Nɛgbɛ Obaanyɛ Oná Mligbɛ Toiŋjɔlɛ Yɛ?

Srɔtofeemɔi babaoo yɛ wɔbe nɛɛ kɛ Thoreau nɔ ni atsĩ tã yɛ sane ni tsɔ hiɛ lɛ he lɛ mli. Srɔtofeemɔ wulu kome ji akɛ asɛɛɛ ŋaawoo ni kɔɔ bɔ ni aaafee aná jwɛŋmɔŋ toiŋjɔlɛ ŋmɛnɛ lɛ he. Jwɛŋmɔ he nilelɔi kɛ woji ni akɛyeɔ buaa he ŋmalalɔi—adafitswaa woji amli niŋmalɔi po—kɛ amɛ susumɔi haa. Amɛ ŋaawoo lɛ baanyɛ afee be kukuoo ko yelikɛbuamɔ nɔ; shi kɛha tsabaa ni hiɔ shi daa lɛ, nɔ ko ni mli kwɔ waa he miihia. No ji nɔ ni aŋkroaŋkroi ni atsĩ amɛtã yɛ sane ni tsɔ hiɛ lɛ mli lɛ yana.

ANTÔNIO, Marcos, Gerson, Vania, kɛ Marcelo jɛ shihilɛi srɔtoi amli ni amɛhiɛ naagbai srɔtoi. Shi kɛ hoo kwraa lɛ amɛhiɛ nibii etɛ ni je amɛhe. Klɛŋklɛŋ lɛ, be ko shɛ ni ‘amɛbɛ hiɛnɔkamɔ ko, ni amɛbɛ Nyɔŋmɔ tete yɛ je nɛŋ.’ (Efesobii 2:12) Nɔ ni ji enyɔ lɛ, amɛshwe koni amɛná jwɛŋmɔŋ toiŋjɔlɛ. Ni nɔ ni ji etɛ lɛ, amɛ fɛɛ amɛná mligbɛ toiŋjɔlɛ ni amɛtaoɔ lɛ be mli ni amɛkpɛlɛ nɔ akɛ amɛkɛ Yehowa Odasefoi baakase Biblia lɛ sɛɛ. Be mli ni amɛyaa amɛhiɛ lɛ, amɛbayɔse akɛ Nyɔŋmɔ yɛ amɛhe miishɛɛ. Yɛ anɔkwale mli lɛ, taakɛ Paulo kɛɛ Ateenebii ni hi shi yɛ ebeaŋ lɛ, Nyɔŋmɔ ‘kɛ wɔteŋ mɔ fɛɛ mɔ teŋ jɛkɛɛɛ.’ (Bɔfoi lɛ Asaji 17:27) Ní  wɔɔhe enɛ wɔye yɛ anɔkwale mli lɛ ji yelikɛbuamɔ nɔ̃ titri kɛha mligbɛ toiŋjɔlɛ namɔ.

Mɛni Hewɔ Toiŋjɔlɛ Fioo Pɛ Yɔɔ?

Biblia lɛ kɛ yiŋtoi titrii enyɔ hewɔ ni toiŋjɔlɛ bɛ je lɛŋ lɛ haa—kɛ́ eji mligbɛ toiŋjɔlɛ loo toiŋjɔlɛ ni aaahi gbɔmɛi ateŋ. Atsɔɔ klɛŋklɛŋ nɔ lɛ mli yɛ Yeremia 10:23 lɛ akɛ: “Gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” Gbɔmɔ bɛ nilee loo nii ni anaa kɛyaa shɔŋŋ koni ekɛye ehe nɔ ní enáaa yelikɛbuamɔ, ni yelikɛbuamɔ pɛ ni jara wa lɛ jɛɔ Nyɔŋmɔ ŋɔɔ. Adesai ni taooo Nyɔŋmɔ gbɛtsɔɔmɔ lɛ naŋ naanɔ toiŋjɔlɛ kɔkɔɔkɔ. Yiŋtoo ni ji enyɔ hewɔ ni toiŋjɔlɛ bɛ lɛ ji nɔ ni anaa yɛ bɔfo Yohane wiemɔi lɛ amli akɛ: “Jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Kɛji ŋwɛi gbɛtsɔɔmɔ fataaa he lɛ, mɔdɛŋ ni adesa bɔɔ koni ená toiŋjɔlɛ lɛ baakã he afee nijiaŋwujee kɛtsɔ mɔ ni anaaa lɛ shi eyɛ diɛŋtsɛ—ni yɔɔ hewalɛ waa—“mɔ fɔŋ,” Satan nifeemɔi lɛ anɔ.

Yɛ nɛkɛ yiŋtoi enyɔ nɛɛ—ákɛ mɛi babaoo taooo Nyɔŋmɔ gbɛtsɔɔmɔ sɛɛgbɛ ni ákɛ Satan yɛ ekãa waa yɛ je lɛŋ hewɔ lɛ—adesai aweku lɛ fɛɛ eyaje awerɛhoyeli shihilɛ mli. Bɔfo Paulo tsɔɔ mli jogbaŋŋ akɛ: “Bɔɔ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔ̃mɔɔ kɛbashi ŋmɛnɛŋmɛnɛ.” (Romabii 8:22) Namɔ baanyɛ aje nakai sane lɛ he ŋwane? Yɛ maji ni yɔɔ nii lɛ kɛ maji ni yeɔ ohia lɛ fɛɛ amli lɛ, weku mli naagbai, awuiyeli, jalɛ sane ni bɛ, mɛi ateŋ béi, shika gbɛfaŋ yiŋkɔshikɔshifeemɔ, weku kɛ adesai aweku wiemɔ mli hetsɛ̃, nɔnyɛɛ, hela, kɛ nibii babaoo haaa gbɔmɛi aná amɛ jwɛŋmɔŋ toiŋjɔlɛ.

He ni Abaaná Mligbɛ Toiŋjɔlɛ Yɛ

Beni Antônio, Marcos, Gerson, Vania kɛ Marcelo kase Nyɔŋmɔ Wiemɔ, ni ji Biblia lɛ, amɛkase nibii ni tsake amɛshihilɛi. Nɔ kome ji akɛ, amɛkase akɛ je lɛŋ shihilɛ lɛ baafee nɔ ni yɔɔ srɔto gbi ko. Enɛ jeee hiɛnɔkamɔ ko kɛkɛ ni shishinumɔ bɛ faŋŋ ákɛ nɔ fɛɛ nɔ baahi yɛ naagbee mli. Eji hekɛnɔfɔɔ ni ma shi shiŋŋ diɛŋtsɛ ákɛ Nyɔŋmɔ yɛ yiŋtoo kɛha adesai ni ákɛ amrɔ nɛɛ po wɔbaanyɛ wɔná nakai yiŋtoo lɛ he sɛɛ kɛji wɔfee esuɔmɔnaa nii. Amɛkɛ nɔ ni amɛkase kɛjɛ Biblia lɛ mli lɛ tsu nii yɛ amɛshihilɛ mli, ni nibii tee hiɛ kɛha amɛ. Amɛná miishɛɛ kɛ toiŋjɔlɛ babaoo fe bɔ ni amɛsusuɔ akɛ ebaaji.

Antônio jeee mɔ ni kɛ ehe woɔ wiemɔ kɛ shimɔ kɛ nitsumɔ mli béi amli dɔŋŋ. Ele akɛ tsakemɔi ni jɛɔ no mli kɛbaa lɛ faaa ni eji be kukuoo nɔ. Nɛkɛ tsutsu nitsumɔ hiɛnyiɛlɔ nɛɛ ekase Nyɔŋmɔ Maŋtsɛyeli lɛ he nii. No ji maŋtsɛyeli ni mɛi akpekpei abɔ sɔleɔ yɛ he kɛji amɛmiikɛɛ Nuntsɔ lɛ Sɔlemɔ lɛ (aloo, Wɔtsɛ ni Yɔɔ Ŋwɛi lɛ) ni amɛkɛɔ Nyɔŋmɔ akɛ: “Omaŋtsɛyeli lɛ aba.” (Mateo 6:10a, New International Version) Antônio kase akɛ Nyɔŋmɔ Maŋtsɛyeli lɛ ji ŋwɛi nɔyeli diɛŋtsɛ ní kɛ anɔkwa toiŋjɔlɛ baaba abaha adesai.

Marcos kase bɔ ni atsuɔ Biblia mli ŋaawoo ni nilee yɔɔ mli ni kɔɔ gbalashihilɛ sane he lɛ he nii. Nɔ ni jɛ mli ba ji akɛ, amrɔ nɛɛ nɛkɛ tsutsu maŋkwralɔ nɛɛ kɛ eŋa efee ekome ekoŋŋ yɛ miishɛɛ mli. Lɛ hu eekpa be ni etsɛŋ ni baaba lɛ, be mli ni Nyɔŋmɔ Maŋtsɛyeli lɛ baaba abaye nɛkɛ hiɛjoomɔ, pɛsɛmkunya jeŋ gbɛjianɔtoo nɛɛ najiaŋ kɛ nɔ ni hi fe klɛŋklɛŋ nɔ lɛ gbɛ. Ehiɛ shishinumɔ ni mli kwɔ waa yɛ wiemɔi ni yɔɔ Nuntsɔ lɛ Sɔlemɔ lɛ mli ni kaneɔ akɛ: “Afee osuɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ.” (Mateo 6:10b, NIV) Beni afeɔ Nyɔŋmɔ suɔmɔnaa nii yɛ shikpɔŋ lɛ nɔ lɛ, adesai baaná shihilɛ ni hi ni anako eko pɛŋ mli niiashikpamɔ.

Ni Gerson hu? Amrɔ nɛɛ ejeee mɔ ni kpaa shi kɛkɛ kɛ julɔ dɔŋŋ. Amrɔ nɛɛ shishinumɔ eba tsutsu gbekɛ ni da yɛ gbɛjegbɛ nɔ lɛ shihilɛ mli ejaakɛ ekɛ ehewalɛ yeɔ buaa mɛi krokomɛi koni amɛná mligbɛ toiŋjɔlɛ. Taakɛ niiashikpamɔi nɛɛ tsɔɔ lɛ, Biblia lɛ ni aaakase ni akɛ nɔ ni ekɛɔ lɛ aaatsu  nii lɛ baanyɛ ekɛ tsakemɔ kpele aba mɔ ko shihilɛ mli ni eha ehi fe tsutsu lɛ.

Mligbɛ Toiŋjɔlɛ yɛ Haomɔ Jeŋ Mli

Yinɔsane mli gbɔmɔ ni ji oti fe fɛɛ yɛ Nyɔŋmɔ suɔmɔnaa nifeemɔ he nitsumɔ mli ji Yesu Kristo, ni kɛji gbɔmɛi kɛ Yehowa Odasefoi kase Biblia lɛ, amɛkaseɔ ehe nii babaoo. Gbi gbɛkɛ ni afɔ lɛ lɛ, ŋwɛibɔfoi lá kɛjie Nyɔŋmɔ yi akɛ: “Anunyam aha Nyɔŋmɔ yɛ ŋwɛi flooflo, ní hejɔlɛ aba shikpɔŋ lɛ nɔ, ní aná gbɔmɛi ahe tsuijurɔ!” (Luka 2:14) Beni Yesu da lɛ, esusuɔ nɔ ni kɔɔ gbɔmɛi lɛ ashihilɛ ni eeeha eya hiɛ lɛ he. Enu bɔ ni amɛnuɔ nii ahe amɛhaa lɛ shishi ni ejie mlihilɛ ni ekaaa kpo kɛha mɛi ni afeɔ amɛ niseniianii lɛ kɛ mɛi ni he yeɔ lɛ. Ni yɛ bɔfoi lɛ awiemɔi lɛ kɛ gbeekpamɔ naa lɛ, ekɛ mligbɛ toiŋjɔlɛ falɛ ko baha heshibalɔi lɛ. Yɛ esɔɔmɔ nitsumɔ lɛ naagbee lɛ, ekɛɛ ekaselɔi lɛ akɛ: “Hejɔlɛ mishiɔ maha nyɛ, hejɔlɛ ni ji minɔ lɛ miŋɔhaa nyɛ, jeee bɔ ni je lɛ haa lɛ, mihaa nyɛ nɛɛ. Nyɛtsui akayea, ni asaŋ ekafãa.”—Yohane 14:27.

Yesu fe mɔ ni kɛ adesa yelikɛbuamɔ nibii haa kɛkɛ. Ekɛ ehe to tookwɛlɔ he, ni ekɛ esɛɛnyiɛlɔi heshibalɔi lɛ to tooi ahe beni ekɛɛ akɛ: “Mi lɛ miba beni afee ni amɛná wala ni amɛná ni eteke nɔ. Miji tookwɛlɔ kpakpa lɛ. Tookwɛlɔ kpakpa lɛ ŋɔɔ esusuma eŋmɛɔ shi yɛ etoi lɛ anajiaŋ.” (Yohane 10:10, 11) Hɛɛ, kɛ́ akɛto ŋmɛnɛŋmɛnɛ hiɛnyiɛlɔi babaoo ni susuɔ amɛ diɛŋtsɛ amɛhe klɛŋklɛŋ lɛ ahe lɛ, Yesu kɛ ewala ha yɛ etooi lɛ ahewɔ.

Mɛɛ gbɛ nɔ nɔ ni Yesu fee lɛ he baanyɛ aba sɛɛnamɔ aha wɔ yɛ? Mɛi babaoo le wiemɔi nɛɛ akɛ: “Nyɔŋmɔ sumɔ je lɛ aahu akɛ eŋɔ e-Bi koome lɛ eha, bɔni afee ni akakpata mɔ fɛɛ mɔ ni náa emli hemɔkɛyeli lɛ hiɛ, shi moŋ ena naanɔ wala.” (Yohane 3:16, NW) Klɛŋklɛŋ kwraa lɛ, ni aaaná hemɔkɛyeli yɛ Yesu mli lɛ biɔ ni aná nilee ni kɔɔ lɛ kɛ e-Tsɛ, Yehowa he. Nyɔŋmɔ kɛ Yesu Kristo he nilee baanyɛ ekɛ wɔ aya wɔkɛ Yehowa Nyɔŋmɔ teŋ wekukpaa ni bɛŋkɛ kpaakpa ni baaye abua wɔ ni wɔnine ashɛ jwɛŋmɔŋ toiŋjɔlɛ mli lɛ nɔ.

Yesu kɛɛ akɛ: “Mitooi lɛ nuɔ migbee, ni mile amɛ, ni amɛnyiɛɔ misɛɛ, ni mi nɔŋŋ mihaa amɛ naanɔ wala, ni amɛhiɛ kpataŋ kɛaatee naanɔ, ni asaŋ mɔ ko shɔ̃ŋ amɛ yɛ midɛŋ.” (Yohane 10:27, 28) Mɛɛ miishɛjemɔ wiemɔi ni haa mɔ miishɛɛ nɛ! Lɛɛlɛŋ, Yesu wie nakai wiemɔi lɛ nɔ ni miihe ashɛ afii akpei enyɔ ni eho nɛ, shi hewalɛ babaoo yɛ mli amrɔ nɛɛ taakɛ eyɔɔ yɛ nakai beaŋ lɛ. Ohiɛ akakpa nɔ akɛ Yesu Kristo yɛ wala mli lolo ni eyɛ ekãa, ni eeye nɔ akɛ Nyɔŋmɔ ŋwɛi Maŋtsɛyeli lɛ nɔ Maŋtsɛ ni akɛ lɛ eta sɛi nɔ. Taakɛ eji beni eyɔɔ shikpɔŋ nɔ afii babaoo ni eho lɛ, ekã he esusuɔ heshibalɔi ni sumɔɔ ni amɛná jwɛŋmɔŋ toiŋjɔlɛ lɛ ahe. Kɛfata he lɛ, ekã he eji etooi lɛ Anɔkwɛlɔ. Kɛji wɔnyiɛ esɛɛ lɛ, ebaaye ebua wɔ koni wɔná mligbɛ toiŋjɔlɛ, ní nɔ ni fata he ji hekɛnɔfɔɔ gbɛkpamɔ akɛ aaana toiŋjɔlɛ kwraa wɔsɛɛ—ni baatsɔɔ akɛ basabasafeemɔ, tawuu, kɛ awuiyeli ehiŋ shi dɔŋŋ.

Miishɛɛ diɛŋtsɛ baa kɛjɛɔ le ni wɔɔle ní wɔhe wɔye akɛ Yehowa baaye abua wɔ kɛtsɔ Yesu nɔ. Kaimɔ Vania mɔ ni beni eji gbekɛ yoo fioo lɛ gbɛnaa nii ni tsii ahe nitsumɔ baka enɔ ni esusu akɛ Nyɔŋmɔ hiɛ ekpa enɔ lɛ? Amrɔ nɛɛ Vania le akɛ Nyɔŋmɔ kwako lɛ. Ekɛɛ akɛ: “Mikase akɛ Nyɔŋmɔ ji mɔ ko ni yɔɔ diɛŋtsɛ ni yɔɔ sui ni asumɔɔ waa. Suɔmɔ ni eyɔɔ lɛ tsirɛ lɛ koni etsu e-Bi lɛ kɛba shikpɔŋ lɛ nɔ koni ebaha wɔ wala. Ehe miihia waa akɛ aaale enɛ.”

Marcelo ye he odase akɛ, ekɛ Nyɔŋmɔ teŋ wekukpaa lɛ ji nɔ ni yɔɔ diɛŋtsɛ. Nɛkɛ tsutsu okpɔlɔŋmɛɛ shishi yalɔ nɛɛ wie akɛ: “Bei pii lɛ oblahii kɛ oblayei leee nɔ ni sa akɛ amɛfee, ni yɛ naagbee lɛ amɛyeɔ amɛ diɛŋtsɛ amɛhe awui. Mɛi komɛi kɛ amɛhe woɔ tsofai fɔji kɛ nitsumɔ mli taakɛ  mifee lɛ. Kɛtsɔ anɔkwale ni kɔɔ Nyɔŋmɔ kɛ e-Bi lɛ he kasemɔ nɔ lɛ, miheɔ miyeɔ akɛ abaajɔɔ mɛi babaoo taakɛ ajɔɔ mi lɛ.”

Kɛtsɔ Biblia lɛ kasemɔ jogbaŋŋ nɔ lɛ, Vania kɛ Marcelo ná hemɔkɛyeli ni mli wa yɛ Nyɔŋmɔ mli kɛ hekɛnɔfɔɔ yɛ bɔ ni esumɔɔ ni eye ebua amɛ kɛtsu amɛnaagbai lɛ ahe nii lɛ mli. Kɛji wɔfee nɔ ni amɛfee lɛ—ní wɔkase Biblia lɛ ni wɔkɛ nɔ ni ekɛɔ lɛ tsu nii lɛ—wɔbaaná mligbɛ toiŋjɔlɛ ko ni fa babaoo, taakɛ bɔ pɛ ni amɛná lɛ. Kɛkɛ lɛ bɔfo Paulo ŋaawoo lɛ baaba mli diɛŋtsɛ yɛ wɔgbɛfaŋ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!”—Filipibii 4:6, 7.

Ní Aaaná Toiŋjɔlɛ Diɛŋtsɛ Ŋmɛnɛ

Yesu Kristo miikudɔ gbɔmɛi ni anɔkwale lɛ he hɔmɔ yeɔ amɛ lɛ kɛmiinyiɛ gbɛ ni kɛ mɔ yaa naanɔ wala mli yɛ shikpɔŋ nɔ paradeiso mli lɛ nɔ. Be mli ni ekudɔɔ amɛ kɛyaa jamɔ krɔŋŋ ni akɛhaa Nyɔŋmɔ lɛ mli lɛ, amɛnáa toiŋjɔlɛ ni tamɔ nɔ ni awie he yɛ Biblia lɛ mli lɛ mli niiashikpamɔ akɛ: “Mimaŋ lɛ aaahi shi yɛ hejɔlɛ shia, kɛ shihilɛhe ní yɔɔ shweshweeshwe, kɛ hejɔɔmɔhe ní yɔɔ kpoo.” (Yesaia 32:18) Ni no ji toiŋjɔlɛ ni amɛbaaná mli miishɛɛ wɔsɛɛ lɛ he okadi bibioo ko kɛkɛ. Wɔkaneɔ akɛ: “Mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli. Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.”—Lala 37:11, 29.

No hewɔ lɛ ani wɔbaanyɛ wɔná mligbɛ toiŋjɔlɛ ŋmɛnɛ? Hɛɛ. Kɛfata he lɛ, wɔbaanyɛ wɔná nɔmimaa akɛ yɛ wɔsɛɛ be ni ebɛŋkɛ kpaakpa lɛ mli lɛ, Nyɔŋmɔ baajɔɔ adesai toibolɔi kɛ toiŋjɔlɛ ni anáko eko nakai dã. Mɛni hewɔ mɔ ni obiii lɛ yɛ sɔlemɔ mli koni eha bo etoiŋjɔlɛ lɛ? Kɛji oyɛ naagbai ni haaa oná toiŋjɔlɛ lɛ, sɔlemɔ yɛ gbɛ ni Maŋtsɛ David sɔle lɛ nɔ akɛ: “Mitsui mli haomɔi lɛ fa; jiemɔ mi kɛjɛ mifimɔi lɛ amli! Kwɛmɔ mimanehulu kɛ mipiŋmɔ lɛ, ni okɛ mihe eshai fɛɛ afa mi!” (Lala 25:17, 18) Ná nɔmimaa akɛ Nyɔŋmɔ boɔ sɔlemɔi ni tamɔ nakai atoi. Ekpaa enine mli ni ekɛ toiŋjɔlɛ haa mɛi fɛɛ ni taoɔ yɛ tsui krɔŋŋ mli. Akɛ suɔmɔ maa nɔ mi ahaa wɔ akɛ: “Yehowa ebɛŋkɛɔ mɛi fɛɛ ni tsɛɔ lɛ lɛ, mɛi fɛɛ ni tsɛɔ lɛ yɛ anɔkwale mli lɛ. Mɛi ni sheɔ lɛ gbeyei lɛ, efeɔ nɔ ni amɛtaoɔ ehaa amɛ, eboɔ amɛbolɔmɔ toi, ni ehereɔ amɛyiwala.”—Lala 145:18, 19.

[Wiemɔ ni akɔ ni akɛmiitsu nii ni yɔɔ baafa 5]

Gbɔmɔ bɛ nilee loo nii ni anaa kɛyaa shɔŋŋ koni ekɛye ehe nɔ ní enáaa yelikɛbuamɔ, . . . ni yelikɛbuamɔ pɛ ni jara wa lɛ jɛɔ Nyɔŋmɔ ŋɔɔ

[Wiemɔ ni akɔ ni akɛmiitsu nii ni yɔɔ baafa 6]

Nyɔŋmɔ kɛ Yesu Kristo he nilee baanyɛ ekɛ wɔ aya wɔkɛ Yehowa Nyɔŋmɔ teŋ wekukpaa ni bɛŋkɛ kpaakpa ni baaye abua wɔ ni wɔnine ashɛ jwɛŋmɔŋ toiŋjɔlɛ nɔ lɛ mli

[Mfoniri ni yɔɔ baafa 7]

Biblia Mli ŋaawoo ni aaanyiɛ sɛɛ lɛ yeɔ buaa koni aná weku shihilɛ mli toiŋjɔlɛ