M̀mọ̀n̄ ke Afo Ekeme Ndinyene Emem Esịtidem?

Eyo nnyịn okpụhọde ke ediwak usụn̄ ye eke Thoreau, oro ẹketịn̄de ẹban̄a ke ibuotikọ oro ekebemde iso. Akpan ukpụhọde kiet edi nte ke ekese item ẹdu mfịn ke nte ẹkemede ndinyene emem esịtidem. Mme ekpepn̄kpọ mban̄a ekikere ye mme ewet n̄wed unọ idem un̄wam—idem mme ewet n̄wedmbụk n̄kpọntịbe—ẹsinọ mme ekikere mmọ. Item mmọ ekeme ndinọ ndusụk un̄wam ibio ini; edi kaban̄a usọbọ oro ebịghide, ẹyom se ikponde ikan oro. Oro edi se mme owo oro ẹkesiakde ke ibuotikọ oro ekebemde iso ẹkedide ẹdifiọk.

ANTÔNIO, Marcos, Gerson, Vania, ye Marcelo ẹketo nsio nsio idaha ke uwem ẹnyụn̄ ẹnyene nsio nsio mfịna. Edi mmọ ẹma ẹnyene ke nsụhọde n̄kaha n̄kpọ ita oro ẹkedide ukem. Akpa, ini ama odu oro mmọ ‘mîkenyeneke idotenyịn, mîkonyụn̄ ifiọkke Abasi ke ererimbot.’ (Ephesus 2:12) Ọyọhọ iba, ama ọdọn̄ mmọ ndinyene emem esịtidem. Ndien ọyọhọ ita, kpukpru mmọ ẹkenyene emem esịtidem oro mmọ ẹkeyomde ke ẹma ẹkenyịme ukpepn̄kpọ Bible ye Mme Ntiense Jehovah. Nte mmọ ẹkekade iso ndikpep n̄kpọ, mmọ ẹma ẹdifiọk ẹte ke Abasi enyene udọn̄ ke idemmọ. Ke akpanikọ, nte Paul akasiande mbon Athens eyo esie, Abasi ‘iyomke usụn̄ ye baba nnyịn owo kiet.’ (Utom 17:27)  Ndinịm emi ke akpanikọ ke ofụri esịt edi akpan n̄kpọ ke ndinyene emem esịtidem.

Ntak Emem Ananade Ntem?

Bible ọnọ akpan ntak iba ẹmi emem ananade ke ererimbot—edide emem esịtidem m̀mê emem ke ufọt mme owo. Ẹnam akpa an̄wan̄a ke Jeremiah 10:23: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” Owo inyeneke ọniọn̄ ye ikike ndikara idemesie ye unana un̄wam, ndien n̄kukụre un̄wam oro enyenede ata ufọn oto Abasi. Tutu amama mme owo oro mîyomke ndausụn̄ Abasi idinyeneke emem oro ebịghide. Ẹkụt ọyọhọ ntak iba oro emem ananade ke mme ikọ apostle John oro: “Ofụri ererimbot onyụn̄ esịne ke ubọk andidiọk.” (1 John 5:19) Ke ndausụn̄ Abasi mîdụhe, kpukpru ini mme edinam “andidiọk,” kpa Satan—emi enyịn owo mîkwe edi edide ata idem n̄kpọ onyụn̄ enen̄erede okop odudu—ẹyenam mme ukeme owo ndinyene emem ẹkụt edikpu.

Ke ntak iba ẹmi—nte ke ata ediwak owo iyomke ndausụn̄ Abasi ye nte ke Satan enen̄ede okop odudu ke ererimbot—ekpụk ubonowo ke ofụri ofụri odu ke idaha nditaha. Apostle Paul ama etịn̄ aban̄a emi nte odotde ete: “Ofụri ekondo ke omụm mmụm, onyụn̄ odu ke ubiak uman tutu esịm emi.” (Rome 8:22) Anie ekeme ndifan̄a mme ikọ oro? Ke mme idụt uforo ọkọrọ ye mme idụt oro ẹbuenede, mme mfịna ubon, ubiatibet, ukwan̄ikpe, utọk, unana iwụk ke ndutịm uforo, usua eke ekpụk, ufịk, udọn̄ọ, ye ata ediwak n̄kpọ eken, ẹbiat emem esịtidem mme owo.

Ebiet Oro Ẹkemede Ndikụt Emem Esịtidem

Ke ini Antônio, Marcos, Gerson, Vania, ye Marcelo ẹma ẹkekpep Ikọ Abasi, kpa Bible, mmọ ẹma ẹkpep mme n̄kpọ oro okokpụhọrede uwem mmọ. Akpa n̄kpọ edi, mmọ ẹma ẹkpep nte ke usen kiet idaha ererimbot oyokpụhọde. Emi ikam idịghe n̄kịmn̄kịm idotenyịn nte ke kpukpru n̄kpọ ẹyekabade ẹfọn ke akpatre. Enye edi ata mbuọtidem oro enyenede isọn̄ nte ke Abasi enyene uduak ọnọ ubonowo ye nte ke idem idahaemi nnyịn imekeme ndibọ ufọn nto uduak oro edieke nnyịn inamde uduak esie. Mmọ ẹma ẹda se mmọ ẹkekpepde ẹto Bible ẹsịn ke edinam, ndien mme n̄kpọ ẹma ẹkabade ẹfọn ye mmọ. Mmọ ẹma ẹnyene inemesịt ye emem oro okokponde akan se mmọ ẹkekerede.

Antônio ibuanake aba ke edinam uwụt iyatesịt ye en̄wan itieutom. Enye ọfiọk ete ke mme ukpụhọde oro ẹsisụn̄ọde ẹto mme utọ edinam oro ẹdi esisịt ye ke ibio ini kpọt. Akani eseutom emi emekpep aban̄a Obio Ubọn̄ Abasi. Enye edi Obio Ubọn̄ oro ediwak miliọn owo ẹsibọn̄de akam ẹben̄e ke ini mmọ ẹbọn̄de Akam Ọbọn̄ (m̀mê, Ete Nnyịn), ẹdọhọde Abasi ẹte: “Yak obio ubọn̄ fo edi.” (Matthew 6:10a, New International Version) Antônio ama ekpep nte ke Obio Ubọn̄ Abasi edi ata ata ukara eke heaven oro edidade ata emem ọsọk ubonowo.

Marcos ama ekpep ndida ọniọn̄ ọniọn̄ item Bible aban̄ade ndọ nsịn ke edinam. Nte utịp, akani ebre-mbre ukara emi idahaemi afiak adiana ye n̄wan esie ke inemesịt. Enye n̄ko asak iso ese ini emi, ke mîbịghike, Obio Ubọn̄ Abasi edidade itie ọdiọkitọn̄ ye ibụk ibụk ndutịm ererimbot emi. Enye enyene ntotụn̄ọ ifiọk aban̄a udịmikọ Akam Ọbọn̄ emi ọdọhọde: “Yak ẹnam uduak fo ke isọn̄ nte ẹnamde ke heaven.” (Matthew 6:10b, NIV) Ke ini ẹdinamde uduak Abasi ke isọn̄, mme owo ẹyenyene orụk uwem oro akananam mmọ mînyeneke.

Nso kaban̄a Gerson? Enye idịghe owo nyon̄ ye inọ aba. Uwem eyen emi ekesidụn̄de ke efak mi enyene se ọwọrọde idahaemi koro enye adade odudu esie ndin̄wam mbon efen ẹnyene emem esịtidem. Nte mme ifiọk n̄kpọntịbe ẹmi ẹwụtde, edikpep Bible ye edida se enye ọdọhọde nsịn ke edinam ekeme ndifori uwem owo akamba akamba.

 Emem Esịtidem ke Ntịme Ntịme Ererimbot

Jesus Christ edi ata akpan owo ke ndisu uduak Abasi, ndien ke ini mme owo ẹkpepde Bible ye Mme Ntiense Jehovah, mmọ ẹsikpep ekese ẹban̄a enye. Ke okoneyo oro enye akamanade, mme angel ẹma ẹkwọ itoro ẹnọ Abasi ẹte: “Ubọn̄ enyene Abasi ke ata enyọn̄. Emem onyụn̄ odu ke isọn̄ ke otu owo ẹmi Enye enende iso ye mmọ.” (Luke 2:14) Ke Jesus ama ọkọkọri ọwọrọ owo, enye ama enyene udọn̄ ndifori uwem mme owo. Enye ama ọfiọk mme ntụk mmọ onyụn̄ atua mbon ukụt ye mbon udọn̄ọ mbọm. N̄ko, nte ekemde ye ikọ mme angel oro, enye ama ada ndusụk udomo emem esịtidem ọsọk mbon nsụhọdeidem. Ke utịt utom ukwọrọikọ esie, enye ama ọdọhọ mme mbet esie ete: “N̄kpọn̄ emem ye mbufo; nyak emem Mi nnọ mbufo: idịghe nte ererimbot ọnọde ke Ami nnọ mbufo. Ẹkûyak esịt etịmede mbufo, ẹkûnyụn̄ ẹyak esịt mbufo okop ndịk.”—John 14:27.

Jesus ikedịghe ọnọ-un̄wam kpọt. Enye ekemen idemesie odomo ye ekpemerọn̄, onyụn̄ emen mme osụhọde-idem anditiene enye odomo ye erọn̄ ke ini enye ọkọdọhọde ete: “Ami n̄kedi man mmọ ẹnyene uwem, ẹnyụn̄ ẹdọdiọn̄ ẹnyene ẹkan. Ami ndi eti ekpeme-erọn̄; eti ekpemerọn̄ ayak uwem Esie ọduọk kaban̄a mme erọn̄.” (John 10:10, 11) Ih, ke edide isio ye ata ediwak adausụn̄ mfịn ẹmi ẹbemde iso ẹkere ẹban̄a idemmọ, Jesus ama ayak uwem esie ọduọk kaban̄a mme erọn̄ esie.

Didie ke nnyịn ikeme ndibọ ufọn nto se Jesus akanamde? Ediwak owo ẹmehe ye mme ikọ ẹmi: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Akpa kan̄a, edibuọt idem ye Jesus oyom ẹnyene ifiọk ẹban̄a enye ye Ete esie, Jehovah. Ifiọk aban̄ade Abasi ye Jesus Christ ekeme ndisụn̄ọ ke ndinyene ntotụn̄ọ itie ebuana ye Jehovah Abasi, oro edin̄wamde nnyịn inyene ifụre ekikere.

Jesus ọkọdọhọ ete: “Mme erọn̄ Mi ẹkop Mi uyo, Ami mmonyụn̄ mfiọk mmọ, mmọ ẹnyụn̄ ẹtiene Mi. Ami nnyụn̄ nnọ mmọ nsinsi uwem; ndien mmọ iditakke ke nsinsi, baba owo kiet idinyụn̄ iwamakede mmọ isio Mi ke ubọk.” (John 10:27, 28) Nso ufiop ufiop, ọnọ-ndọn̄esịt ikọ ke mmọ ẹmi ẹdi ntem! Edi akpanikọ, Jesus eketịn̄ mmọ ke se ikperede ndisịm isua tọsịn iba ẹmi ẹkebede, edi mmọ ẹnyene kpa ukem odudu oro mmọ ẹkenyenede ke ini oro. Kûdede ufre ute ke Jesus Christ osụk ododu ke uwem onyụn̄ okop odudu, akarade idahaemi nte Edidem Obio Ubọn̄ Abasi eke heaven oro ẹdoride ke ebekpo. Kpa nte ekedide ediwak isua ko ke ini enye okodude ke isọn̄, enye osụk ekekere aban̄a mbon nsụhọdeidem ẹmi ẹyomde ifụre ekikere. Ke adianade do, enye osụk edi Andikpeme mme erọn̄ esie. Edieke nnyịn itienede enye, enye ayan̄wam nnyịn inyene emem esịtidem, emi esịnede idotenyịn akpanikọ ndikụt ọyọhọ emem ke ini iso—emi ediwọrọde unana afai, unana ekọn̄, ye unana ubiatibet.

Mme ata ufọn ẹsisụn̄ọ ẹto ndifiọk nnyụn̄ nnịm nte ke ebede ke Jesus, Jehovah ayan̄wam nnyịn. Nte afo emeti Vania, emi nte ekpri n̄kaiferi okobiomde ndodobi mbiomo okonyụn̄ ekerede ke Abasi ama efre imọ? Idahaemi Vania ọfiọk ete ke Abasi ikpọn̄ke imọ. Enye ọdọhọ ete: “Mma n̄kpep nte ke Abasi edi ata owo emi enyenede nti edu. Ima esie okonụk enye ndinọ Eyen esie edi isọn̄ man ọnọ nnyịn uwem. Edi ata akpan n̄kpọ ndifiọk emi.”

Marcelo etịn̄ ete ke itie ebuana imọ ye Abasi edi ata idem n̄kpọ. Akani aka-usọrọ emi ọdọhọ ete: “Ediwak ini n̄kparawa owo isifiọkke se ẹkpenamde, ndien emi esisụn̄ọ ke mmọ ndinọ idem unan. Ndusụk mmọ ẹsisịn idem ke edida n̄kpọsọn̄ ibọk ke idiọk usụn̄, nte ami n̄kesịnde. Mmenyene idotenyịn nte ke ẹyediọn̄ ediwak owo efen  efen, nte ẹkediọn̄de mi, ebe ke ndikpep akpanikọ aban̄ade Abasi ye Eyen esie.”

Ebede ke ndikpep Bible ye ntịn̄enyịn, Vania ye Marcelo ẹma ẹkọri ọkpọsọn̄ mbuọtidem ke Abasi ẹnyụn̄ ẹberi edem ke unyịme esie ndin̄wam mmọ ẹse ẹban̄a mme mfịna mmọ. Edieke nnyịn inamde se mmọ ẹkenamde—ikpepde inyụn̄ idade se Bible ọdọhọde isịn ke edinam—nnyịn iyenyene emem esịtidem ke akamba udomo, kpa nte mmọ ẹkenyenede. Ndien nsịnudọn̄ emi apostle Paul ọkọnọde eyenen̄ede enyene se ọwọrọde ọnọ nnyịn: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.”—Philippi 4:6, 7.

Ndinyene Ata Emem Mfịn

Jesus Christ ke ada mme owo oro ẹkopde biọn̄ akpanikọ usụn̄ aka nsinsi uwem ke paradise isọn̄. Nte enye adade mmọ ekesịn ke edisana utuakibuot Abasi, mmọ ẹnyene ukem emem oro ẹtịn̄de ẹban̄a ke Bible: “Ikọt mi ẹyedụn̄ ke ufọk emem, ye ke idụn̄ ifụre, ye ke ebiet nduọkodudu eke edide sụn̄sụn̄.” (Isaiah 32:18) Ndien oro edi sụk ntabinse emem oro mmọ ẹdinyenede ke ini iso. Nnyịn ikot ite: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:11, 29.

Ntre nte nnyịn imekeme ndinyene emem esịtidem mfịn? Ih. Akan oro, nnyịn imekeme ndinịm ke akpanikọ nte ke n̄kpet n̄kpet ini iso, Abasi ọyọnọ okopitem ubonowo emem oro akananam mmọ mînyeneke. Do, ntak mûben̄eke enye ke akam ute ọnọ fi emem esie? Edieke afo enyenede mme mfịna oro ẹbiatde emem fo, bọn̄ akam kpa nte Edidem David ọkọbọn̄de ete: “Ndutụhọ esịt mi omokpon: sio mi ke nnanenyịn mi. Se ukụt mi, ye afanikọn̄ mi; nyụn̄ dahado ke kpukpru mme idiọk ido mi.” (Psalm 25:17, 18) Nịm ke akpanikọ nte ke Abasi esikpan̄ utọn̄ ke mme utọ akam oro. Kpukpru mbon oro ẹyomde emem ke ofụri esịt, enye esitat ubọk esie ọnọ mmọ emem. Ẹsọn̄ọ ẹnọ nnyịn ima ima ẹte: “Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ. Enye ayanam se mme andibak enye ẹmade: onyụn̄ okop eseme mmọ, onyụn̄ anyan̄a mmọ.”—Psalm 145:18, 19.

[Se Ẹwetde ke Ikpọ Abisi ke page 5]

Owo inyeneke ọniọn̄ ye ikike ndikara idemesie ye unana un̄wam, ndien n̄kukụre un̄wam oro enyenede ata ufọn oto Abasi

[Se Ẹwetde ke Ikpọ Abisi ke page 6]

Ifiọk aban̄ade Abasi ye Jesus Christ ekeme ndisụn̄ọ ke ndinyene ntotụn̄ọ itie ebuana ye Jehovah Abasi, oro edin̄wamde nnyịn inyene emem esịtidem

[Ndise ke page 7]

Ndinam item Bible etịp esịn ke emem emem uwem ubon