A Jehovah a Lmuut el Klou er a Rengud

A TA er a milluches er a Psalm a melekoi el kmo: “A [Jehovah] a bai dmeu a rengul er tirkei el meluu er ngii.” Ngmera el tekoi, ngike el Ulemeob a kmal dmeu a rengul sel lomes er a derta el mesiungel el melasem er a tkurrebab el sebechir el oltirakl a melemalt el llechul. Ngdirrek el omekngeltengat er a reblak a rengrir, e melisiich er tir, e mengelaod er tir er a taem er a chelebuul. Ngii a medengei el kmo a remengull er ngii a diak el mecherrungel, me ngdiak loukerrekeriil er tir el ua loukerrekeriil er a remecherrungel el chad.​—Psalm 147:11.

Ngkmal beot el bo doumerang el kmo a Jehovah a obang a kmal klou el bltikerreng el bedul a rokui el mesiungel. Engdi a rebebil a kuk mo imis el omdasu aike el chelitecheterir el mo uchul e te mo omdasu el kmo a Jehovah a diak el betik a rengul er tir. Te sebechir el mo melekoi el kmo “Ngak a kmal diak el cherrungel a omerellek el bedul a Jehovah me ngdiak el sebechel el mo betik a rengul er ngak.” Me nguaisei, a lebebil er a taem e kede mo omdasu el uaisei. Engdi a rebebil a kuk kmal mo meringel el oldechelakl a uldesuir el omdasu el kmo ngkmal diak a ultutelir el chad.

Melechesuar a Klou el Klengiterreng

Ngar er a taem er a omelechesel a Biblia, e te mla er ngii a reblak a rengrir el mesiungel a Jehovah el dirrek el mlo melechesuar a klou el klengiterreng. A Job a kmal mlo ouketui er a klengar er ngii, e dirrek el mlo omdasu el kmo a Jehovah a mla choitii. A Hana el mlo delal a Samuel a mla er ngii a taem el kmal di mlo mekngit a rengul e le ngii el mle kebai me ngdimlak a ngelekel. A David a mle blengkangk el ‘tal sils el di llangel.’ E a Epafroditus a kmal mle mekngit a rengul e le chisel a secherel a mlo uchul a kngtil a rengrir a rudam er ngii.​—Psalm 38:6; 1 Samuel 1:7, 10; Job 29:2, 4, 5; Filipi 2:25, 26.

E kuk uangerang el kirir a Rekristiano er a chelecha el taem? Ngdirrek el sebechel a secher me a cheluodel, me a lechub e ngkuk di blekerdelel a klengar er tir el mo uchul e ngmo diak el sebechir el remuul aike el sorir el kirel a omesiungir el mo er a Jehovah. Tiang a sebechel el mo uchul e te mo omdasu el kmo ngdikea el sebechir el rullii a ngerechelir el mo er a Jehovah me a dirrek el rekldemir er a klaumerang. Me a rekuk bebil a mo blechoel el di melatk a mekngit el lurruul er a ngar er a mong, me te mo omdasu el kmo a Jehovah a locha diak el sebechel el ousubes er tir. Me a rebebil el mle mekngit a rolel a klengar er tir er a chelsel a delengcheklir er a ngar er a mong a oterekokl a uldesuir el kmo te diak el rredemelel a bltikerreng. E tiang ngmekerang e mo uaisei?

A rebebil a mukeroul er a chelsel a delengchokl el diak a bltikerreng er a chelsel, e bai klou a rechorecherreng me a mekngit el omelekoi me a dirrek el dakt. Nglocha mo diak a techellir el mo medengelii a chedam el ngii a kmal betik a rengul er tir, e osiik a bek el techall el chemat er tir e melisiich er tir, e dirrek el omes el engelakl er a klengit el leriruul, e di kltmokl el mo ousubes a klengit el mo lmuut er a oberaod el klengit, me a bltkil a rengul a rullii a delengcheklir el mo blil a osebechakl el kirir a rokui el chad. Me tir el dimlak a demerir el uluubltikerreng el mo er tir a uchul, me ngmo meringel er tir el mo medengelii a mera el belkul a lengar ngii a Chedam el ngar er a eanged el betik a rengul er tir.

El ua tiang, a Fritz a meluches el kmo: “Ak mlukeroul el mo ngeasek el mle chuarm er a mekngit el omerellel a demak. * Ngdimlak a ta el lechat er ngak, e ak dirrek el ulemes er ngii el ua ngodech el chad. E a oumesingd el taem e ak kmal mle medakt er ngii.” E tiang a mlo uchul me chelechang e a Fritz a mla mo 50 me a derengel a rekil e dirk omdasu el kmo ngkmal diak a ngerang el lungil er ngii. A Margarette a mesaod el kmo: “A rechad er a blik a kmal dimlak el betik a rengrir er ngak, e dirrek el kmal mle mekngit a omerellir el bedul ngak. Me sera kumuchel el mesuub er a Biblia e ngkmal mle meringel er ngak el mo oumerang el kmo ngua ngerang a betik a rengul el chedam a loubltikerreng.”

Me a ngii di el tekoi el sebechel el mo uchul a chouaika el uldasu, a sebechel el rullii a omesiunged el mo er a Dios el mo diak lultuil er a bltkil a rengud el mo er ngii, e ngbai mo ultuil er a dekted me a lechub e kede ouuchel a rengud er a tekoi el dilubech el mei er kid. Me a ngii di el tekoi el domdasu el kmo ngungil a blechoel el ua lak el sal lungil. Me sel urunguled el soad el odeuir a rengul a Jehovah me a rekldemed er a klaumerang a sebechel el rullid el mo meruul a tekoi el mo engelakl er aike el sebeched. E tiang a sebechel el mo uchul e ngmo diak dungil el otaut a turrekong er kid, e mo blechoel el  omdasu el kmo ngmekngit el omerelled a uchul, e dirrek el mo blechoel el di mekngit a rengud.

Me ngngera sebeched el remuul? Nglocha sebeched el di kid el omeklatk er kid el kmo a Jehovah a kmal klou a rengul el kired. A apostol Johanes a chad el kmal mle ungil el medengelii tia el bltkil a rengul a Dios me a ungil el omerellel.

A “Dios a Lmuut el Klou er a Rengud”

Ngar er a ulebongel er a kot el dart el rak, e a Johanes a milluches el mo er a rekldemel er a klaumerang el kmo: “Itia uchul e kede mo medengei el kmo kede mlara klemerang el mei, e chollakl a rengud er medal a [Jehovah] a lsekum ngomals er kid a rengud; ele [Jehovah] a lmuut el klou ra rengud, e medengei rokuil tekoi.” Ngera uchul me a Johanes a milluches aika el tekoi?​—1 Johanes 3:19, 20.

A Johanes a mle medengei el kmo ngngar ngii a techellel a mesiungel a Jehovah el di ngii el mo oukerrekeriil er a rengul. Alta e ngii me ngdirrek el milechesuar tia el tekoi. Sera lekekerei el chad e ngmle bekongesengasech a rengul a uchul me a Jesus Kristus a mle kirel el omeklemalt er ngii el kirel a meringel el tekingel el mo er a rechad. Ngdirrek el ngii el Jesus a ulemngakl er a Johanes me a obekul er a Jakobus el “Boanerges, el blkul a kmo, ngelekel a derrumk.”​—Markus 3:17; Lukas 9:49-56.

Ngar er a chelsel aike el mlo uriul el 60 el rak er a klengar er a Johanes, e ngmirrael el mo medemedemek a omerellel, e dirrek el mlo tabesul a osengel sel lomes a tekoi, e dirrek el kmal mlo betik a rengul e chubechubechad el Kristiano. Me sel taem er a loluches er a kot el babilengel ngika el mlo ulebongel el apostol, e ngkmal klungang a klemedengei er ngii el kmo a Jehovah a diak loukerrekeriil er a rechedal er a bek el mekekerei el klengit. Ngbai kmal klou a rengul el kired e bekururau, e dirrek el chubechubechad el Chedam, el dmolech a bltkil a rengul el mo er tirke el betik a rengrir er ngii e dirrek el mengull er ngii el oba klemerang. Ngii el Johanes a milluches el kmo: “Le Dios a bltikerreng.”​—1 Johanes 4:8.

A Jehovah a Dmeu a Rengul er a Omesiunged el Mo er Ngii

A Dios a kmal ungil el medengei a chelitechetud me aike el diak el sebeched el remuul. Me a David a milluches el kmo: “Ng medengei el kmo kede rruul er a ngerang; ng melatk el kmo kid a di chebechab.” Me a Jehovah a medengei el kmo a blekerdelel a klengar er kid er a uchei a dirrek el klou a lerellii er a omerelled er a bek el sils. Me a lmuut el tang, a ungil el klemedengei er a Jehovah el kired a lmuut el klou er sel klemedengei er kid el di kired.​—Psalm 103:14.

A Jehovah a kmal ungil el medengei el kmo kid a soad el meruul er kid el mo ngodech er a rebebil, engdi ngdiak el sebeched el mo mesisiich er a blekerdeled el diak de mecherrungel. A blekerdeled a sebeched el omekesiu er ngii er a tekingel a apostol el Paulus el kmo: “Ele ngdiak kuruul a ungil el soak, e bai meruul a mekngit el ikel diak el soak.” Me kid el rokui a chelebangel er a osisiu el omelsemai. Ngoeak tiaikid el omeruul e ngrulleterir a rebebil el mo di tir el oukerrekeriil er tir.​—Rom 7:19.

Lak mobes er tiang: Ngdiak el klou a ultutelel sel losenged el di kired, ngbai sel osengel a Jehovah el kired. Sel taem el lesekid el melasem el oldeu er a rengul, e ngdiak di bo lungil a rengul e ngbai mera el oba klou el deurreng. (Osisechakl 27:11) Me alta e kede omes a tekoi el doruul el kora mekekerei el tekoi, engdi sel urunguled el soad el meruul a tekoi a kmal odeuir a rengul a Jehovah. Ngii a omes el engelakl er aike el deruul, e dirrek el medengei a urunguled me aike tekoi el soad el meruul. A Jehovah a kmal sebechel el menguiu a rengud.​—Jeremia 12:3; 17:10.

El ua itiang, a rebetok el Sioning er a Jehovah a sekemerur e dirrek el cheklmuk, e diak el chad er a seked. Me ngoeak aikaikid el omerellir e ngmo meringel er tir el meruul er tia el ureor el oldingel a obliil. Me nguaisei, engdi sel urungulir el sorir el mesiou er a Dios e olengeseu er a rengar bita er tir, a rulleterir tirkaikid el sekemerur el chad el mo mesuub el mo mengedecheduch er a retonari er tir el kirel a Biblia. Te dirrek el locha mo omdasu el kmo ngkmal di kekerei a sebechir el remuul, el mo uchul e te oridii a deurreng er tir. Te dirrek el locha mo omdasu el kmo a omesiungir a diak a ultutelel. Engdi a Jehovah a kmal dmeu a rengul er a meringel el urerir choua itirka el chad. Me a lmuut el tang, ngdiak el sebechir el medengei el kmo ngoingerang, e ngar er ker e ngsebechel el duubech a tane er a klemerang el mo klou e mo ourodech.​—Olisechakl 11:6; Markus 12:41-44; 2 Korinth 8:12.

A rebebil el Sioning a kuk smecher el kemanget el taem me a lechub e te mocha mechuodel. Me ngmo meringel er tir el mo er a bek el temel a miting el ringelel a bedengir me a uldesuir a uchul. Me sel lorrenges a cheldecheduch el kirel a ureor er a berkel a klumech e ngsebechel el mo uchul e te mo melatk aike el temir el mle mesisiich e meruul er a ureor, e dirrek el dirk sorir el meruul er ngii, engdi ngchelitechetul a bedengir a uchul me ngdikea el sebechir. Choua ikaikid el tekoi a sebechel el rulleterir el mo di tir el oukerrekeriil er tir, e le te omdasu el kmo ngdikea el sebechir el lotireklii a  uleklatk alta e a rengrir a kmal dirk sorir. Me nguaisei, engdi a Jehovah a omes er a blakerreng me a ducherreng er tir el kmal mekreos. Me sel lolemolem el blak a rengrir e ngkmal diak el sebechel el obes er tir.​—Psalm 18:25; 37:28.

Mo ‘Chelellakl a Rengud’

Sel taem er a lechudelang a Johanes, e ngulterekokl el kmal mla mo ungil el medengelii a klou el bltkil a rengul a Dios. E tiang a kmal sebeched el mesang er a tekingel el kmo: “Ele Dios a lmuut el klou ra rengud, e medenge rokuil tekoi.” A Johanes a dirrek el lmuut el melisiich er kid el mo “chollakl a rengud.” Me ngngerang a mle belkul aika el tekoi el lullekoi?

Sel doltirakl er a Vine’s Expository Dictionary of Old and New Testament Words, e a tekoi er a Grik el “chollakl” a loleiuid er ngii el “smisichii a chad, me a lechub e ngmo mesisiich, me a lechub e ngmelisiich.” Me a bo el sebeched el chollakl a rengud, e ngbelkul a kmo ngkired el mo mesisiich a rengud el oumerang el kmo a Jehovah a kmal betik a rengul er kid. El oeak a ngera el rolel?

A Fritz el dulsaod er ngii er a uchelel tia el suobel a mla mesiou el ta er a remechuodel er a ta er a blil a ongdibel er a Resioning er a Jehovah el betok er a 25 el rak, e dirrek el mla metik er ngii el kmo a omesubel el di ngii el tang a kmal mla smisichii a rengul el kirel a klou el bltkil a rengul a Jehovah, me ngmelekoi el kmo: “Ak mesuub er a Biblia me aike el babilenged el loltobed a blak a rengul mesiou er a bek el taem. Tiang a mla ngosukak el mo diak di kulebedebek aike el tekoi er a ngar a mong, ngdirrek el mla meskak a bleketakl el osengek el kirel aike el ungil el tekoi el mo er ngii er a ngar medad. A lebebil er a taem e aike el mekngit el tekoi el dilubech er a klengar er ngak er a uchei a me duum er a uldesuek, el rullak el mo omdasu el kmo a Dios a diak el sebechel el mo betik a rengul er ngak. Engdi ak mera el melechesuar el kmo sel le blechoel el ulterekokl a temek el mesuub e ngkmal melisiich er a renguk, e dirrek el mekurulii a klaumerang er ngak e ngosukak el mo oba tabesul el uldasu el kirel a tekoi, e melemolem el dmeu a renguk.”

Ngmera el tekoi, a omengiuel a Biblia me a omelebedebekel a locha diak el sebechel el ngodechii a blekeradel el de chelebangel er ngii. Engdi ngkmal sebechel el ngodechii a osenged el kirel a tekoi me a lechub e ngomeruul el dechelebangel. Me sel dolebedebek e dolalem a Tekingel a Dios er a chelsel a rengud, e ngsebechel el ngosukid el mo melatk a tekoi el uai Ngii. Me a lmuut el tang, cherengel a taem el dosuub e ngmo sebeched el mekurulii a klemedengei er kid el kirel sel klou el bltkil a rengul a Jehovah. Misei e ngmo ulterekokl a rengud el kmo a Jehovah a diak loltelechakl er kid el kirel a tekoi el dilubech er a klengar er kid er a dirk demekekerei, e dirrek el diak loltelechakl er kid el kirel a chelitechetud. Ngkmal ungil el medengei a ringelel a uldesuir me a rengrir a rechad el kmo ngdimlak di el tir a uchul, me ngoba klou el bltkil a rengul el mesumech a rokui el tekoi el mo ungil.

E kuk uangerang a Margarette el dulsaod er ngii er a uchei? Nguleak a omesubel er a Biblia e ngmlo medengelii a Jehovah, e tiang a dirrek el mlo uchul a betok el klungiolel. Ngdi osisiu el omeruul el mo er ngii me a Fritz, ngmle kirir el melodech a osengir me a uldesuir el bedul a redemerir. A nglunguuch a kmal ngilsuir a Margarette el lmuut el mo mesisiich el okiu a omesubel, me ngmelekoi el kmo: “Ngsebechek el omuchel el melekoi el kmo a kulemes er a Jehovah el ua kmeed el sechelik, e le ngbai mle sebechek el melechesuar a ungil el deleuill er ngak el obengterir a resechelik, e dimlak a ungil el deleuill er ngak el obengkel a mera el demak. Cherengel a taem e ak silubii a rolel e ngsebechek el ouchais aike el mera el ngar er a renguk me aike el tekoi el meringel er a uldesuek, me aike el rrau a renguk er ngii el tekoi, me a dirrek el mondai er a klengar er ngak el mo er a Jehovah. Ak mlo blechoel el mengedecheduch er ngii el okiu a nglunguuch, e dirrek el mlo omekuak aike el mekekerei el tekoi el kulsuub el kirel. Me a cherengel a taem, e a renguk me a uldesuek a milekurulii a bltkil a renguk el mo er a Jehovah el mo klou el uchul e ak mlo omes er ngii el ua kmal betik a rengul el Demak.”

Mo Mimokl er a Rokui el Sebekreng

A lsekum tia el mekngit el blekeradel er a beluulechad a di melemolem, e ngkmal diak a chad el sebechel el mo mimokl er a rokui el sebekreng. Me a rebebil el Kristiano a mo omdasu el kmo a sebekreng me a dirrek el rraurreng a locha sebechel el lmuut el mo er ngii el mo uchul a ringelel a uldasu. Engdi ngkmal kirel el mo ulterekokl a rengud el kmo a Jehovah a ungil el medengelii a uchul me kede mesiou er ngii, e dirrek el medengei a meringel el urered el kirel a omesiunged el mo er ngii. Me ngkmal diak el sebechel el obes er sel bltkil a rengud el dulechotii el kirel a ngklel.​—Hebru 6:10.

Ngar er a chelsel tia el merekung el beches el beluulechad el chederedall er cheungel a Rengedel a Messias, e a rokui el blak a rengrir el chad a mo mengubet er a klsibai er tia el beluulechad er a Satan. Ngmera el mo klou el deurreng el bo dolechesuar er sel taem! Seikid e ngmo sebeched el mesang a olechotel sel klou el bltkil a rengul a Jehovah. Me chelechang el mo lmuut er sel taem e ngkmal kirel el mo ulterekokl a rengud el kmo a “Dios a lmuut el klou ra rengud, e medenge rokuil tekoi.”​—1 Johanes 3:20.

[Footnote]