Fie Wẹ Hiẹ Sọgan Mọ Jijọho Ahun mẹ Tọn Te?

Vogbingbọn susu wẹ tin to ojlẹ mítọn po enẹ heyin Thoreau, heyin nùdego to hosọ he jẹnukọn mẹ tọn po ṣẹnṣẹn. Vogbingbọn titengbe dopo wẹ yindọ to egbehe ayinamẹ do lehe yè sọgan mọ jijọho ahun mẹ tọn do ji ma whèdomẹ gba. Walọyizan gbẹtọ tọn plọntọ lẹ po mẹhe nọ kàn owe alọgọna-mẹdetiti tọn lẹ po—yèdọ etlẹ yin linlinwe-kàntọ lẹ—nọ ze linlẹn yetọn lẹ donukọnnamẹ. Ayinamẹ yetọn sọgan yin alọgọnamẹnu ojlẹ-gli tọn; ṣigba na pọngbọ dẹn-to-aimẹ lẹ, nude he dolido taun yin nuhudo etọn tindo. Enẹ wẹ yin nuhe mẹdopodopo heyin nùdego to hosọ he jẹnukọn mẹ lẹ mọ.

ANTÔNIO, Marcos, Gerson, Vania, po Marcelo po wá sọn dodonu he gbọnvo lẹ mẹ bosọ tindo nuhahun voovo lẹ. Ṣigba e whè gbau yé tindo onú atọ̀n to pọmẹ. Tintan, ojlẹ de tin to whenuena yé “mado todido [depope], podọ mado Jiwheyẹwhe to aihọn mẹ.” (Efesunu lẹ 2:12) Awetọ, yé tindo ojlo vẹkuvẹku na jijọho ahun mẹ tọn. Podọ atọ̀ntọ, yemẹpo mọ jijọho ahun mẹ tọn he yé jlo lọ to whenuena yé kẹalọyi plọnmẹ Biblu de hẹ Kunnudetọ Jehovah tọn lẹ godo. Dile yé to nukọnzindo, yé wá yọ́n ẹn dọ Jiwheyẹwhe tindo ojlo to yé mẹ. Na nugbo tọn, dile Paulu dọna Atẹninu azán etọn gbè tọn lẹ do, Jiwheyẹwhe “ma tlẹ dẹn sọn dopodopo mítọn dè gba.” (Owalọ lẹ 17:27) Yinyin nujikudonọ gando ehe go yin  whẹwhinwhẹ́n titengbe de to jijọho ahun mẹ tọn mimọ mẹ.

Naegbọn Jijọho Do Whè Sọmọ?

Biblu na whẹwhinwhẹ́n dodonu tọn awe na nuhewutu jijọho ma do tin to aihọn mẹ—vlavo jijọho ahun mẹ tọn kavi jijọho to gbẹtọ lẹ ṣẹnṣẹn. Tintan yin zẹẹmẹ basina to Jẹlemia 10:23 mẹ dọmọ: “Aliho gbẹtọ tọn matin to ewlọsu mẹ gba: e matin to omẹ he to zọnlinzin mẹ nado do afọdide etọn lẹ gba.” Gbẹtọ ma tindo nuyọnẹn lọ kavi huhlọn numọ-hlan-nukọn tọn lọ nado dugán do ede ji matin alọgọ gba, podọ alọgọ dopo kẹdẹ lọ he tindo nuhọakuẹ nujọnu tọn nọ wá sọn Jiwheyẹwhe dè. Gbẹtọvi he ma dín anademẹ Jiwheyẹwhe tọn lẹ ma na mọ jijọho dẹn-to-aimẹ yí pọ́n gbede. Whẹwhinwhẹ́n awetọ na matin jijọho tọn yin mimọ to hogbe apọsteli Johanu tọn lẹ mẹ dọmọ: “Aihọn lẹpo sọ mlọnai to omẹ ylankan lọ mẹ.” (1 Johanu 5:19) Matin anademẹ sọn olọn mẹ wá, vivẹnudido gbẹtọ tọn lẹ nado mọ jijọho yí na nọ saba jẹflumẹ janwẹ gbọn nuwiwa mẹhe ma nọ yin mimọ ṣigba yin omẹ nujọnu tọn—bosọ yin huhlọnnọ taun—“omẹ ylankan lọ,” yèdọ Satani tọn lẹ dali.

Na whẹwhinwhẹ́n awe ehelẹ—dọ suhugan gbẹtọ lẹ tọn ma nọ dín anademẹ Jiwheyẹwhe tọn podọ dọ Satani yin zohunhunnọ taun to aihọn lọ mẹ tọn wutu—akọ̀ gbẹtọvi tọn blebu tin to ninọmẹ awubla tọn mẹ. Apọsteli Paulu basi zẹẹmẹ etọn ganji dọmọ: “Nudida lẹpo pete wẹ to winwẹn bosọ to ajipanu to awufiẹsa mẹ hẹ mí kakajẹ dinvie.” (Lomunu lẹ 8:22) Mẹnu wẹ sọgan jẹagọdo zẹẹmẹ bibasi enẹ? To akọta adọkunnọ lẹ mẹ, gọna wamọnọ lẹ lọsu mẹ, nuhahun whẹndo tọn lẹ, sẹ́nhẹngba, whẹdida mawadodo tọn, nuhahun gbẹtọ-yinyin tọn lẹ, nuhahun akuẹzinzan tọn, wangbẹnamẹ akọ̀ po hẹnnu tọn lẹ po, kọgbidinamẹ, awutu, po onú susu dogọ lẹ po, nọ hò jijọho ahun mẹ tọn yí sọn gbẹtọ lẹ si.

Fie Jijọho Ahun mẹ Tọn Sọgan Yin Mimọ Te

To whenuena Antônio, Marcos, Gerson, Vania, po Marcelo po plọn Ohó Jiwheyẹwhe tọn, yèdọ Biblu, yé plọn nuhe diọ gbẹzan yetọn lẹ. Onú dopo wẹ yindọ, yé plọn dọ ninọmẹ aihọn tọn na diọ to gbèdopo. Ehe mayin todido he ma họnwun de poun dọ onú lẹpo na diọ do dagbe to godo mẹ gba. Jidide nujọnu tọn, he dolido de wẹ e yin dọ Jiwheyẹwhe tindo lẹndai de na gbẹtọvi lẹ podọ dọ etlẹ yin todin mí sọgan mọaleyi sọn lẹndai enẹ mẹ eyin mí wà ojlo etọn. Yé yí nuhe yé plọn sọn Biblu mẹ lẹ do yizan mẹ to gbẹzan yetọn mẹ, bọ onú lẹ sọ pọnte na yé. Yé mọ ayajẹ po jijọho dogọ po hugan lehe yé ko lẹndọ e sọgan yọnbasi do.

Antônio masọ nọ tindo mahẹ to azọ́n gbigbẹdai po avùnhiho azọ́nwatọ lẹ tọn po mẹ ba gba. E yọnẹn dọ diọdo heyin hinhẹnwa to aliho enẹ mẹ lẹ tindo dogbó bosọ yin ojlẹ gli tọn poun. Nukọntọ azọ́nwatọgbẹ́ dai tọn ehe ko plọnnu gando Ahọluduta Jiwheyẹwhe tọn go. Ahọluduta he gbẹtọ livi lẹ nọ hodẹ̀ na to whenuena yé vọ́ Odẹ̀ Oklunọ tọn (kavi, Otọ́ Mítọn) dọ bo dọ hlan Jiwheyẹwhe dọmọ: “Ahọluduta towe ni wá” lọ wẹ e yin. (Matiu 6:10a, New International Version) Antônio plọn dọ Ahọluduta Jiwheyẹwhe tọn yin gandudu nujọnu olọn mẹ tọn de he na hẹn jijọho nujọnu tọn wá na gbẹtọvi lẹ.

Marcos plọn nado yí ayinamẹ nuyọnẹn tọn Biblu tọn do whẹho alọwle tọn ji do yizan mẹ. Taidi kọdetọn de, tonudọtọ dai tọn ehe todin ko vọ́ yin kinkọndopọ to ayajẹ mẹ hẹ asi etọn. Ewọ lọsu to nukọn-pọnhlan na ojlẹ lọ, he na wá to madẹnmẹ, to whenuena Ahọluduta Jiwheyẹwhe tọn na diọtẹnmẹ na titonu aihọn tọn nukunkẹnnọ, ṣejannabinọ ehe po dehe pọnte hugan de po. E tindo nukunnumọjẹnumẹ sisosiso hogbe lọ he tin to Odẹ̀ Oklunọ tọn mẹ tọn he hia dọmọ: “Ojlo towe ni yin wiwà to aigba ji dile e yin do to olọn mẹ.” (Matiu 6:10b, NIV) To whenuena ojlo Jiwheyẹwhe tọn yin wiwà to aigba ji, gbẹtọvi lẹ na tindo numimọ jẹhẹnu gbẹzan tọn de he ma ko yin mimọ pọ́n gbede tọn.

Etẹwẹ dogbọn Gerson dali? Ewọ ma gbẹsọ yin fuflúpetọ po ajotọ de po ba gba. Gbẹzan ovi  tòhomẹ-liho ji dai tọn ehe todin tindo zẹẹmẹ na e nọ yí huhlọn etọn zan to alọgigọna mẹdevo lẹ nado mọ jijọho ahun mẹ tọn yí wutu. Dile numimọ ehelẹ dohia do, Biblu pinplọn po yíyí nuhe e dọ lẹ po do yizan mẹ sọgan diọ gbẹzan mẹde tọn na dagbe taun.

Jijọho Ahun mẹ Tọn to Aihọn Tukla Tọn de Mẹ

Omẹ titengbe whenuho tọn lọ to ojlo Jiwheyẹwhe tọn hinhẹndi mẹ wẹ Jesu Klisti, podọ to whenuena gbẹtọ lẹ plọn Biblu hẹ Kunnudetọ Jehovah tọn lẹ, yé nọ plọnnu susu dogbọn ewọ dali. To ozán he mẹ e yin jiji te, angẹli lẹ jihàn pipà Jiwheyẹwhe tọn lẹ dọmọ: “Gigo hlan Jiwheyẹwhe to olọn aga, podọ jijọho to gbẹtọ [ojlo dagbenọ lẹ mẹ to aigba ji, NW].” (Luku 2:14) To whenuena Jesu whẹ́n, e yin ahunmẹduna gando hinhẹn gbẹzan gbẹtọ lẹ tọn pọnte go. E mọnukunnujẹ numọtolanmẹ yetọn lẹ mẹ bosọ do awuvẹmẹ sẹhundaga hia na mẹhe tin to awufiẹsa mẹ po awutunọ lẹ po. Podọ, to kọndopọmẹ hẹ hogbe angẹli lọ lẹ tọn lẹ, e hẹn jijọho ahun mẹ tọn wá na homẹmimiọnnọ lẹ jẹ obá de mẹ. To vivọnu lizọnyizọn etọn tọn, e dọna devi etọn lẹ dọmọ: “Jijọho wẹ yẹn jo do mì dè, jijọho ṣie wẹ yẹn na hlan mì: e mayin le aihọn ko namẹ do wẹ yẹn na hlan mì do gba. Mì dike ayiha mìtọn yin tuklanọ blo, mì sọ dike e yin obunọ blo.”—Johanu 14:27.

Jesu yinuwa hugan nukunpipedo dagbemẹ-ninọ gbẹtọvi lẹ tọn go. E yí ede jlẹdo lẹngbọhọtọ de go, podọ e sọ yí hodotọ homẹmimiọnnọ etọn lẹ jlẹdo lẹngbọ lẹ go to whenuena e dọmọ: “Yẹn wá na yé nido tindo ogbẹ̀, yèdọ na yé nido tindo sugege. Yẹn wẹ lẹngbọhọtọ dagbe lọ: lẹngbọhọtọ dagbe ze ogbẹ̀ etọn dai na lẹngbọ lẹ.” (Johanu 10:10, 11) Mọwẹ, to vogbingbọn mẹ na suhugan nukọntọ egbehe tọn he nọ hò yedelẹ tọn pọ́n jẹnukọn whẹ́ lẹ, Jesu na ogbẹ̀ etọn lẹngbọ etọn lẹ.

Nawẹ míwlẹ sọgan mọaleyi sọn nuhe Jesu wà mẹ gbọn? Mẹsusu wẹ jẹakọhẹ hogbe ehelẹ dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Jẹnukọn whẹ́, yise yiyizan to Jesu mẹ biọ oyọnẹn dogbọn ewọ po Otọ́ etọn, Jehovah po dali. Oyọnẹn Jiwheyẹwhe po Jesu Klisti tọn po sọgan planmẹ jẹ haṣinṣan pẹkipẹki de tintindo hẹ Jehovah Jiwheyẹwhe kọ̀n he na gọalọna mí nado mọ jijọho ahun mẹ tọn yí.

Jesu dọmọ: “Lẹngbọ ṣie lẹ sè ogbè ṣie, yẹn sọ yọ́n yé, yé sọ nọ hodo mi: yẹn sọ na ogbẹ̀ madopodo hlan yé, yé ma na dọ̀n gbede, mẹde masọ to na dọ̀n yé sún sọn alọ ṣie mẹ.” (Johanu 10:27, 28) Hogbe zohunhunnọ, homẹmiọnnamẹ tọn nankọtọn lẹ die! Nugbo wẹ dọ, Jesu dọ yé to nudi owhe fọtọ́n donu awe die wayi, ṣigba yé gbẹsọ tindo huhlọn dopolọ dile yé tindo do to whenẹnu. Ma wọnji gbede blo dọ Jesu Klisti tin to ogbẹ̀ bosọ yin zohunhunnọ, bo to gandu todin taidi Ahọlu zedo ofìn ji Ahọluduta olọn mẹ Jiwheyẹwhe tọn. Taidi whenuena e zinzọnlin to aigba ji to owhe susu nẹlẹ die wayi, e gbẹsọ nọ yin ahunmẹduna gando walọmimiọnnọ he tindo ojlo na jijọho ayiha mẹ tọn lẹ go. Humọ, e gbẹsọ yin Lẹngbọhọtọ lẹngbọ etọn lẹ tọn. Eyin mí hodo e, e na gọalọna mí nado mọ jijọho ahun mẹ tọn, he bẹ nukundido jidide tọn de heyin jijọho mlẹnmlẹn mimọ to sọgodo hẹn—he na zẹẹmẹdo matin danuwiwa, awhàn, po sẹ́nhẹngba po tọn.

Alemọyi nujọnu tọn lẹ nọ wá sọn yinyọnẹn po yiyise po mẹ dọ Jehovah, gbọn Jesu gblamẹ, na gọalọna mí. Flin Vania, mẹhe taidi yọnnu jọja de yin azọngban pinpẹn de jodona bosọ lẹndọ Jiwheyẹwhe ko wọnji emi go wẹ nkọtọn? Todin Vania yọnẹn dọ Jiwheyẹwhe ma ko gbẹ́ emi dai gba. E dọmọ: “Yẹn plọn dọ Jiwheyẹwhe yin omẹ nujọnu tọn de he tindo jẹhẹnu mẹdọndogo tọn lẹ. Owanyi etọn whàn ẹn nado do Visunnu etọn hlan aigba ji nado na ogbẹ̀ mí. Onú titengbe taun wẹ e yin nado yọ́n ehe.”

Marcelo dekunnu dọ haṣinṣan emitọn hẹ Jiwheyẹwhe yin nujọnu tọn. Agọ́-ji-yìtọ dai tọn lọ basi zẹẹmẹ dọmọ: “Jọja lẹ ma nọ saba yọ́n nuhe yé dona wà gba, podọ yé nọ dekọtọn do awugbigblena yedelẹ mẹ. Delẹ nọ tindo mahẹ to amasin adínọ ṣiṣizan mẹ, dile yẹn wà do. Yẹn tindo todido  dọ mẹsusu dogọ lẹ na yin didona, dile e yin na yẹn do, gbọn pinplọn nugbo lọ gando Jiwheyẹwhe po Visunnu etọn po go dali.”

Gbọn Biblu pinplọn sọwhiwhe tọn de gblamẹ, Vania po Marcelo po wleawuna yise sinsinyẹn to Jiwheyẹwhe mẹ podọ jidide de to ojlonọ-yinyin etọn nado gọalọna yé nado didẹ nuhahun yetọn lẹ mẹ. Eyin mí wà nuhe yewlẹ wà—yèdọ plọn Biblu bosọ yí nuhe e dọ lẹ do yizan mẹ—mí na mọ jijọho ahun mẹ tọn jẹ obá daho de mẹ, kẹdẹdile yewlẹ wà do. To whelọnu lo tulinamẹ apọsteli Paulu tọn na yọn-na-yizan taun to whẹho mítọn mẹ dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po [huhlọn apọ̀nmẹ tọn, NW] mìtọn lẹ po [to] Klisti Jesu mẹ.”—Filippinu lẹ 4:6, 7.

Jijọho Nujọnu Tọn Mimọ to Egbehe

Jesu Klisti to anadena mẹhe huvẹ nugbo lọ tọn to hùhù lẹ gbọn aliho he planmẹ yì ogbẹ̀ madopodo mẹ to paladisi aigba ji tọn de mẹ dali. Dile e to anadena yé hlan sinsẹ̀n-bibasi wiwe ṣeke Jiwheyẹwhe tọn kọ̀n, yé nọ tindo numimọ jijọho he taidi enẹ heyin zẹẹmẹ basina to Biblu mẹ tọn dọmọ: “Omẹ ṣie lẹ nasọ nọ nọ̀ owhé jijọho tọn gbè, podọ to aisintẹn gángán mẹ, podọ to gbọjẹtẹn he nabọẹ mẹ.” (Isaia 32:18) Podọ enẹ yin dọ́pọ́n jẹnukọn poun jijọho he yé na duvivi etọn to sọgodo tọn. Mí hia dọmọ: “Homẹmimiọnnọ lẹ na dugu aigba tọn; yé na hẹnhomẹhun yede to jijọho susu mẹ. Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:11, 29.

Enẹwutu be mí sọgan tindo jijọho ahun mẹ tọn to egbehe ya? Mọwẹ. Humọ, mí sọgan deji dọ to sọgodo he ko sẹpọ lọ mẹ, Jiwheyẹwhe na dona gbẹtọvi tonusetọ lẹ po jijọho po hugan gbede pọ́n tọn. To whelọnu lo, naegbọn hiẹ ma na biọ ewọ to odẹ̀ mẹ nado na jijọho etọn we? Eyin hiẹ tindo nuhahun lẹ he nọ hò jijọho yí sọn hiẹ si, hodẹ̀ to aliho he mẹ Ahọlu Davidi hodẹ̀ te dọmọ: “Oya ayiha ṣie tọn zun susu: hẹn mi tọ́n sọn nukunbibia ṣie mẹ. Pọ́n nukunbibia ṣie po tukla ṣie po; na a nisọ jo ylando ṣie lẹpo na mi.” (Psalm 25:17, 18) Deji dọ Jiwheyẹwhe nọ dotoai na odẹ̀ mọnkọtọn lẹ. E nọ dlẹnalọ etọn jẹgbonu bo nọ na jijọho hlan mẹhe to dindin in po ahundopo po lẹpo. Gbọn owanyi dali mí yin nina mẹhẹndeji lọ dọmọ: “OKLUNỌ ma dẹn do yé he to awhádo ylọ ẹ lẹ dè gba, e tin to yakẹ yé he to awhádo ylọ ẹ to nugbo mẹ lẹpo tọn. E nasọ hẹn ojlo yé he dibusi i lẹ tọn ṣẹ̀: e na sè awhá yetọn ga, bo nasọ whlẹn yé gán.”—Psalm 145:18, 19.

[Yẹdide to weda 5]

Gbẹtọ ma tindo nuyọnẹn kavi huhlọn numọ-hlan-nukọn tọn lọ nado dugán do ede ji matin alọgọ gba, podọ alọgọ dopo kẹdẹ lọ he tindo nuhọakuẹ nujọnu tọn nọ wá sọn Jiwheyẹwhe dè

[Yẹdide to weda 6]

Oyọnẹn Jiwheyẹwhe po Jesu Klisti tọn po sọgan planmẹ jẹ haṣinṣan pẹkipẹki de tintindo hẹ Jehovah Jiwheyẹwhe kọ̀n he na gọalọna mí nado jẹ jijọho ayiha mẹ tọn kọ̀n

[Yẹdide to weda 7]

Hihodo ayinamẹ Biblu tọn nọ yidogọna gbẹzan whẹndo tọn jijọhonọ de