Mu Kona ku Fumana Kai Mombecima Tota?

Miteñi ya luna i na ni lika ze ñata ze shutana ni za mwa miteñi ya Thoreau, ya bulezwi mwa taba ye felile. Shutano i liñwi ye tuna kikuli kacenu likelezo ka za mwa ku fumanela mombecima tota ki ze ñata hahulu. Baituti ba munahano ni bañoli ba libuka ze tusa batu ku iponela, mane nihaiba bañoli ba litaba mwa mitende, ba fanga mihupulo ya bona. Likelezo za bona li kana za ba ze tusa nakonyana; kono kuli ku be ni tuso ye inelela, ku tokwahala nto ye fa zibo ye tibile hahulu ku fita yeo. Nto yeo ki yona ye ne ba shituzi batu ba ba bulezwi mwa taba ye felile.

BO ANTÔNIO, Marcos, Gerson, Vania, ni Marcelo ne ba simuluhezi mu sili kaufela bona mi butata bwa bona ne bu shutana. Kono ne ba na ni lika ze talu ze swana. Sapili, muta o muñwi ne ba “si na sepo, [ba] si na Mulimu mwa lifasi.” (Maefese 2:12) Sa bubeli, ne ba lakaza hahulu ku ba ni mombecima tota. Mi sa bulalu, kaufela bona ne ba fumani mombecima o ne ba bata ha ne ba lumezi ku ituta Bibele ni Lipaki za Jehova. Ha ne ba nze ba ituta, ba fita fa ku lemuha kuli Mulimu wa ba isa pilu. Kaniti, sina Paulusi mwa n’a bulelezi ba kwa Atene ba mwa miteñi ya hae, Mulimu h’a “ini kwahule ni mutu ni mutu wa luna.” (Likezo  17:27) Ku kolwa taba yeo ka pilu kaufela ku tusa hahulu mwa ku fumana mombecima tota.

Ki Kabakalañi Kozo Ha I Li Ye Nyinyani Cwana?

Bibele i fa mabaka a mabeli a matuna kozo ha i siyo mwa lifasi, ibe kuli ki buiketo bwa mutu kamba kozo mwahal’a batu. Libaka la pili li talusizwe kwa Jeremia 10:23, ye li: “Nzila ya mutu ha i yo mwa mata a hae; mi mutu nih’a zamaya, h’a koni ku izamaisa ili yena.” Batu ha ba na buikoneli bwa ku bonela-hule kamba butali bwa ku ipusa ba sa tusiwi, mi tuso ya Mulimu ki yona inosi ye li ya ngana luli. Batu ba ba sa bati ketelelo ya Mulimu ba ka y’o shwa cwalo ba sa fumani kozo ye inelela. Libaka la bubeli ha ku si na kozo li bonwa mwa manzwi a muapositola Joani, a’ li: “Lifasi kamukana li lapalezi mwatas’a ya maswe.” (1 Joani 5:19) Ha ku si na ketelelo ya Mulimu, buikatazo bwa batu bwa ku lika ku fumana kozo bu ka na bu paleliswa ki misebezi ya Satani, yena “ya maswe” y’a sa bonwi kono ili ya li teñi luli, mi u m’ata hahulu.

Batu kaufela ba maibisizwe ki ona mabaka a mabeli ao, a kuli buñata bwa batu ha ba bati ketelelo ya Mulimu ni kuli Satani u patehile luli mwa lifasi. Muapositola Paulusi n’a talusize hande taba yeo, kuli: “Ze bupilwe kaufela li tonga hamoho, mi hamoho li utwa butuku bwa ku pepa ku fitela cwale.” (Maroma 8:22) Ki mañi ya kona ku hana taba yeo? Mwa linaha ze onyokile hamoho ni ze shebile, butata mwa mabasi, bukebenga, ku sa atula ka mulao, ku shelana ni ba bañwi, silikwalikwani sa za mali, sitoyo sa mishobo ni macaba a sili, buswenyi, makulanu, ni ze ñwi ze ñata-ñata, li byangula batu mombecima wa bona.

Kwa ku Fumana Mombecima Tota

Bo Antônio, Marcos, Gerson, Vania, ni Marcelo ha ne ba itutile Linzwi la Mulimu, yona Bibele, ne ba itutile lika ze ne cincize bupilo bwa bona. Ka mutala, ne ba itutile kuli muta o muñwi lika li ka cinca mwa lifasi. Yeo haki sepo fela ye shainga ya kuli zote li ka ba hande kwa mafelelezo. Ki buikolwiso sakata, bo bu na ni matomelo, bwa kuli Mulimu ku na ni z’a lelezi batu ni kuli nihaiba cwale lwa kona ku tusiwa ki mulelo w’o ha lu eza tato ya hae. Ne ba sebelisize mwa bupilo bwa bona ze ne ba itutile mwa Bibele, mi lika za ba bela hande. Ne ba fumani tabo ni kozo ye tuna ku fita mo ne ba nahanela.

Antônio h’a sa li yo ku za likwata ze hanyeza lika patalaza ni mikwangalakanyi ye ama babeleki. U ziba kuli licinceho ze eziwa cwalo ki za makutelakaufi fela mi ki za swalelele. Ya n’a li mueteleli wa babeleki y’o u itutile ka za Mubuso wa Mulimu. W’o ki ona Mubuso o ba lapelelanga bolule-lule ha ba kutelanga Tapelo ya Mulena (kamba, ya Ndat’a Luna) ni ku bulelela Mulimu kuli: “Ku tahe mubuso wa hao.” (Mateu 6:10a) Antônio n’a itutile kuli Mubuso wa Mulimu ki mulonga wa luli wa kwa lihalimu o ka tiseza batu kozo sakata.

Marcos n’a itutile ku sebelisa likelezo ze nde za Bibele ze ama manyalo. Kacwalo, ya n’a kile a ikenya mwa bupolitiki y’o cwale u kutisani ni musal’a hae ka tabo. Ni yena u libelela hahulu nako ye ka tuha i taha, f’o Mubuso wa Mulimu u ka zusa muinelo wo wa lifasi wa mukwañuli, ili wa buitati, ni ku tisa muinelo o munde ni ku fita. U utwisisa hande hahulu mubamba o mwa Tapelo ya Mulena o li: “Se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10b) Tato ya Mulimu ha i ka ezwa fa lifasi, batu ba ka ba ni bupilo bo bunde bo bu si ka bonwa kale.

Gerson bo? H’a sa li muyambaeli ni lisholi. Bupilo bwa ya n’a li ndalabangwana y’o cwale se bu li bwa ngana kakuli u fufulelwa ku tusa  ba bañwi ku fumana mombecima tota. Ka mo li boniseza ze n’e ezahezi zeo, ku ituta Bibele ni ku sebelisa ze i bulela ku kona ku cinca hahulu bupilo bwa mutu ku bu bisa hande.

Mombecima Tota mwa Lifasi Le Li Ziyelehile

Jesu Kreste ki yena mutu wa butokwa ka ku fitisisa mwa ku petiwa kwa tato ya Mulimu, mi batu ha ba ituta Bibele ni Lipaki za Jehova, ba ituta ze ñata ka za hae. Busihu bwa n’a pepilwe, mangeloi n’a opezi milumbeko ya Mulimu kuli: “Kanya i be ku Mulimu, kwa mahalimu a kwahalimu; kozo i be teñi mwa lifasi; batu ba shemubwe.” (Luka 2:14) Jesu ha n’a hulile, n’a isize hahulu pilu kwa ku bolosola bupilo bwa batu. N’a utwisisa maikuto a bona mi n’a ezize ba ba ziyelehile ni bakuli ka mufelañeke o mutuna hahulu. Mi, sina mwa n’a opelezi mangeloi, n’a tiselize baishuwi mombecimanyana. Kwa mafelelezo a bukombwa bwa hae, n’a bulelezi balutiwa ba hae kuli: “Ni mi siyela kozo; ni mi fa kozo ya ka; ha ni mi fi ka mukwa wa lifasi. Pilu ya mina i si ke ya filikana, mi i si ke ya saba.”—Joani 14:27.

Jesu ne si mutusi fela wa batu. N’a ibapanyize ku mulisana, mi baishuwi be ne ba mu latelezi n’a ba likanyelize kwa lingu ha n’a ize: “Na, ni tezi lingu za ka, kuli li be ni bupilo, mane li bu fumane ka buñata. Ki na mulisana yo munde. Mulisana yo munde u fa lingu za hae bupilo bwa hae.” (Joani 10:10, 11) Ee, ka ku fapana ni baeteleli ba bañata hahulu kacenu ba ba ipatela hahulu pili za bona, Jesu n’a fezi bupilo bwa hae lingu za hae.

Lu kona ku tusiwa cwañi ki za n’a ezize Jesu? Ba bañata ba tekelezi manzwi a, a’ li: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Ku ba ni tumelo ku z’a tokwa Jesu pili ku tokwa kuli mutu a mu zibe ni ku ziba Jehova Ndat’ahe. Ku ziba Mulimu ni Jesu Kreste ku kona ku lu tusa ku ba ni silikani se situna hahulu ni Jehova Mulimu se si ka lu tusa ku fumana mombecima tota.

Jesu n’a ize: “Lingu za ka, li utwa linzwi la ka; na li ziba, mi za ni latelela. Ni li fa bupilo bo bu sa feli; mi ha li na ku shwa ni kamuta, mi ha ku na mutu ya ka li zwisa mwa lizoho la ka.” (Joani 10:27, 28) Ki manzwi kwa lilato, ili a’ tiisa! Ki niti kuli Jesu n’a a bulezi ibat’o ba lilimo ze 2,000 ku kuta kwamulaho, kono a sa sebeza sina mwa n’a sebeleza nako yeo. Mu si libali ni hanyinyani kuli Jesu Kreste u sa pila mi h’a si ka ina fela, wa busa cwale ka ku ba Mulena ya beilwe fa lubona lwa Mubuso wa kwa lihalimu wa Mulimu. U sa isa pilu kwa baishuwi ba ba bata hahulu ku ba ni mombecima tota, sina mwa n’a ba iselize pilu ha n’a li fa lifasi-mubu lilimo ze ñata zani ku kuta kwamulaho. Hape, isali yena Mulisana wa lingu za hae. Haiba lu mu latelela, u ka lu tusa ku fumana mombecima tota, o kopanyeleza ni tibelelo ye tiile ya ku bona kozo ye tezi kwapili—ili ku talusa kuli ha ku na ku ba ni mifilifili, lindwa, ni bukebenga.

Ku ziba ni ku lumela kuli Jehova u ka lu tusa ka Jesu, kwa tusa hahulu. Mu hupule Vania, y’o ha n’a sa li musizana n’a siyezwi buikalabelo bo bu buima ili ya n’a hupula kuli Mulimu n’a mu libezi. Vania cwale wa ziba kuli Mulimu h’a si ka mu libala. U li: “Ne ni itutile kuli Mulimu ki mutu luli ya na ni mikwa ye hoha. Lilato la hae ne li mu ezisize ku luma Mwan’a hae ku taha fa lifasi-mubu ku t’o lu pilisa. Ku butokwa hahulu ku ziba taba yeo.”

Marcelo u bulela kuli silikani sa hae ni Mulimu ki silikani luli. Ya n’a kile a ba wa mikiti hahulu y’o u li: “Banana hañata ha ba zibangi za ku eza, mi kwa mafelelezo ba itisezanga bumai. Ba bañwi ba ikenyanga mwa ku itupwaela milyani  ye kola, sina mo ne ni ezelize. Na sepa kuli ba bañata ba ka tusiwa sina mo ne ni tuselizwe ka ku ituta niti ka za Mulimu ni Mwan’a hae.”

Ka ku ituta Bibele ka tokomelo, bo Vania ni Marcelo ne ba til’o ba ni tumelo ye tiile ku Mulimu ni buikolwiso bwa kuli w’a tabela ku ba tusa ku tatulula butata bwa bona. Haiba lu eza ze ne ba ezize, ili ku ituta Bibele ni ku sebelisa ze i bulela, lu ka shitula mombecima o mutuna hahulu, sina mo ba u shitulezi bona. Kihona susuezo ya muapositola Paulusi ye i ka sebeza ku luna luli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.”—Mafilipi 4:6, 7.

Ku Fumana Kozo Sakata Kacenu

Jesu Kreste u etelela batu ba ba nyolelwa niti mwa nzila ye isa kwa bupilo bo bu sa feli bwa mwa paradaisi ya fa lifasi-mubu. H’a nze a ba libisa kwa bulapeli bo bu kenile bwa Mulimu, ba tahelwa ki kozo ye swana ni ye talusizwe mwa Bibele, ye li: “Sicaba sa ka si ka yaha mwa naha ya kozo, si pile mwa mandu a tiile, mwa mabaka fo ku kuzize, fo ku iketilwe.” (Isaya 32:18) Mi yeo ki mitamuno fela ya kozo ye ba ka ikola mwa nako ya kwapili. Lu bala kuli: “Ba ba ishuwa ba ka luwa naha, ba ka ikola kozo ye tuna. Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:11, 29.

Kona kuli lwa kona ku ba ni mombecima tota kacenu? Lwa kona. Hape, lwa kona ku kolwa kuli Mulimu u ka tuha a kapweka kozo ku fita haisali, kwa batu ba ba ipeya ku utwa. Kacwalo he, mu mu lapele a mi fe kozo ya hae. Haiba mu na ni butata bo bu mi byangula kozo, mu lapele mwa n’a lapelezi Mulena Davida kuli: “Manyando a pilu ya ka a ekezehile; u ni zwise mwa liñalelwa za ka. Shalima maswabi a ka ni butuku bwa ka; mi u swalele libi za ka kaufela.” (Samu 25:17, 18) Mu sepe kuli Mulimu wa utwanga litapelo ze cwalo. U otolola lizoho la hae ni ku fa kozo ku bote ba ba i bata ka pilu kaufela. Lu kolwiswa ka lilato kuli: “[Muñ’a] Bupilo u fakaufi ni ba ba mu lapela kaufela, ili kaufela ba ba mu lapela ka ku eza niti. U fa ba ba mu saba se si shukezwi ki bona, hape u utwa ni mihuwo ya bona, mi wa ba lamulela.”—Samu 145:18, 19.

[Manzwi a fa likepe 5]

Batu ha ba na buikoneli bwa ku bonela-hule kamba butali bwa ku ipusa ba sa tusiwi, mi tuso ya Mulimu ki yona inosi ye li ya ngana luli

[Manzwi a fa likepe 6]

Ku ziba Mulimu ni Jesu Kreste ku kona ku lu tusa ku ba ni silikani se situna hahulu ni Jehova Mulimu se si ka lu tusa ku fumana mombecima tota

[Siswaniso se si fa likepe 7]

Ku mamela likelezo za Bibele ku tisa kuli bupilo bwa lubasi bu be bwa kozo