Qamuuna eqqissineq sumi nanineqarsinnaava?

Nalerput Henry Thoreaup, atuakkiortup allaaserisami siulianiittumi taaneqartup, inuunerata nalaanit amerlasuutigut assigiinngissuteqarpoq. Qanoq ililluni qamuuna eqqissisoqarsinnaanersoq ullumikkut siunnersuuterpassuaqarnera assigiinngissutit pingaartut ilagaat. Psykologit, imminut ikiorniartunut naatsorsuussanik atuakkiortartut aviisinilu apeqquteqarfinnik aaqqissuussisartut siunnersuuteqartarput. Siunnersuutaat immaqa sivikitsumik iluaqutaasarput, ungasinnerusorli eqqarsaatigalugu aaqqiissagaanni itinerusunik allannguisoqartariaqarpoq. Allaaserisami siulianiittumi taaneqartut tamanna paasisimavaat.

ANTÔNIO, Marcos, Gerson, Vania aamma Marcelo assigiinngitsunik tunuliaqutaqarput assigiinngitsunillu ajornartorsiuteqarlutik. Minnerpaamilli pingasut assigiissutigaat. Siullermik ’neriugisaqaratik Guuteqarnatillu silami inuusimapput’. (Evfisumiut 2:12) Aappassaanik isumamikkut eqqisserusupput. Pingajusaanillu qamuuna eqqissineq piumaqisartik Jehovap Nalunaajaasui Biibilimik atuaqqissaaqatigisaleramikkik nanivaat. Siumukartillutik Guutip soqutigigaatik paasivaat. Paulusip Athenerinut oqarneratut ippoq, Guuti ’tamanit ungasinngilaq’. (apustilit suliait 17:27) Qamuuna eqqississagaanni tamatuma qularinnginnissaa pingaaruteqarpoq.

 Sooq taama eqqissineq annikitsigaa?

Sooq eqqissinissap inoqatinillu eqqisseqatigiinnissap taama ajornakusoortigineranut pissutiviit Biibilimi atuarsinnaavavut. Aappaa Jeremiap allagai-ni kapitali 10, versi 23-mi allassimavoq: ’Inuup ingerlavissani nammineq aalajangigassarinngilaa, angutillu aalajangigassarinngilaa qanoq ingerlanissani alloriartarnissanilu.’ Inuk nammineq susassaminik ikiorteqarnani aqutsisinnaanissaminut ilisimassuseqanngilaq pisussanilluunniit siumut isiginnereersinnaanani, ikiortissatuarlu naleqarluartoq Guutimeersuuvoq. Inuit Guutimit siulersortikkusunngitsut piviusumik eqqissisinnaanngillat. Eqqissineqannginneranut pissutaasup aappaa apustili Johannesimit taaneqarpoq: ’Silarsuaq iluunngarmi ajortormiuvoq.’ (1 Juánase 5:19) Guutimit siulersorneqanngikkunik inuit eqqissinermik noqqaassutaat ersinngitsumit, anersaamit piviulluinnartumit pissaaneqangaartumillu ’ajortumik’ taaneqartumit, tassa Satan Diaavulumit, maangaannartinneqassaaq.

Inuiaat ataatsimut isigalugit taama alianartigisunik atugaqarnerat ikinnerpaat Guutimit siulersortikkusunnerannik Satanillu silarsuarmi suliniuteqangaarneranik pissuteqarpoq. Apustili Paulusip pissutsit ima allaatigai: ’Pinngortitat tamarmik suli tamassa anersaameqatigiillutik erloqeqatigiipput.’ (Rûmamiut 8:22) Paulus akerlilerneqassanerluni? Nunani pisuuni piitsunilu ilaqutariinni ajornartorsiutit, aningaasatigut aarlerinerit, pinerluttuliornerit, naapertuilluanngitsuliornerit, inuttut aaqqiagiinnginnerit, inuiannik allanik akeqqersimaarnerit naggueqatiginngisanillu uumissuinerit, naqisimaneqarnerit, nappaatit allarpassuillu inuit qamuuna eqqissiunnaarutigisarpaat.

Qamuuna eqqissineq sumi nassaassaasoq

Antôniop, Marcosip, Gersonip, Vaniap aamma Marcelop Guutip oqaasia, Biibili, misissoramikku inuunerminnik allannguisumik ilikkagaqarput. Siullermik paasivaat silarsuarmi pissutsit allanngorumaartut. Tamanna ’Ajornavianngilaq’-mik eqqarsarluni neriuuteqalaarnerinnarmik tunngaveqanngilaq, Guutilli inuit siunertaqarfigigai maannakkullu piumasaatut iliorneq nuannaarutigineqalereersinnaasoq eqqarsaatigilluareerlugu qulanngivinnermik tunngaveqarluni. Biibilimi ilikkakkatik malillugit inuulerput ingerlalluarnerulerlutillu. Nuannaarneq eqqissinerlu ilimagisaminnik annerusoq nassaaraat.

Antônio akerliussutsimik takutitsinerni sulisartullu akersuunnerinut peqataasarunnaarpoq. Nalunngilaa tamakku aqqutigalugit allannguutit killeqartut ataavartuunngitsullu. Sulisartut peqatigiiffiata kattuffianni siulittaasuusimasup Guutip naalagaaffia ilikkarpaa. Naalagaaffiuvoq millionilikkuutaat qinnummi najoqqutassiami (imaluunniit Ataatarpuumi) Guutimut ima qinnutigisartagaat: ’Naalagaaffiit tikiulli.’ (Matîuse 6:10a) Guutip naalagaaffia qilammi naalakkersuisuiusut piviusumik eqqissisitsisussat Antôniop ilikkarpaa.

Marcosip aappariinneq pillugu Biibilimi unnersuussutit silatuut maleruarnissaat ilikkarpaa. Tamatuma kingunerisaanik politikkeriusimasoq maanna nulianilu pilluarlutik aappariileqqipput. Aamma taassuma Guutip naalagaaffiata silarsuarmi aaqqissuussineq maanna atuuttoq piumatooq namminissarsiortorlu silarsuarmik pitsaanerusumik taarsissagaa qilanaaraa. Ataatarpuumi oqaaseqatigiit uku itinerusumik paasivai: ’Peqqusat qilammisut nunamissaaq pili.’ (Matîuse 6:10b) Guutip piumasaa nunarsuarmi pippat inuit misiginngisaannarsimasamissut inuullualissapput.

Gerson qanoq ingerlava? Naparliinnarunnaarpoq tillinniartarunnaarlunilu. Aqqusiniinnarmi inuusimasup taassuma inuunera maanna siunertaqarlersimavoq allanik qamuuna eqqisserusuttunik ikiuinermut nukiminik atuisoq. Misilittakkat taakkua takutippaat Biibilimik  atuaqqissaarnerup unnersuussutaanillu maleruaanerup inuunermik pitsaanerulersitsingaarsinnaanera.

Silarsuarmi ajornartorsiorfiusumi qamuuna eqqissineq

Pingaarnerpaamik Jesus Kristus aqqutigalugu Guutip piumasaa piviusunngortinneqarsimavoq, inuit Jehovap Nalunaajaasui Biibilimik atuaqqissaaqatigigaangamikkik Guutip ernera pillugu ilikkagaqangaartarput. Unnuami inunngorfiani inngilit Guuti ima unnersiutigaat: ’Naalannarsili Guuti qutsinnermi; nunamilu eqqissilit; inunnilu nuannarisaqarli.’ (Lúkarse 2:14) Jesusip inersimasutut inuit inuunerat pitsanngortikkusussimavaa. Misigissusii paasisimavai napparsimasullu naalliuutillillu immikkut ittumik misiginneqatigisimallugit. Inngilit oqaasiinut naapertuuttumik qanilaartut qamuuna eqqissitippai. Kiffartornermi naalernerani ajoqersukkani ima oqarfigisimavai: ’Eqqississummik qimatsivigaassi; eqqississummik uanga pinik tunivassi; silamiut ileqquattut pinngilassi. Uummatisi annilaanngikkilit naasaangalernatillu.’ — Juánase 14:27.

Jesus inuttut ikinngutaaginnanngilaq. Imminut savanik paarsisumut assersuuppoq ajoqersukkanilu savanut assersuullugit ima oqarami: ’Uanga tikiuppunga inuusummik naammalluinnartumillu pissaqaqqullugit. Uanga-una savanik paasisoq ajunngitsoq; paarsisup ajunngitsup savat pillugit inuunini iperararaa.’ (Juánase 10:10, 11) Ullumikkut siulersuisorpassuit, nammineq iluaqutissaminnik pingaartitsinerusut, iliornerisa akerlianik Jesusip assersuutaasumik savaatini pillugit inuunini iperarpaa.

Jesusip iliuusia qanoq ililluta iluaqutigisinnaavarput? Amerlasuut oqaatsit uku nalunngilaat: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Jesusili upperissagutsigu taanna ataataalu, Jehova, pillugit ilisarsisariaqarpugut. Guutimik Jesusimillu ilisarsineq Jehova Guutimut qanimut attaveqalersitsisinnaavoq, tamatumuunalu isummatsigut eqqissisinnaalluta.

Jesus oqarsimavoq: ’Savaatima nipiga tusararaat, uangalu ilisaraakka, taakkualu malittarpaannga. Inuunermillu naassaanngitsumik tunisaraakka, tammarnavianngilluinnassappullu, taakkuninngalu arsaarneqassanngilanga.’ (Juánase 10:27, 28) Oqaatsit tuppallernartuupput qiimmaallannarlutillu. Jesusip oqarneraniit ukiut 2000-ingajaat qaangiutereeraluarput, ullumikkulli taamanikkutuulli atorsinnaatigipput. Jesus Kristus suli inuusoq Guutillu qilammi naalagaaffiani kunngitut naalakkersuilluni sulissutiginnittoq eqqaamajuk. Qanilaartut isummamikkut eqqisserusunnerat ukiut 2000-t matuma siorna nunamiinnermisulli ullumikkut soqutigitigai. Sulilu savaatiminut paarsisuuvoq. Malikkutsigu qamuuna eqqississaagut, ilaatigut siunissami eqqissisoqarluinnarnissaanik — nakuusertoqannginnissaanik, sorsuttoqannginnissaanik pinerluttoqannginnissaanillu — qularinagu neriunnermik pissuteqartumik.

Jehovap, Jesus aqqutigalu, ikiussagaatigut nalunngikkutsigu upperigutsigulu inuunerput pitsaanerungaalissaaq. Vania, niviarsiaq inuusuttoq akisussaafferujussualik Guutimillu puiugaasorisoq, eqqaamaviuk? Maanna Vaniap Guutimit puiorneqarsimanani nalunngilaa. Oqarpoq: „Guuti kinaassusiliviusoq nuannersunik pissusilik ilikkarsimavara. Asanninnerata inuussuteqartinniarluta ernini nunamut aallartitissimavaa. Tamatuma ilisimanissaa pingaaruteqartorujussuuvoq.“

Marcelop aamma Guutimut qanimut attaveqarnini oqaatigaa: „Inuusuttut susassaaleqigajupput, soorlu taamaassimasunga, naggataatigullu imminut ajoquserlutik. Ilaat uattulli ikioaroornartunik atornerluisunngotarput. Neriuutigaara suli amerlanerusut, uattulli, Guuti erneralu pillugit sallusuissumik ilisarsineq nuannaarutigingaassagaat.“

 Vaniap Marcelollu Biibilimik atuaqqissaarluarnermikkut Guutimut upperluarneq ineriartortissimavaat ajornartorsiutiminnillu aaqqiiniarnerminni ikiussagaatik tatigilersimallugu. Maligassiunerat — Biibilimik atuaqqissarnerat unnersuussutaanillu maleruaanerat — malikkutsigu aamma uagut qamuuna eqqissingaarneq misigissavarput. Taava apustili Paulusip kajumissaarutaa malissinnaassavarput: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ — Filípimiut 4:6, 7.

Ullumikkut qanoq ililluni piviusumik eqqissisoqarsinnaasoq

Jesus Kristusip inuit sallusuissumik ujarlersut aqqummut nunami paratiisiusumi inuunermut naassaanngitsumut siulersorpai. Guutimut minguitsumik pallorfiginninnermut siulersoramigit eqqissineq Biibilimi allaatigineqartoq misigaat: „Inuiaqatikka najugaqalissapput najukkami eqqissinartumi, inigisani isumannaatsuni ineqarfinnilu alianaatsuni isumakuluuteqarfiunngitsuni.“ (Jesaja 32:18) Siunissami eqqissinissamut aallarnisaataannavoq. Biibilimi allassimavoq: „Kisianni qanilaartut nuna kingornutissavaat, pilluangaarlutillu inuussapput. Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:11, 29.

Ullumikkut qamuuna eqqissisoqarsinnaava? Aap, Jehovap siunissami qanittumi imminut naalakkumasut pilluaqqujumaarai, eqqissinermik misigisimanngisaannagaannik, qularutiginngivissinnaavarput. Guutip eqqissineranik piumalluni qinuneq isumatusaarnerussanngila? Qamuuna eqqissiunnaarutigisannik ajornartorsiuteqaruit kunngi Daviditut qinusinnaavutit: „Siooqqatigisannit annaannga annikilliuutinnillu aniguisillunga. Annikilliornera naalliunneralu qiviakkit isumakkeerlugillu ajortuliakka tamaasa.“ (Tussiaat 25:17, 18) Qinnutit taamaattut Guutip tusartarai nalornisigisariaqanngilat. Uummammik unneqqarissumik ujarlersunut tamanut assani isaattarpai eqqissisillugillu. Asannittumik ima neriorsorneqarpugut: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut. Mianerinnitsiminut kissaataannik iliortarpoq, annikilliornerminni nillianerat tusartarpaa annaattarlugillu.“ — Tussiaat 145:18, 19. (wE 1/7 2000)

[Qupp. 5-mi issuagaq]

Inuk ikiorteqarani allanut naalakkersuinissaminut ilisimassuseqanngilaq pisussanilluunniit siumut isigereersinnaanani, iluaqutissatuarlu naleqarluartoq Guutimeersuuvoq

[Qupp. 6-mi issuagaq]

Guutimik Jesus Kristusimillu ilisarsineq Guutimut qanimut attaveqalersitsisinnaavoq, tamatumuunalu isumakkut eqqissisoqarsinnaalluni

[Qupp. 7-mi assiliartaq]

Biibilip unnersuussutaanik maleruaaneq ilaqutariittut inuunermi eqqissinermut ilasaataavoq