãlen Boanerjis, einwõt ro nejin jorur.”—Mark 3:17; Luk 9:49-56.

Ilo 60 yiõ ko tokelik, Jon ear oktak im juõn dri Kristian einemõn, ekamanwa, eyokwe, im tiriamokake. Einwõt dri jilik eo eliktata im ear mour, ilo ien eo ear je letter eo an moktata im kar kakõrmole, Jon ear jelã bwe Jeova ejjab naruõn kajjojo dri karejar ro an kin aolep likjab ko air. Jen men in, ej juõn Jemen eyokwe, ejoij, im elap an tiriamokake. Ej kaurõk aolep ro im rej yokwe im kabuñ ñan e ilo mol. Jon ear je: “Anij [ej] yokwe.”—1 Jon 4:8.

Jeova Ej Lõñliñ kin Ad Jerbal ñan E

Anij ejelã kin mõjno im likjab ko ad, im ej lemnak kin men kein. Devid ear je: “Bwe E jela wãwen kõmõnmõn kim; E kememej bwe kim bõñõlñõl.” Jeova ej kile bwe wãwen ko jej ridtolok ie elap air jelet kij. Ilo mol, elaplok an jelã im melele kin kij.—Sam 103:14.

Ejelã bwe kij aolep jekõnan kõmman oktak ko, bõtab jejjab maroñ anjo ion jab wãppen ko ad. Jemaroñ keidi wãwen eo jej jelmae ñan wãwen eo ear walok ñan dri jilik Paul, eo ear je: “Bwe men eo emõn I kõnan, I jab kõmõne: a nana eo I jab kõnan, eñin ij kõmõne.” Kij aolep jej iion ejja wãwen in wõt. Ilo jet wãwen ko, men in emaroñ kõmman bwe buruer en kabwer kij.—Dri Rom 7:19.

Jen kememej men in ien otemjej: Wãwen eo Jeova ej watõk kij elaplok an aurõk jen wãwen eo jej make watõk kij. Ñe ej lo ad kate kij ñan kabuñburuen, ejjab juburu wõt ak ej lõñliñ. (Jabõn Kennan Ko 27:11) Meñe jemaroñ watõk bwe men ko jar kõtõbrõki relukkun drik, ak Anij ej lõñliñ ñe jej kõmmani ilo mõnõnõ im kin juõn buru emol. Ejjab kalimjek wõt ta ko jar kõtõbrõki, ak ejelã ta eo jekõnan kõmmane im ejelã kin kõnan im mejenkajik ko ad. Jeova ejelã ta eo ej bed ilo buruer.—Jeremaia 12:3; 17:10, UBS.

Ñan wanjoñok, elõñ ian Dri Kennan ro an Jeova rejookok im ejej air nan, im rejjab kõnan bwe ro jet ren jelã kin jerbal ko air. Ñan rein, kwalok nan kin nuuj eo emmõn jen em ñan em emaroñ juõn men elap an bin ñan ir. Meñe eindrein, kõnan eo air ñan karejar ñan Anij im ñan jibañ ro dri turiir ej kamakõt ir ñan air kebak ro dri turiir im konono ibeir kin Baibel eo. Remaroñ bõk iñjake eo bwe edrik tõbrõk ko rej kõmmani, im men in emaroñ kõmman bwe ren jab lõñliñ. Burueir emaroñ kõmman bwe ren lemnak bwe air jerbal in kwalok nan ejelok tokjen. Bõtab elap an Jeova lõñliñ kin an rein kate ir joñan wõt air maroñ ilo jerbal eo air ñan E. Bareinwõt, rejjab maroñ lukkun jelã kin ñãt im ia eo ine in mol eo enaj edrek im jebar leen.—Ekklisiastis 11:6; Mark 12:41-44; 2 Dri Korint 8:12.

Jet ian Dri Kennan ro an Jeova eto air iñtan kin air nañinmij ak bwijwõlã. Ñan rein, air keini air bed ilo Imõn Kwelok eo emaroñ bõktok elap iñtan im inebata ñan ir. Air roñjake juõn katak kin jerbal in kwalok nan emaroñ  kakememej ir kin men eo rekin kõmmane im men eo rej kõnan wõt in kõmmane meñe remõjno. Men in emaroñ kõmman bwe ren lukkun buromõj kinke meñe rekõnan lor nan in kakabilek eo ak rejjab maroñ kinke reritto im mõjno. Mekarta, Jeova ej lukkun kaurõk tiljek im kijenmij eo air. Ejamin meloklok jerbal ko air remmõn toõn wõt air tiljek ñan e.—Sam 18:25; 37:28.

“Karel Buruer”

Ke Jon ear bwijwõlã, emaroñ kar lukkun melele bwe Anij elap jen buruer. Kememej bwe ear je: “Anij elap jen buruer im E jela men otemjelok.” Bareinwõt, Jon ear rejañ kij bwe jen “karel buruer.” Ta melelen an kar Jon ba nan kein?

Ekkar ñan juõn tikjinere kin Baibel eo, nan in “karel” ilo kajin Grik emaroñ bar melelen “ñan anjo ion, ak karel juõn ñan an errã.” Melelen bwe jej aikwij karel buruer ñan tõmak bwe Jeova ej yokwe kij. Ewi wãwen?

Fritz, eo kar konono kake ilo jinoin katak in, ear jerbal einwõt juõn elder ilo juõn ian congregation ko an Dri Kennan ro an Jeova iomin elõñlok jen 25 yiõ ko im ear lo bwe katak Baibel ibben make ear kalaplok wõt liki eo an bwe Jeova ej yokwe e. Ear ba: “Ij kanuij etale im keini aõ katak Baibel eo im book ko ad. Men in ej jibañ iõ bwe in jab lemnak kin wãwen ko iar iioni mokta ak bwe in reimanlok ñan juõn ilju im jeklaj emmõn. Jet ien, ij bar kememej tok wãwen ko renana iar iioni mokta, im ij bõk iñjake eo bwe Anij ejamin yokwe iõ. Bõtab, ij lo bwe aõ keini aõ katak ej kakajur iõ, kalaplok tõmak eo aõ, im jibañ iõ bwe in drebij wõt aõ jokkin wõt juõn im lõñliñ.”

Emol, ad riiti Baibel eo im kalomõnlokjen kake emaroñ jab ukõt wãwen eo jej iione. Bõtab, emaroñ ukõt wãwen ad lemnak kin wãwen eo jej iione. Ad bõk ñan buruer nan ko ilo Baibel eo ej jibañ kij ñan ad bõk lemnak eo an Anij. Bareinwõt, ad katak enaj jibañ kalaplok ad melele bwe Anij elap an joij im tiriamokake. Jidrik kin jidrik jenaj maroñ kile bwe Jeova ejjab naruer kin wãwen ko jar ridtolok ie, im ejjab naruer ñe jej nañinmij im mõjno. Ejelã bwe abañ ko jej jelmae, meñe ilo iñjake ak enbwin, ejjab aolep ien rej itok jen kij make, im ilo yokwe ej lemnak kin men kein.

Ak ta kin Margarette, eo kar konono kake ilo jinoin katak in? Ke ear jino jelã kajen Jeova, ear bareinwõt bõk elap tokjen jen an katak Baibel eo. Einwõt Fritz, Margarette ear aikwij kajimwe wãwen an lemnak kinke eoktak Jeova jen jemen. Jar ear jibañ Margarette kakajurlok tõmak eo an kin men ko ear katak kaki. Margarette ear ba: “Ilo jinoin iar aikwij watõk Jeova einwõt juõn jera eo ebak, kinke ear laplok an kar ro jera kwalok air yokwe iõ jen jema. Jidrik kin jidrik, iar maroñ kwalok iñjake ko aõ, men ko ij berre, inebata ko aõ, im abañ ko aõ ñan Jeova. Iar keini aõ konono ibben ilo jar, im ilo ejja ien eo wõt iar kajeoñ kobaik aolep men ko rekãl iar katak kin e, einwõt juõn puzzle. Elikin jet ien, yokwe eo aõ ñan Jeova ear laplok ñan joñan eo me iar kiõ watõk e bwe ej Jema eo eyokwe.”

Anemkwoj jen Inebata Otemjej

Toõn wõt an jukjuk im bed in enana bed, ejelok juõn emaroñ anemkwoj jen inebata ko. Ñan jet dri Kristian ro, jet ien iñjake in inebata ak berre emaroñ bar walok im kõmman bwe ren buromõj. Bõtab jemaroñ liki bwe Jeova ejelã buruer im ej lo ad kate kij ñan kõmmane jerbal eo ad ñan E. Ejamin meloklok yokwe eo jej kwaloke kin etan.—Dri Hibru 6:10.

Ilo jukjuk im bed eo ekãl iomin Iroij eo an Jisõs, aolep ro retiljek rejelã bwe renaj anemkwoj jen aolep abañ ko ilo jukjuk im bed in an Setan. Enaj juõn men in kainemõn elap! Inem jenaj lo elõñlok kein kamol ko kin yokwe eo an Jeova ñan kij. Mae ien eo, jen aolep liki bwe “Anij elap jen buruer im E jela men otemjelok.”—1 Jon 3:20.

[Kamelele eo Itulal]