Babaleg si Jehova nen Say Puso Tayo

INSULAT na salmista, “si Jehova so naroyroyo ed saray ontatakot ed sikato.” On, panliliketan na Manamalsa so pakakaimaton to a balang sakey ed saray lingkor to et manbabanikel a mangitandoro ed saray matunong ya estandarte to. Bebendisionan na Dios iray matoor ed sikato, papasesegen to ira, tan liligliwaen to ira diad panaon na inkaandiy ilalo. Amta to a saray managdayew to et ag-ayadyadri, kanian sikatoy realistiko ed iilaloan to ed sikara.​—Salmo 147:11.

Anganko ta mainomay tayon panisiaan a si Jehova et walaan na baleg a panangaro ed amin a lingkor to. Balet, walaray mampapagan maong ed saray dilin pakakaluksoan da kanian nibaga ran ag-iran balot aaroen nen Jehova. “Mauges ak la pian aroen nen Jehova,” nayarin ikuan da. Siempre, panapanaon et amin tayo so walaan na negatibo iran liknaan. Balet say arum so singano lawas a mibabarangkaan ed liknaan ya anggapo lay kuenta ra.

Liknaan a Nipaabeba

Diad panaoy Biblia walaray matoor ya indibidual a liknaen dan sikaray pakaskasi. Agla labay nen Job so manbilay tan liknaen ton sikatoy inkaindan la na Dios. Si Ana a nagmaliw ya ina nen Samuel et nanermenan ton tuloy nensaman so inkalepes to tan nannangisan ton tuloy. Si David so ‘apabikotkot a tuloy,’ tan si Epafrodito so agonigon lapud balitan panaaburidoan a tuloy na agagi to so impansakit to.​—Salmo 38:6; 1 Samuel 1:7, 10; Job 29:2, 4, 5; Filipos 2:25, 26.

Komusta balet iray Kristiano natan? Ompan say sakit, itatakken, odino arum niran personal a sirkumstansia so mangaamper ed arum ed pilalek dan manggawa na nagkalalo ni diad sagradon serbisyo. Lapud saya et liknaen dan agda napapaliket si Jehova tan saray kapananisiaan da. Odino nayarin lawas a tetelen na arum so inkasikara lapud apalabas iran lingo ra, a panduaruwaan  da no kasin sikara lay pinerdona nen Jehova. Anganko ta saramay say nanlapuan dan pamilya et maproblema so kombinsido ya agmanepeg a naaro. Panon iyan posibli?

Arum so binmaleg ed saray pamilya ya imbes a say aro so manunan napatnagan, say naromog et say inkasiblet, panagmelmelag, tan takot. Agdan balot alikna so pirmin panangaro ed sikara na sakey ya ama, a mangaanamot ed saray pankanawnawan mangidayew tan mamaseseg, a mangibaliwala ed saray impakalingo tan akaparaan a mamerdona anggan ed saray mas seryoson lingo, a say inkaligsa to et paligenen to so intiron pamilya. Lapud sikara so andian na maaron ama ed dalin, mairap dan talosan no antoy kabaliksay pakawalaan na maaron mangatatawen ya Ama.

Alimbawa, oniay insulat nen Fritz: “Say kaugawan ko tan inkatobonbalok so naapektoan a tuloy na agmaaron ugali nen tatay ko. * Agton balot angiter na komendasyon, tan agak balot apaapit ed sikato. Diad tua, naynay a siak so natatakot ed sikato.” Bilang resulta, si Fritz, a natan et wala la’d kapegleyan na 50, so siansian liknaen ton walay kulang ed sikato. Tan onia met so insalaysay nen Margarette: “Saray atateng ko so agmaabagey tan agmaaro. Sanen ginapoan koy manaral na Biblia, nairapan kon isipen no antoy nengneng na maaron ama.”

Saratan a liknaan, antokaman so sengegan et mankabaliksan a say serbisyo tayo ed Dios so no maminsan et agtanto napapakiwas na aro, noagta diad baleg a laknab et lapud pakakokonsiensia odino takot. Say sankaabigan tayo et nengneng toy kulang ni. Say pilalek a paliketen si Jehova tan saray kapananisiaan tayo so nayarin sengegan a liknaen tayon agtayo nagawaan so amin a labay tayon gawaen komon. Bilang resulta, nayarin agtayo nadampot iray kalat tayo, tetelen tayoy inkasikatayo, tan nadismaya lan maong.

Antoy nayarin gawaen? Anganko ta kaukolan tayon panonotay inkasikatayo ed kinabaleg na puso nen Jehova. Say sakey ya akatalos ed sayan maaron aspekto na personalidad na Dios et si apostol Juan.

“Babaleg so Dios nen say Puso Tayo”

Diad pansamposampot lay inmunan siglo K.P., onia so insulat nen Juan ed saray kapananisiaan to: “Dia ed saya [et] nabidbir tayo a kien itayo na tua, tan saray kapusoan tayo apaletan ira ed arap to. Ta no say kapusoan tayo et pooten to itayo, babaleg so Dios nen say puso tayo, tan kaba’ to so amin a bengatla.” Akin ya insulat nen Juan irayan salita?​—1 Juan 3:19, 20.

Mabitar ya amta nen Juan a nayarin walay panangondena na sakey a lingkor nen Jehova ed inkasikato. Anganko ta ontan met iray aliknan mismo nen Juan. Bilang kalangweran a maisasanok, aminsan et si Juan so kinorehi nen Jesu-Kristo lapud mapeget a pidedeneng to ed arum. Diad tua et si Juan tan say agi ton Santiago so “pinangaranan [nen Jesus] na Boanarges, salanti, Anak na Karol.”​—Marcos 3:17; Lucas 9:49-56.

Diad tinmumbok a masulok ya 60 taon, kinmalma si Juan, tan nagmaliw ya asimbang, maaro, tan mapangasin Kristiano. Diad panaon a sikatoy unor lan mabilay ya apostol tan insulat toy apuyanan ya inmunan sulat to, amta to a si Jehova et agto pikuentaanen so balang lingkor to ed amin ya impakaluksoan to. Imbes, sikato so maligsa, mapalabon-impanpuso, mabunlok, tan maabagey ya Ama, a walaan na aralem a panangaro ed amin a mangaaro ed sikato tan mandadayew ed sikato diad katuaan. Insulat nen Juan: “Say Dios sikato so aro.”​—1 Juan 4:8.

Panliketan nen Jehova so Serbisyo Tayo Parad Sikato

Amta na Dios iray nisipor lan kaleteyan tan pakakalingoan tayo, balet ta ikokonsidera to iraya. “Kabat to so inkagawa tayo; sikato nanodnonotan to a sapok itayo,” insulat nen David. Kabat nen Jehova so walan epekto na binalegan tayo ed no anto itayo natan. Diad tua et mas kabisado to itayo nen say pikabisado tayo ed inkasikatayon dili.​—Salmo 103:14.

Amta ton dakel ed sikatayo so malabay a magmaliw a duma, balet ta agtayo sarag a talonaan iray ag-inkayadyari tayo. Say kipapasen tayo so mipara ed si apostol Pablo, a nansulat: “Ta agko gawaen so kaabigan a labay ko komon: sabalet  so mauges ya agko labay, sikato ya so gawaen ko.” Parehoy pipupuligesgesan tayon amin. Diad arum a kipapasen et nayarin saya so mansumpal ed pakawalaan tayoy dilin manangondenan puso.​—Roma 7:19.

Lawas yon tandaan iya: Mas importanti so panmoria nen Jehova ed sikatayo nen say panmoria tayo’d inkasikatayon dili. Kapiganman a naimano ton panggunaetan tayon sikatoy paliketen, aliwa lambengat a sikatoy napenek noagta panliketan to itan. (Uliran 27:11) Anggaman say nagagawaan tayo et nengneng toy melmelag ed imaton tayo, say inkamabulos tan maong a motibo tayo so mamaliket ed sikato. Sikatoy onnenengneng ed labas ni nen say nagawaan tayo; natebek to no antoy labay tayon gawaen; amta to no antoray pirawat tayo tan pilpilalek tayo. Nabasa nen Jehova so walad kapusoan tayo.​—Jeremias 12:3; 17:10.

Alimbawa, dakel a Tastasi nen Jehova so kasiporan lan mabaing tan agmaalinyadan totoo ya agmalabay a mangalay imano. Parad sikara et say panagpulong na maong a balita ed kabkaabungan so talagan makapaangat. Ingen, lapud papakiwasen na pilalek a lingkoran so Dios tan tulongan so kapara ran totoo, anggan saray datin mabaing et naaralan da lan asinggeran iray kapara ran totoo tan itongtong so nipaakar ed Biblia. Nayarin liknaen dan melmelag so nagagawaan da, tan nayarin saya so mangekal na gayaga ra. Ompan say puso ra so mangipalikna a say mapublikon ministeryo ra et andiay kakanaan. Balet ta segseguradon panggayagaan nen Jehova so pirmin pansasagpot na saratan ed serbisyo ra. Niarum ni, agda naseguro no kapigan tan no iner ontubo, ombaleg, tan manbunga iray bini na katuaan ya intanem da.​—Eclesiastes 11:6; Marcos 12:41-44; 2 Corinto 8:12.

Sasagmaken na arum a Tastasi so manbayag a sakit odino itatakken. Parad sikara, say iyaatendi a regular ed Kingdom Hall et katekep toy ot-ot tan kapagaan. Say italineng ed paliwawan nipaakar ed panagpulong a kimey so mangipanonot ed sikara ed datin gagawaen da tan labay da met nin gawaen, balet ta ag-iyabuloy na makapkapuy lan laman da. Nayarin nakokonsiensia iraya lapud agda pakakasumpal ed konsehon labalabay dan gawaen. Ingen, seguradon papablien nen Jehova so katooran tan panagsungdo ra. Basta mansiansia iran matoor, agton balot lingwanan so impanmatoor da.​—Salmo 18:25; 37:28.

‘Apaletan so Kapusoan Tayo’

Sanen masiken la si Juan, maseguron atalosan ton tuloy so kinabaleg na puso na Dios. Tandaan ya insulat to: “Babaleg so Dios nen say puso tayo, tan kaba ‘to so amin a bengatla.” Niarum ni, pinaseseg itayo nen Juan a “saray kapusoan tayo apaletan ira.” Antoy labay ya ibaga nen Juan ed saratan a salita?

Unong ed Vine’s Expository Dictionary of Old and New Testament Words, say Griegon verb a nipatalos ya “apaletan” et kabaliksan toy “panangguyor, panalona odino panaeg, tangguyoren.” Diad arum a salita, pian paseguroan so puso tayo, kaukolan tayon daegen so puso tayo, a natangguyor itan a manisian sikatayoy inaro nen Jehova. Panon?

Si Fritz, ya asalambit ed bandad unaan na sayan artikulo, so manlilingkor bilang matatken ed sakey ed saray kongregasyon na Tastasi nen Jehova ed masulok lan 25 taon tan nalmoan to a say personal a panagaral so mamaseguro ed puso a sikatoy inad-aro nen Jehova. “Aaralen kon regular tan maalwar so Biblia tan saray palapagan tayo. Ontutulong iya ed siak ya aglawas nodnonoten iray apalabas noagta pansiansiaen ton malinew so marakep ya arapen tayo. No maminsan et siak so natatalonaay apalabas ko, tan liknaen kon agak balot naaro na Dios. Balet diad amin, lapud regular a panagaral et napapabiskeg so pusok, napapabulaslas so pananisiak, tan natutulongan ak a mansiansian magayaga tan balansi.”

Tua, say panagbasa na Biblia tan panagdalepdep so nayarin agmakapanguman ed aktual a situasyon tayo. Ingen, umanen na satan so panmoria tayo’d situasyon tayo. Say pangipasepsep na Salita na Dios ed kapusoan tayo so ontutulong ed sikatayon manisip a singa ed panag-isip na Dios. Sakey ni, lapud panagaral et lalo tayon natalosan so kinabaleg na puso na Dios. Kalkalnan naawat tayon ag-itayo tetetelen nen Jehova lapud binalegan tayon kaliber-liber, tan agto itayo met tetetelen lapud saray beblay tayo. Amta to a saray ambelat a sasakbaten na karaklan ed sikatayo​—balanglan diad emosyonal odino pisikal​—et mabetbet ya aliwan sikatayon mismo so sengegan, kanian maaro ton ikokonsidera iya.

Komusta balet si Margarette, ya asalambit ed akadkauna? Sanen akabatan to si Jehova, sikato so agunggunaan met a tuloy ed panaaral toy Biblia. Singa met ed si Fritz, kaukolan ton umanen so panmoria to nipaakar ed sakey ya ama. Say pikakasi so tinmulong ed si Margarette pian napansisiglaotan iray naaralan to. “Diad unona et impasen ko si Jehova bilang maapit a kaaro, lapud mas aliknak so impakawalaan na maaron kakaaro nen say maaron ama. Kalkalna et sarag ko met lan ibalikas ed si Jehova iray liknaan ko, panduaruwak, kapagaan, tan kagogonigonan ko. Maminpigan siak so mitongtong ed sikato diad pikakasi, ya impantutukoyan ko met so amin a balon bengatlan naaralan ko nipaakar ed sikato, imbes a pakawetwetan itan. Ag-abayag, abayuboan lan maong so liknaan ko ed si Jehova a sikatoy sakey a maaron Ama, ya agko la panduaruwaan itan,” inkuan nen Margarette.

Kibulos ed Amin a Kapagaan

Anggad wadia ni iyan marelmeng tan daan a sistema, anggapoy makapanilalon nibulos ed saray kapagaan. Parad pigaran Kristiano et nayarin onsebang so liknaan a napapagaan odino panduaruwa tan sengegan iya na pakadesdesan. Balet ta napaseguroan itayo ya amta nen Jehova so maong a motibo tayo tan pamapasya tayo ed serbisyo to. Agton balot lingwanan so panangaron ipapatnag tayo nisesengeg ed ngaran to.​—Hebreos 6:10.

Diad manasingger a balon dalin diad silong na Mesianikon Panarian, amin a matoor a totoo so makapanilalon nibulos ed mamapairap a sistema nen Satanas. Agaylan pakainawaan itan! Diad ontan et nanengneng tayoray dakel nin ebidensia no panon so kinabaleg na puso nen Jehova. Anggad agni asabi itan a panaon, napaseguroan so amin a “babaleg so Dios nen say puso tayo, tan kaba’to so amin a bengatla.”​—1 Juan 3:20.

[Paimano ed leksab]

[Blurb ed pahina 30]

Si Jehova so aliwan diktador noagta sikatoy sakey ya Aman maligsa, mapalabon-impanpuso, tan maabagey

 [Litrato ed pahina 31]

Ontulong ed sikatayo so panaral na Salita na Dios a manisip a singa ed panag-isip to